సెప్టెంబర్‌ ఒకటి.. ఉద్యోగుల్లో చీకటి.. పెన్షన్‌ విద్రోహదినంగా పాటించనున్న ఉద్యోగసంఘాలు

కాంట్రిబ్యూటరీ పెన్షన్‌ స్కీం(సీపీఎస్‌). ఇది ఒక స్కీం మాత్రమే కాదు.. ఉద్యోగుల జీవన భద్రతను బలిచేసిన పథకం. వృద్ధాప్యంపై చేసిన దాడి. లక్షలాది ఉద్యోగుల కుటుంబాలకు కాంగ్రెస్‌ చేసిన తీరని అన్యాయం. కాంగ్రెస్‌ ప్రభుత్వం అమల్లోకి తీసుకొచ్చిన సీపీఎస్‌తో ఉద్యోగులకు భద్రత కరువయ్యింది.

• కాంట్రిబ్యూటరీ పెన్షన్‌తో కరువైన భద్రత
• సీపీఎస్‌ దంగల్‌కు పిలుపునిచ్చిన సంఘాలు
• గర్జించనున్న ఉద్యోగ, ఉపాధ్యాయులు
• నేడు రాష్ట్రవ్యాప్తంగా ఆందోళనలు

హైదరాబాద్‌, ఆగస్టు 31 (నమస్తే తెలంగాణ) : కాంట్రిబ్యూటరీ పెన్షన్‌ స్కీం(సీపీఎస్‌). ఇది ఒక స్కీం మాత్రమే కాదు.. ఉద్యోగుల జీవన భద్రతను బలిచేసిన పథకం. వృద్ధాప్యంపై చేసిన దాడి. లక్షలాది ఉద్యోగుల కుటుంబాలకు కాంగ్రెస్‌ చేసిన తీరని అన్యాయం. కాంగ్రెస్‌ ప్రభుత్వం అమల్లోకి తీసుకొచ్చిన సీపీఎస్‌తో ఉద్యోగులకు భద్రత కరువయ్యింది.

రాష్ట్రంలో సీపీఎస్‌ అమల్లోకి వచ్చి రెండు దశాబ్దాలు గడిచాయి. బలవంతంగా ఉద్యోగులపై సీపీఎస్‌ రుద్దిన, ఉద్యోగుల బతుకుల్లో చీకటి నింపిన సెప్టెంబర్‌ 1ని ఉద్యోగ, ఉపాధ్యాయ సంఘాలు పెన్షన్‌ విద్రోహ దినోత్సవంగా పాటిస్తున్నాయి. చీకటి దినంగా అభివర్ణిస్తున్నాయి. సీపీఎస్‌ రద్దు జంగ్‌కు రెడీ 9వ పేజీలో

మొదటిపేజీ తరువాయి…

అయ్యాయి. పాత పింఛన్‌ పునరుద్ధరణ పోరుకు సమరశంఖం పూరించాయి. సోమవారం రాష్ట్రవ్యాప్త ఉద్యమానికి జేఏసీలు, సంఘాలు పిలుపునిచ్చాయి. ఇన్నాళ్లు ఓపిక పట్టిన ఉద్యోగ, ఉపాధ్యాయ సంఘాలు కాంగ్రెస్‌ మోసంపై గర్జించేందుకు రెడీ అయ్యాయి. టీచర్లు రాష్ట్ర రాజధాని హైదరాబాద్‌లో సోమవారం బ్లాక్‌మార్చ్‌ నిర్వహించనుండగా, రెండు జేఏసీలు, ఇతర సంఘాలు ఉద్యమాన్ని ఉర్రూతలూగించనున్నాయి.

ఉద్యోగ సంఘాల ఆందోళనలు..

• తెలంగాణ ఉద్యోగ, ఉపాధ్యాయ జేఏసీ రాష్ట్రస్థాయి, జిల్లాస్థాయిలో ఉద్యమానికి పిలుపునిచ్చింది. సోమవారం హైదరాబాద్‌లోని ఆర్టీసీ కల్యాణమండపంలో పాత పింఛన్‌ సాధన పోరాట సభ నిర్వహించనున్నది. అన్ని జిల్లా కలెక్టరేట్ల ఎదుట జేఏసీల ఆధ్వర్యంలో ఆందోళనకు దిగనున్నది. 200కు పైగా సంఘాలు, నేతలు పాల్గొనున్నారు. పాత పింఛన్‌ సాధన సభను విజయవంతం చేయాలని జేఏసీ చైర్మన్‌ మారం జగదీశ్వర్‌, సెక్రటరీ జనరల్‌ ఏలూరి శ్రీనివాసరావు పిలుపునిచ్చారు. జిల్లాల్లో కార్యక్రమాలు నిర్వహించి, సాయంత్రం హైదరాబాద్‌లో నిర్వహించే సభను విజయవంతం చేయాలని కోరారు.
• సీపీఎస్‌ రద్దుచేయాలని, పాత పింఛన్‌ను పునరుద్ధరించాలన్న ప్రధాన డిమాండ్‌తో పీఆర్టీయూ టీఎస్‌ సోమవారం హైదరాబాద్‌లో బ్లాక్‌మార్చ్‌ నిర్వహించనున్నది. వేలాది మంది టీచర్లతో ఇందిరాపార్క్‌లో మహాధర్నా నిర్వహించనున్నది. ఈ బ్లాక్‌ మార్చ్‌కు టీచర్లంతా నల్ల టీషర్ట్‌లు, చొక్కాలు, చీరలు, చుడీదార్‌లు ధరించి హాజరుకావాలని పీఆర్టీయూ టీఎస్‌ అధ్యక్షుడు గుండు లక్ష్మణ్‌, ప్రధాన కార్యదర్శి పుల్గం దామోదర్‌రెడ్డి పిలుపునిచ్చారు.
• సీపీఎస్‌ విద్రోహ దినోత్సవం సందర్భంగా సోమవారం రాష్ట్రవ్యాప్తంగా ఆందోళనలకు తెలంగాణ సీపీఎస్‌ ఎంప్లాయిస్‌ అసోసియేషన్‌ (టీసీపీఎస్‌ఈఏ) పిలుపునిచ్చింది. ఉద్యోగులంతా నల్లబ్యాడ్జీలు ధరించి విధులకు హాజరుకావాలని అసోసియేషన్‌ రాష్ట్ర అధ్యక్షుడు పుప్పాల కృష్ణకుమార్‌, ప్రధాన కార్యదర్శి హన్మండ్ల భాస్కర్‌ పిలుపునిచ్చారు. కాంగ్రెస్‌ ప్రభుత్వం మ్యానిఫెస్టో హామీ మేరకు సీపీఎస్‌ రద్దుచేయాలని వారు డిమాండ్‌ చేశారు.
• పాత పింఛన్‌ సాధన, ఉద్యోగుల ఆత్మగౌరవంతో ముడిపడి ఉండటంతో తెలంగాణ ఎంప్లాయిస్‌ జేఏసీ(లచ్చిరెడ్డి) హైదరాబాద్‌లో ఆత్మగౌరవ సభ నిర్వహించనున్నది. బాగ్‌లింగంపల్లిలోని సుందరయ్య విజ్ఞానకేంద్రంలో పాత పింఛన్‌ సాధన ఆత్మగౌరవ సభను జేఏసీ తలపెట్టింది. ఈసభకు తపస్‌, సెకండరీ గ్రేడ్‌ టీచర్స్‌ యూనియన్‌(ఎస్జీటీయూ) సహా పలు ఉద్యోగ, ఉపాధ్యాయ సంఘాలు మద్దతు పలికాయి.