ప్రైవేటు టీచర్ల ఆర్థికసాయం పంపిణీకి ముసాయిదా మార్గదర్శకాలు

హైదరాబాద్‌ : ప్రైవేటు పాఠశాల బోధన, బోధనేతర సిబ్బందికి నెలకు రూ.2 వేల ఆర్థికసాయం, 25 కిలోల బియ్యం పంపిణీ చేసేందుకు ప్రభుత్వం ముసాయిదా మార్గదర్శకాలను విడుదల చేసింది. కొవిడ్‌-19 సంక్షోభం కారణంగా ప్రైవేటు పాఠశాలల బోధన, బోధనేతర సిబ్బంది బాధలను తగ్గించేందుకు ఆర్థికసాయంతో పాటు బియ్యం పంపిణీ చేయాలని తెలంగాణ ప్రభుత్వం నిర్ణయించిన సంగతి తెలిసిందే. సజావుగా పంపిణీ చేసేందుకు ఈ క్రింది మార్గదర్శకాలను జారీచేసింది.

• బోధన, బోధనేతర సిబ్బంది జాబితాను విద్యాసంస్థల నుండి నిర్దేశించిన ప్రొఫార్మాలో పొందడం. ఈ ప్రొఫార్మాలో బ్యాంక్‌ ఖాతా, సిబ్బంది ఆధార్‌ వివరాలు ఉంటాయి. పార్ట్‌-ఏ లో సిబ్బంది వివరాలు ఉంటే పార్ట్‌-బీ లో పాఠశాల వివరాలు ఉంటాయి.
• జాబితాను పాఠశాల హెచ్‌ఎం తయారు చేయాలి. వాటిని ఎంఈవో లేదా కలెక్టర్‌ నియమించిన ఇతర అధికారి ధృవీకరిస్తారు.
• పాఠశాల వారీగా, మండలం వారీగా సేకరించిన వివరాలను డీఈవోకు సమర్పించాలి.
• గుర్తించబడని పాఠశాలల వివరాలు, సిబ్బంది సమాచారాన్ని కూడా సేకరించవచ్చు. అయితే వీరికి ఆర్థికసాయం చేసే అంశాన్ని ప్రభుత్వం తర్వాత తెలియజేస్తుంది.
• జీహెచ్‌ఎంసీ, మున్సిపల్‌ కార్పొరేషన్ల విషయంలో డేటా సేకరణ నిమిత్తం కమిషనర్‌, ఇతర సిబ్బంది సహాయాన్ని కలెక్టర్లు తీసుకోవచ్చు.
• ప్రతీ స్కూల్‌ దరఖాస్తులను ఎక్సెల్‌ షీట్‌లో సాఫ్ట్‌ అండ్‌ హార్డ్‌ కాపీల్లో సేకరించాలి. వీటిని కలెక్టర్‌ పాఠశాల విద్య డైరెక్టర్‌కు పంపాలి.
• హార్డ్‌ కాపీల ఫార్మాట్‌ను జతపరచాలి.

వివరాల సేకరణ, పరిశీలన, పంపిణీ తేదీల వారీగా ఈ విధంగా ఉన్నాయి.

పాఠశాలల నుండి డేటా సేకరణ : ఏప్రిల్‌ 10 నుండి 15 వరకు
జిల్లా స్థాయిలో డేటా పరిశీలన : ఏప్రిల్‌ 16
రాష్ట్ర స్థాయిలో డేటా సంకలనం : 17 నుండి 19 వరకు
మంజూరు, ఆన్‌లైన్‌ బదిలీ : 20 నుండి 24 వరకు
బియ్యం మంజూరు, పంపిణీ : 21 నుండి 25 వరకు.