3 జిల్లాల ఎన్నిక.. 6 జిల్లాల్లో ఓటర్లు

త్వరలో మహబూబ్‌నగర్‌, రంగారెడ్డి, హైదరాబాద్‌ ఉపాధ్యాయ ఎమ్మెల్సీ నియోజకవర్గ ఎన్నిక నిర్వహించనున్నారు. వాస్తవానికి ఉమ్మడి మూడు జిల్లాల ఎన్నిక ఇది.

• నివాసమున్నచోటే టీచర్‌ ఎమ్మెల్సీ ఓటు హక్కు
• వరంగల్‌, నల్లగొండ, మెదక్‌ ఉమ్మడి జిల్లాల్లోని ఉపాధ్యాయులకూ చాన్స్‌
• నవంబర్‌ 7లోపు ఓటు నమోదుకు చాన్స్‌

హైదరాబాద్‌, అక్టోబర్‌ 17 (నమస్తే తెలంగాణ) : త్వరలో మహబూబ్‌నగర్‌, రంగారెడ్డి, హైదరాబాద్‌ ఉపాధ్యాయ ఎమ్మెల్సీ నియోజకవర్గ ఎన్నిక నిర్వహించనున్నారు. వాస్తవానికి ఉమ్మడి మూడు జిల్లాల ఎన్నిక ఇది. అయితే, ఈ మూడు జిల్లాలతో పాటు మరో మూడు జిల్లాల సంబంధించిన టీచర్లు ఓటు వేసే అవకాశం ఉన్నది. నిబంధనల ప్రకారం ఉపాధ్యాయుల పనిచేసే చోటు కాకుండా ఎక్కడ నివాసముంటే అక్కడ ఓటును నమోదు చేసుకోవచ్చు. ఈ లెక్కన జీహెచ్‌ఎంసీ పరిధిలో నివసిస్తున్న ఉపాధ్యాయులు, అధ్యాపకులు, ప్రొఫెసర్లంతా ఓటు హక్కును నమోదు చేసుకొనే అవకాశం ఉన్నది.

ఉమ్మడి మహబూబ్‌నగర్‌, రంగారెడ్డి, హైదరాబాద్‌ జిల్లాల్లోని వారితో పాటు ఈ నియోజకవర్గం పరిధిలోకి రాని ఉమ్మడి నల్లగొండ, మెదక్‌, వరంగల్‌ తదితర జిల్లాలకు చెందిన ఉపాధ్యాయులంతా జీహెచ్‌ఎంసీ పరిధిలోని పలు ప్రాంతాల్లో నివసిస్తూ.. రాకపోకలు సాగిస్తున్నారు. తాజాగా జరిగే ఓటు నమోదులో వీరంతా ఇదే నియోజకర్గంలో ఓట్లను నమోదు చేసుకోవచ్చు. ఈ ఎమ్మెల్సీ ఓటరు నమోదు ప్రక్రియ అక్టోబర్‌ 1 నుంచి నవంబర్‌ 7 వరకు కొనసాగనున్నది. నవంబర్‌ 23న ముసాయిదా ఓటర్ల జాబితాను ప్రకటిస్తారు. ఈ ఏడాది 20 వేలకు పైగా ఓట్లు నమోదయ్యే అవకాశం ఉన్నట్టు తెలుస్తున్నది.

ఉదాహరణలిలా..

