4 నెలల్లోగా రైతు డిస్కమ్‌ ఆపరేషన్స్

రాష్ట్రంలో కొత్తగా ఏర్పాటు చేసిన తెలంగాణ రైతు పవర్‌ డిస్ట్రిబ్యూషన్‌ కంపెనీ లిమిటెడ్‌ (రైతు డిస్కమ్‌)కు తెలంగాణ విద్యుత్తు నియంత్రణ మండలి (ఈఆర్సీ) గ్రీన్‌సిగ్నల్‌ ఇచ్చింది.

• విద్యుత్తు పంపిణీ లైసెన్సు జారీ
• వ్యవసాయ పంపుసెట్లకు మీటర్లు ఉండవని వెల్లడించిన ఈఆర్సీ

హైదరాబాద్‌, జూలై 11 (నమస్తే తెలంగాణ): రాష్ట్రంలో కొత్తగా ఏర్పాటు చేసిన తెలంగాణ రైతు పవర్‌ డిస్ట్రిబ్యూషన్‌ కంపెనీ లిమిటెడ్‌ (రైతు డిస్కమ్‌)కు తెలంగాణ విద్యుత్తు నియంత్రణ మండలి (ఈఆర్సీ) గ్రీన్‌సిగ్నల్‌ ఇచ్చింది. శనివారం విద్యుత్తు పంపిణీ లైసెన్సును జారీచేసింది. రాష్ట్రంలోని రైతులకు ఉచిత విద్యుత్తు కొనసాగుతుందని, వ్యవసాయ పంపుసెట్లకు మీటర్లు ఉండవని ఈఆర్సీ స్పష్టత ఇచ్చింది. కొత్త డిస్కమ్‌ 4 నెలల్లోగా కార్యకలాపాలు ప్రారంభించాలని ఈఆర్సీ పేర్కొన్నది. విద్యుత్తు టారిఫ్‌ విషయంలో ఎలాంటి మార్పుల్లేవని, 2026-27 ఆర్థిక సంవత్సరానికి ఆమోదించిన టారిఫ్‌, సబ్సిడీలు అమల్లో ఉంటాయని వెల్లడించింది. 2027-28 ఆర్థిక సంవత్సరానికి సంబంధించిన టారిఫ్‌ ప్రతిపాదనలను ఈ ఏడాది నవంబర్‌ 30లోగా సమర్పించాలని రైతు డిస్కమ్‌తోపాటు ఉత్తర, దక్షిణ డిస్కమ్‌ (ఎన్పీడీసీఎల్‌, ఎస్పీడీసీఎల్‌)లకు సూచించాలన్నది. రైతు డిస్కమ్‌పై ఈఆర్సీ పర్యవేక్షణ ఉంటుందని స్పష్టం చేసింది.

ఈఆర్సీ ఉత్తర్వులు

• లోడ్‌ అంచనాలు, లైన్‌ లాసెస్‌ తగ్గింపు, ఇంటర్‌ఫేస్‌ మీటరింగ్‌, సిబ్బంది, ఆర్థిక అంశాలతో కూడిన సమగ్ర వ్యాపార ప్రణాళికలను రైతు డిస్కమ్‌ 3 నెలల్లోగా కమిషన్‌కు సమర్పించాలి.
• రైతు డిస్కమ్‌ కనీసం రెండు వినియోగదారుల ఫిర్యాదుల పరిష్కార వేదిక (సీజీఆర్‌ఎఫ్‌)లను ఏర్పాటు చేయాలి. ఇవి ఏర్పడే వరకు ఉత్తర, దక్షిణ డిస్కమ్‌ల ఫోరంలే ఫిర్యాదులను పరిష్కరిస్తాయి.
• ఎన్పీడీసీఎల్‌, ఎస్పీడీసీఎల్‌ల పరిధితోపాటు వాటి వినియోగదారుల మార్పునకు ఆ రెండు డిస్కమ్‌లు దాఖలు చేసిన పిటిషన్లను ఈఆర్సీ ఆమోదించింది.
• కొత్త విద్యుత్తు కనెక్షన్ల జారీపై ఎలాంటి ఆంక్షలు లేవు. వాటిని నిలిపివేయడం ఉండదు. రైతు డిస్కమ్‌ పూర్తిస్థాయిలో కార్యకలాపాలు ప్రారంభించే వరకు ఉత్తర, దక్షిణ డిస్కమ్‌లే దరఖాస్తులు స్వీకరించి కొత్త కనెక్షన్లు మంజూరు చేస్తాయి.