ఇంటర్‌లోనూ డ్రాపౌట్స్‌.. ఆర్థిక సమస్యలతోనే అత్యధికులు, మానసిక సమస్యలతో మరో 15శాతం

పాఠశాల స్థాయిలోనే కాదు.. ఇంటర్‌ విద్యలోనూ డ్రాపౌట్స్‌ ఆందోళన కలిగిస్తున్నాయి. ఇంటర్‌లో చేరిన విద్యార్థుల్లో కొందరు డ్రాపౌట్‌ అవుతున్నారు.

• తేల్చిన ఇంటర్‌ విద్యాశాఖ అధ్యయనం

హైదరాబాద్‌, నవంబర్‌ 23 (నమస్తే తెలంగాణ) : పాఠశాల స్థాయిలోనే కాదు.. ఇంటర్‌ విద్యలోనూ (Intermediate) డ్రాపౌట్స్‌ (Dropouts) ఆందోళన కలిగిస్తున్నాయి. ఇంటర్‌లో చేరిన విద్యార్థుల్లో కొందరు డ్రాపౌట్‌ అవుతున్నారు. పైచదువులు చదవలేకపోతున్నారు. అత్యధికులు ఆర్థిక చిక్కులతోనే చదువులకు ఫుల్‌స్టాప్‌ పెడుతున్నట్టు ఇంటర్‌ విద్యాధికారుల అధ్యయనంలో తేలింది. ఆర్థిక సమస్యలతో 20% డ్రాపౌట్‌ అవుతున్నట్టు వెల్లడయ్యింది. మరో 15% మంది మానసిక ఒత్తిడితో ఇంటర్‌కు గుడ్‌బై చెబుతున్నట్టు తేల్చింది.

2024-25 విద్యాసంవత్సరంలో 1,60,127 మంది సర్కారు కాలేజీల్లో ప్రవేశాలు పొందగా పరీక్షలు రాసింది కేవలం 1,26,845 మందే. అంటే దాదాపు 34వేల మంది డ్రాపౌట్‌ అయ్యారు. 2023-24లో 1.60లక్షల మంది నమోదుకాగా, పరీక్షలు రాసింది 1,46,975 మందే. అంటే ఈ ఒక్క ఏడాదే 14వేల మంది డ్రాపౌట్‌ అయ్యారు. డ్రాపౌట్స్‌ నేపథ్యంలో అధికారులు ఓ సర్వే చేయించారు. సర్వేకు సంబంధించిన కొన్ని వివరాలిలా ఉన్నాయి.

డ్రాపౌట్స్‌ వివరాలిలా..

• పై చదువులపై అవగాహన లేకుండా 15% మంది డ్రాపౌట్‌ అవుతున్నారు.
• శిక్షణ సక్రమంగా లేకపోవడంతో 10% మంది చదువులు కొనసాగించడంలేదు. ఇతరాత్ర కారణాలతో మరో 10% మంది డ్రాపౌట్‌గా మారారు.
• పౌష్టికాహారం అందక, మధ్యాహ్న భోజనం లేక 10% మంది ఇంటర్‌లో చేరి ఆపేస్తున్నారు.
• నాణ్యమైన విద్య అందక 10% మంది, మౌలిక వసతుల కొరత కారణంగా 10% మంది డ్రాపౌట్‌ అవుతున్నారు.
• ఆర్థికపరమైన చిక్కులతో 20%, మానసిక సమస్యలతో 15% మంది డ్రాపౌట్‌ అవుతున్నారు.