బీఆర్‌ఎస్‌ హయాంలో చదువులకు అగ్రస్థానం

బీఆర్‌ఎస్‌ సర్కారు పాఠశాల విద్యకు అధిక ప్రాధాన్యం ఇచ్చింది. చదువులకు పెద్దపీట వేసింది. ఇందుకు బడ్జెట్‌ గణాంకాలే నిదర్శనంగా నిలుస్తున్నాయి.

• బడ్జెట్‌ను మించి విద్య వ్యయం
• కాంగ్రెస్‌ సర్కారులో వ్యయం అంతంతే మాత్రమే
• అసెంబ్లీలో ప్రకటించిన బడ్జెట్‌ పద్దు పుస్తకాల్లో వెల్లడి

హైదరాబాద్‌, మార్చి 25 (నమస్తే తెలంగాణ) : బీఆర్‌ఎస్‌ సర్కారు పాఠశాల విద్యకు అధిక ప్రాధాన్యం ఇచ్చింది. చదువులకు పెద్దపీట వేసింది. ఇందుకు బడ్జెట్‌ గణాంకాలే నిదర్శనంగా నిలుస్తున్నాయి. బడ్జెట్‌ కేటాయింపుల కంటే బీఆర్‌ఎస్‌ అధికంగా ఖర్చుచేసింది. అదే కాంగ్రెస్‌ సర్కారు బడ్జెట్‌ కేటాయింపుల కంటే తక్కువగా ఖర్చుచేయడం గమనార్హం. ఈ విషయాన్ని సాక్షాత్తు కాంగ్రెస్‌ ప్రభుత్వమే అసెంబ్లీలో ప్రకటించింది. బీఆర్‌ఎస్‌ హయాంలో బడ్జెట్‌ కేటాయింపులు, వ్యయం ఘనంగా ఉండగా, కాంగ్రెస్‌ పాలనలో ఖర్చు అధ్వానం అన్నట్టుగా పరిస్థితి తయారయ్యింది. మంగళవారం బడ్జెట్‌ పద్దు పుస్తకాల్లో ఇదే విషయాన్ని పొందుపరిచింది.

• 2022-23 విద్యాసంవత్సరంలో పాఠశాల విద్యకు బీఆర్‌ఎస్‌ సర్కారు రూ. 12,528.51కోట్లు కేటాయించింది. రూ.13,710.88 కోట్లు ఖర్చుచేసింది. అంటే బడ్జెట్‌ కేటాయింపుల కంటే అదనంగా రూ. 1,182.37 కోట్లు కేటాయించడం గమనార్హం.
• 2023-24 ఆర్థిక సంవత్సరంలో బీఆర్‌ఎస్‌ సర్కారు రూ. 14,488.25 కోట్లను బడ్జెట్‌లో కేటాయించింది. ఖర్చు విషయానికి వస్తే రూ. 14,523.40 కోట్లు ఖర్చుచేసింది. బడ్జెట్‌ కంటే రూ. 35.15 కోట్లు అధికంగా వెచ్చించింది.
•  2024-25 ఆర్థిక సంవత్సరంలో కాంగ్రెస్‌ సర్కారు పాఠశాల విద్యకు రూ. 15,591.30 కోట్లు బడ్జెట్‌లో కేటాయించగా, ఖర్చుచేసింది కేవలం రూ.15,169 కోట్లు మాత్రమే. అంటే బడ్జెట్‌లో కేటాయించినదానికంటే రూ. 421.8 కోట్లు తక్కువగా ఖర్చుచేసింది.
• 2024-25లో మాడల్‌ స్కూల్స్‌కు కాంగ్రెస్‌ సర్కారు నిర్వహణ పద్దు కింద.. రూ.475 కోట్లు కేటాయించగా, 2025 ఫిబ్రవరి వరకు రూ. 383 కోట్లు మాత్రమే ఖర్చుచేసింది.
• కొత్తగా 2025-26 ఆర్థిక సంవత్సరంలో పాఠశాల విద్యకు రూ. 16,387 కోట్లు కేటాయించింది. దీంట్లో మొత్తం ఖర్చుచేస్తుందా? అన్న అనుమానాలు విద్యావేత్తల నుంచి వ్యక్తమవుతున్నాయి.