Visit:
తంగళ్లపల్లి, సెప్టెంబర్ 23 : ‘దళితులంటే కాంగ్రెస్ ప్రభుత్వానికి చిన్నచూపా? మా భూములు గుంజుకుంటరా? భూభారతి రికార్డుల్లో మా భూములు మాయం చేసిన్రు. రైతు భరోసా, యూరియా ఇస్తలేరు. మా భూములు గుంజుకుంటమని కాంగ్రెస్ నాయకులు బెదిరిస్తున్నరు’ అని ఆగ్రహం వ్యక్తంచేస్తూ రాజన్న సిరిసిల్ల జిల్లా తంగళ్లపల్లి మండలం జిల్లెల్ల దళిత రైతులు రోడ్డెక్కారు. బుధవారం గ్రామంలోని సిరిసిల్ల – సిద్దిపేట ప్రధాన రహదారిపై ధర్నా చేశారు.
బీఆర్ఎస్ హయాంలో తమకు 40 ఎకరాల భూములు కేటాయించారని, పట్టా ప్రొసీడింగ్స్ ఇచ్చి రైతుబంధు వేశారని తెలిపారు. కాంగ్రెస్ ప్రభుత్వం వచ్చాకే తమకు కష్టాలు మొదలయ్యాయని, భూము ల వివరాలు ఆన్లైన్లో మాయం చేశారని వాపోయారు. ‘మా సీఎం వస్తుండు.. మీ భూములు గుంజుకుంటం’ అంటూ స్థానిక కాంగ్రెస్ నేత బెదిరిస్తున్నారని, అధికారులను అడ్డం పెట్టుకుని పట్టాలు రద్దు చేయించే కుట్ర చేస్తున్నారని మండిపడ్డారు. తమ భూముల ను భూభారతిలో నమోదు చేయాలని, లేదం టే ఆందోళనలు చేస్తామని హెచ్చరించారు.
