Education Department | ‘విద్య’లో కోల్డ్‌వార్‌..! విద్యాశాఖది ఒకదారి.. కమిషన్‌ది మరోదారి

విద్యారంగంలో చేపట్టాల్సిన సంస్కరణలపై అధ్యయనం చేసి రాష్ట్ర ప్రభుత్వానికి సిఫారసులు చేసేందుకు ఏర్పాటైన విద్యాకమిషన్‌కు, రాష్ట్ర విద్యాశాఖకు మధ్య కోల్డ్‌వార్‌ నడుస్తున్నదా? విద్యాకమిషన్‌ వర్సెస్‌ విద్యాశాఖ అన్నట్టుగా పరిస్థితి తయారైందా?

• రెండింటి మధ్య పెరుగుతున్న దూరం
• కమిషన్‌ రూపొందించిన డ్రాఫ్ట్‌ బిల్లుపై విద్యా శాఖ అధికారుల గుస్సా!
• కమిషన్‌ సిఫారసులను పట్టించుకోని సర్కార్‌ మరి కమిషనెందుకు? సిఫారసులెందుకు?

హైదరాబాద్‌, మే 14 (నమస్తే తెలంగాణ): విద్యారంగంలో చేపట్టాల్సిన సంస్కరణలపై అధ్యయనం చేసి రాష్ట్ర ప్రభుత్వానికి సిఫారసులు చేసేందుకు ఏర్పాటైన విద్యాకమిషన్‌కు, రాష్ట్ర విద్యాశాఖకు మధ్య కోల్డ్‌వార్‌ నడుస్తున్నదా? విద్యాకమిషన్‌ వర్సెస్‌ విద్యాశాఖ అన్నట్టుగా పరిస్థితి తయారైందా? ప్రస్తుత పరిస్థితిని చూస్తే అలాంటి వాతావరణమే కనిపిస్తున్నది. విద్యాశాఖకు, విద్యాకమిషన్‌కు అస్సలు పొసగడం లేదనే టాక్‌ వినిపిస్తున్నది.

విద్యాకమిషన్‌ అతి జోక్యాన్ని విద్యాశాఖ జీర్ణించుకోలేకపోతున్నదనే చర్చ నడుస్తున్నది. సమీక్షలు, సదస్సుల పేరుతో విద్యాకమిషన్‌ హడావుడి చేస్తుండటంతో కీలక ఉన్నతాధికారులు వీటికి దూరంగా ఉంటున్నట్టు తెలిసింది. విద్యాకమిషన్‌ అధ్యయనం, సమావేశాలు, పర్యటనలు, తనిఖీలు, పబ్లిక్‌ హియరింగ్స్‌ పేరిట జిల్లాల్లో ప్రజాభిప్రాయ సేకరణ జరుపుతున్నది. కమిషన్‌ ఇప్పటివరకు ప్రభుత్వానికి ఏడు నివేదికలను సమర్పించింది. కమిషన్‌ సమర్పించిన నివేదికలు, సూచించిన సిఫారసుల్లో ఒక్కటి కూడా కార్యరూపం దాల్చలేదు. ఇందుకు కోల్డ్‌వారే కారణమన్న వాదనలున్నాయి. ఈ పరిస్థితుల్లో విద్యాకమిషన్‌ ఎందుకు? సిఫారసులు ఎందుకు? అన్న ప్రశ్నలు ఉత్పన్నమవుతున్నాయి.

బిల్లు రూపొందించడంపై విమర్శలు
విద్యారంగంలో చేపట్టాల్సిన సంస్కరణలపై సిఫారసులు చేయాల్సిన విద్యాకమిషన్‌ ఇటీవల డ్రాఫ్ట్‌ బిల్లును రూపొందించడం వివాదాస్పదమైంది. ప్రభుత్వం రూపొందించాల్సిన బిల్లును విద్యాకమిషన్‌ ఎలా రూపొందిస్తున్న ప్రశ్నలు ఉత్పన్నమయ్యాయి. ‘తెలంగాణ ప్రైవేట్‌ స్కూల్‌ అండ్‌ జూనియర్‌ కాలేజీ ఫీజు రెగ్యులేటరీ అండ్‌ మానిటరింగ్‌ కమిషన్‌ డ్రాఫ్ట్‌ బిల్లు-25’ పేరుతో విద్యాకమిషన్‌ ఒక బిల్లును సిద్ధం చేసింది.

ఈ బిల్లు విషయంపైనే అటు విద్యాకమిషన్‌, ఇటు విద్యాశాఖ మధ్య అంతరం పెరిగినట్టు ప్రచారం జరుగుతున్నది. ఇదే రెండింటి మధ్య విబేధాలకు దారితీసిందనే చర్చ నడుస్తున్నది. వాస్తవానికి విద్యాకమిషన్‌ అనేది కేవలం సిఫారసులు చేయాల్సిన సంస్థ మాత్రమే. కానీ, డ్రాఫ్ట్‌ బిల్లును తయారుచేయడమంటే ప్రభుత్వ వ్యవహారాల్లో జోక్యం చేసుకోవడమేనన్న భావనతో ఉన్న విద్యాశాఖ వర్గాలు ఈ అంశాన్నే పక్కనపెట్టేశాయన్న వాదనలు వినిపిస్తున్నాయి. దీంతో ఫీజు నియంత్రణ ఇప్పట్లో సాధ్యంకాదని, వచ్చే ఏడాది వరకు ఆగాల్సిందేనన్న ప్రచారం జరుగుతున్నది. కమిషన్‌ సిఫారసుల ఆధారంగా బిల్లును తాము రూపొందించాల్సి ఉంటుందని, తాము చేయాల్సిన పనిని విద్యాకమిషన్‌ చేస్తే ఎట్లా? అని ఒక అధికారి ప్రశ్నించడం గమనార్హం.