• జనగామ, యాదాద్రిభువనగిరి, నల్లగొండ, సంగారెడ్డి, మెదక్‌, సిద్దిపేట తదితర జిల్లాల్లో టీచర్లు, అధ్యాపకులుగా పనిచేస్తూ జీహెచ్‌ఎంసీ లేదా మేడ్చల్‌ -మల్కాజిగిరి, రంగారెడ్డి జిల్లాల్లో నివాసమున్నవారంతా టీచర్‌ ఎమ్మెల్సీ ఓటుహక్కును నమోదుచేసుకోవచ్చు.
• ఐఐటీహెచ్‌ సంగారెడ్డిలో పనిచేసే ప్రొఫెసర్‌.. జీహెచ్‌ఎంసీ పరిధిలోని రామచంద్రాపురంలో నివాసముంటే ఓటు హక్కుకు అనర్హుడు. ఆర్సీపురంతో పాటు భారతీనగర్‌, పటాన్‌చెరు జీహెచ్‌ఎంసీ డివిజన్లలో నివాసమున్నవారు కూడా ఓటుహక్కు పొందలేరు. ఈ మూడు డివిజన్లు టెక్నికల్‌గా జీహెచ్‌ఎంసీలో ఉన్నా.. టీచర్‌ ఎమ్మెల్సీ నియోజకవర్గం కరీంనగర్‌, మెదక్‌, నిజామాబాద్‌, ఆదిలాబాద్‌లో ఉన్నాయి. దాంతో వీరంతా మహబూబ్‌నగర్‌, రంగారెడ్డి, హైదరాబాద్‌ నియోజకవర్గం పరిధిలోకి రారు.
• ఫారెస్ట్‌కాలేజీ ములుగులో పనిచేసే ఆచార్యుడు శామీర్‌పేటలోనో లేక అల్వాల్‌లో నివాసమున్నా కొత్తగా ఓటు హక్కుకు అర్హుడే.

ఓటు నమోదు నిబంధనలిలా..

• 2022 నవంబర్‌ 1కి ముందు ఆరేండ్లు (1-11-2016 నుంచి 31-10-22 నాటికి )లో మూడేండ్లకు తగ్గకుండా ఉన్నత పాఠశాల ఆపై స్థాయి విద్యాసంస్థల్లో పనిచేసి ఉండాలి. టీచర్‌, లెక్చరర్‌, ప్రొఫెసర్లుగా మూడేండ్లు ఒకే సంస్థలో పనిచేయాల్సిన అవసరం లేదు.
• 1నవంబర్‌ 2019 ముందు నియామకమైన వారు కూడా అర్హులే. ఉన్నత పాఠశాల్లో పనిచేస్తున్న సెకండరీ గ్రేడ్‌ టీచర్లు (ఎస్జీటీలు, భాషాపండితులు) ఓటు హక్కును నమోదుచేసుకోవచ్చు. ఎస్జీటీలకు ఓటు హక్కు లేదు.
• ప్రైవేట్‌ స్కూళ్లు, కాలేజీలు, వర్సిటీలు విద్యాసంస్థల్లో పనిచేసే బోధనాసిబ్బంది దరఖాస్తుతో పాటు సర్వీస్‌, పీఎఫ్‌ రికార్డులను రుజువులుగా చూపాలి.
• హైస్కూళ్లో పనిచేసే టీచర్లు, నల్సార్‌, ఐఎస్‌బీ, నిఫ్ట్‌, ట్రిపుల్‌ ఐటీ, గురుకులాలు, మాడల్‌ స్కూళ్లు, కేజీబీవీలు, నవోదయ, కేంద్రీయ విద్యాలయాల్లోని టీచర్లు, ఇంజినీరింగ్‌, పాలిటెక్నిక్‌ కాలేజీ అధ్యాపకులు ఓటు నమోదు చేసుకోవచ్చు. www.ceotelangana.nic. inలో దరఖాస్తు చేసుకోవచ్చు.

ఈ సారి కొత్తగా నమోదుచేసుకోవాల్సిందే
గతంలో ఓటు హక్కు ఉన్నా. ఈ సారి కొత్తగా అంతా నమోదుచేసుకోవాల్సిందే. మూడు ఉమ్మడి జిల్లాల్లో నివాసముండే ఉపాధ్యాయులు, అధ్యాపకులు, ప్రొఫెసర్లు బాధ్యతగా తమ ఓటును నమోదుచేసుకోవాలి. మా కార్యకర్తలు విద్యాసంస్థలు, కాలనీల్లో దరఖాస్తులు అందజేస్తున్నారు. పూర్తిచేసిన దరఖాస్తులను తాసిల్దార్‌ , జీహెచ్‌ఎంసీ కార్యాలయాల్లో సమర్పించి ఓటు హక్కు పొందవచ్చు.
– గుర్రం చెన్నకేశవరెడ్డి, పీఆర్టీయూటీఎస్‌ అభ్యర్థి