అటెండెన్స్‌కు 10 మార్కులు

డిగ్రీ, పీజీ కోర్సుల్లో చేరితే ఇక నుంచి కచ్చితంగా తరగతులకు హాజరుకావాల్సిందే. 90 రోజుల కాలవ్యవధి సెమిస్టర్‌లోని అన్ని క్లాస్‌లకు హాజరైతే 10 మార్కులిస్తారు. అంతకన్నా తక్కువ క్లాసులకు హాజరైతే 9, 8 ఇలా విద్యార్థి వచ్చిన రోజులను బట్టి మార్కులేస్తారు. ఇప్పటివరకు పరీక్షలకు మార్కులేయగా తాజాగా హాజరుకు కూడా మార్కులు కేటాయిస్తూ తెలంగాణ ఉన్నత విద్యామండలి కీలక నిర్ణయం తీసుకొన్నది.

• ఒక్కో సెమిస్టర్‌లో 4 ఇంటర్నల్స్‌ ఎగ్జామ్స్‌
• 60 మార్కులకు సెమిస్టర్‌ పరీక్షలు
• మరో 40 మార్కులకు ఇంటర్నల్స్‌
• డిగ్రీ, పోస్ట్‌గ్రాడ్యుయేట్‌లో నిరంతర సమగ్ర మూల్యాంకనం
• ఐఎస్‌బీ సిఫారసుల మేరకు రోడ్‌మ్యాప్‌ ఖరారు
• అమలుకోసం వర్సిటీలకు ఉన్నతవిద్యామండలి లేఖలు

హైదరాబాద్‌, సెప్టెంబర్‌ 22 (నమస్తే తెలంగాణ) : డిగ్రీ, పీజీ కోర్సుల్లో చేరితే ఇక నుంచి కచ్చితంగా తరగతులకు హాజరుకావాల్సిందే. 90 రోజుల కాలవ్యవధి సెమిస్టర్‌లోని అన్ని క్లాస్‌లకు హాజరైతే 10 మార్కులిస్తారు. అంతకన్నా తక్కువ క్లాసులకు హాజరైతే 9, 8 ఇలా విద్యార్థి వచ్చిన రోజులను బట్టి మార్కులేస్తారు. ఇప్పటివరకు పరీక్షలకు మార్కులేయగా తాజాగా హాజరుకు కూడా మార్కులు కేటాయిస్తూ తెలంగాణ ఉన్నత విద్యామండలి కీలక నిర్ణయం తీసుకొన్నది.ఇండియన్‌ స్కూల్‌ ఆఫ్‌ బిజినెస్‌ (ఐఎస్‌బీ) సిఫారసులను పరిగణనలోకి తీసుకొని అటెండెన్స్‌కు 10 మార్కులు కేటాయిచింది. ఈ విద్యాసంవత్సరం నుంచి ఉన్నత విద్యలో నిరంతరం సమగ్ర మూల్యాంకనాన్ని అమలుచేయాలని నిర్ణయించిన నేపథ్యంలో ఇటీవలే ఉన్నత విద్యామండలి పరీక్షల విధానంలో సంస్కరణలపై రోడ్‌మ్యాప్‌ ఖరారు చేసింది. దీని అమలుకు రాష్ట్రంలోని సంప్రదాయ వర్సిటీలకు లేఖ రాసింది. తాము సూచించిన విధానంతోపాటు సొంతంగా సంస్కరణలను అమలుచేసుకొనే స్వేచ్ఛను వర్సిటీలకు ఇచ్చింది.

మార్గదర్శకాలిలా..

• ఒక సెమిస్టర్‌లో నాలుగు ఇంటర్నల్స్‌ ఉంటాయి. ఒక్కో ఇంటర్నల్‌కు 10శాతం వెయిటేజీ ఉంటుంది. సెమిస్టర్‌ ముగిసిన తర్వాత 10శాతం వెయిటేజీలో విద్యార్థి సాధించిన మార్కులను విద్యార్థులకు కేటాయిస్తారు. ఉదాహరణకు హాజరుశాతాన్ని తీసుకొంటే నాలుగు ఇంటర్నల్స్‌లో 40 మార్కులు కేటాయించి 5తో భాగించి, విద్యార్థి 100 శాతం తరగతులకు హాజరైతే 8 మార్కులు కేటాయిస్తారు.
• ఇలా 4 ఇంటర్నల్స్‌ పూర్తయ్యాక సెమినార్‌కు 8, అసైన్‌మెంట్లకు 8, ఇంటర్నల్‌ టెస్ట్‌కు 16 మార్కులుగా తీసుకుని.. మొత్తం 40 మార్కులకు విద్యార్థి ఎన్ని సాధిస్తే అన్ని మార్కులు కేటాయిస్తారు. అంటే ఒక్కో ఇంటర్నల్‌ను 50 మార్కులకు నిర్వహించిన వెయిటేజీ 10శాతంగా ఉంటుంది.
• నిపుణుల సూచనల మేరకు ప్రస్తుతానికి సెమిస్టర్‌ పరీక్షలను 60, ఇంటర్నల్స్‌ను 40మార్కులకు నిర్వహించాలని నిర్ణయం తీసుకున్నారు.