కమిషన్‌ సిఫారసులపై స్పందించని సర్కార్‌

• రాష్ట్ర బడ్జెట్‌లో విద్యారంగానికి 7% నిధులు సరిపోవని, 20% నిధులు కేటాయించాలని కమిషన్‌ నివేదించింది. రాష్ట్రంలో లెర్నింగ్‌ పావర్టీ (అభ్యాస పేదరికం) నెలకొన్నదని, విద్యారంగానికి 20% నిధులు కేటాయిస్తేనే ఈ పేదరికం నుంచి బయటపడగలమని కమిషన్‌ స్పష్టంచేసింది. ఈ సిఫారసులు బుట్టదాఖలయ్యాయి. తాజా బడ్జెట్‌లోనూ సర్కారు 7% నిధులే కేటాయించింది.
• ఫీజుల నియంత్రణ కోసం జిల్లా స్థాయిలో జిల్లా ఫీజు రెగ్యులేటరీ కమిటీని ఏర్పాటుచేయాలని, స్కూళ్లను మొత్తం ఐదు క్యాటగిరీలుగా విభజించాలని విద్యాకమిషన్‌ సూచించింది. స్కూళ్లను క్యాటగిరీలుగా విభజించలేమని సర్కార్‌ తేల్చింది. దీంతో విద్యాకమిషన్‌ చేసిన కసరత్తు అంతా వృథా అయ్యింది.
• స్కూళ్లతోపాటు ప్రైవేట్‌ జూనియర్‌ కాలేజీల్లోనూ ఫీజుల నియంత్రణ కోసం కమిషన్‌ పలు సిఫారసులు చేసింది. అయితే, ‘నిర్దిష్ట ఫీజు’ను నిర్ణయించలేమని, ఇలా పెడితే కోర్టులు కొట్టివేస్తాయని విద్యాశాఖ ఈ సిఫారసులను తిరస్కరించింది.
• విద్యాహక్కు చట్టం సెక్షన్‌-12(1)సీ ప్రకారం ప్రైవేట్‌ విద్యాసంస్థల్లో పేదలకు 25% సీట్లను కేటాయించాలని కమిషన్‌ సూచించింది. దీనిపై విధివిధానాలేవీ ఇంకా సిద్ధం కాలేదు.
• ఇంటర్‌ విద్యార్థులకు మధ్యాహ్న భోజనం అందించాలని కమిషన్‌ సిఫారసు చేసింది. దీనిపై సర్కార్‌ నుంచి ఉలుకూ పలుకూ లేదు.
• పాఠశాలల్లో మధ్యాహ్న భోజనం అధ్వానంగా ఉన్నదని, ధరలను పెంచాలని కమిషన్‌ సూచించింది. కట్టెలపొయ్యి మీద వండొద్దని, బోర్‌ నీళ్లు వాడొద్దని, టీజీఈడబ్ల్యూఐడీసీ ద్వారా సెంట్రలైజ్డ్‌ ప్రొక్యూర్‌మెంట్‌ విధానంలో వంట సరుకులను సరఫరాచేయాలని, కుక్‌ కమ్‌ హెల్పర్ల పారితోషికాన్ని పెంచాలని కమిషన్‌ సిఫారసు చేసింది. కానీ ధరల పెంపు, వసతుల కల్పన, సెంట్రలైడ్జ్‌ ప్రొక్యూర్‌మెంట్‌పై ప్రభుత్వం ఇంతవరకు ఎలాంటి నిర్ణయం తీసుకోలేదు. కుక్‌ కమ్‌ హెల్పర్ల పారితోషికాన్ని పెంచలేదు.
• మండలానికి నాలుగు చొప్పున ప్రీ ప్రైమరీ విద్యను అందించేందుకు కొత్తగా ఫౌండేషన్‌ స్కూల్స్‌ను ఏర్పాటుచేయాలని, ఎల్‌కేజీ, యూకేజీ వంటి తరగతులను ఈ ఫౌండేషన్‌ స్కూళ్లల్లో నిర్వహించాలని కమిషన్‌ సూచించింది. అయితే, కొత్త విద్యాసంవత్సరంలో మండలానికి నాలుగు కాకుండా, జిల్లాకు మూడు చొప్పున వెయ్యి పాఠశాలల్లోనే ప్రీ ప్రైమరీ విద్యను ప్రారంభించనున్నారు.
• ఒకటో తరగతిలో అడ్మిషన్‌ పొందేందుకు ఆరేండ్లు పూర్తిచేసి ఉండాలి. రాష్ట్రంలో ఇప్పటివరకు ఐదేండ్లు పూర్తిచేసిన వారికి అడ్మిషన్‌ ఇస్తున్నారు. ఆరేండ్లకు పెంచాలని కమిషన్‌ సూచించింది. ఇంతవరకు పట్టించుకున్న దాఖలాల్లేవు.