చిన్నారులకూ సైబర్‌ వేధింపులు

• చైల్డ్‌ సైబర్‌ బుల్లియింగ్‌లో భారత్‌ టాప్‌
• ప్రతీ ముగ్గురిలో ఒకరు బాధితులే
• అందులో 30 శాతం లైగింక వేధింపులే
• మెకాఫే సర్వేలో సంచలన విషయాలు

హైదరాబాద్‌, ఆగస్టు 10 (నమస్తే తెలంగాణ): అమాయకత్వం.. ఏదయినా కొత్తదానిని నేర్చుకోవాలనే ఉత్సాహం.. ఆవేశం.. ఏదయినా చేయగలమనే అతి విశ్వాసం.. నలుగురులో ప్రత్యేక గుర్తింపు కోసం ఆరాటం.. ఇదీ నవయవ్వన జీవన విధానం. అయితే ఇదే ఇప్పుడు అనేక అనర్థాలకు దారితీస్తున్నది. సోషల్‌మీడియాలో బాలలు, టీనేజీ కుర్రకారును కేటుగాళ్లు వేధింపులు గురిచేస్తూ వారి జీవితాలతో చెలగాటం ఆడుతున్నారు. మనదేశంలో దాదాపు 85 శాతం మంది పిల్లలు సైబర్‌ బెదిరింపులకు గురవుతున్నారని, ఇది ప్రపంచంలోనే అత్యధికమని గ్లోబల్‌ కంప్యూటర్‌ సెక్యూరిటీ సంస్థ మెకాఫే కార్ప్‌ ఇటీవల విడుదల చేసిన సర్వేలో తెలిపింది.

సైబర్‌ బెదిరింపులకు సంబంధించి కొత్త పర్యవసాన ధోరణులను వెలికితీసేందుకు మెకాఫే కార్ప్‌, మార్కెట్‌ పరిశోధన సంస్థలు జూన్‌ 15 నుంచి జూలై 5 వరకు బ్రిటన్‌, అమెరికా, ఫ్రాన్స్‌, జర్మనీ, ఆస్ట్రేలియా, ఇండియా, కెనడా, జపాన్‌, బ్రెజిల్‌, మెక్సికో తదితర 10 దేశాల్లో 10-18 ఏండ్లలోపు పిల్లలున్న 11,687 మంది తల్లిదండ్రులను ఆన్‌లైన్‌ ద్వారా సర్వే చేశాయి. స్నాప్‌ చాట్‌, ఫేస్‌బుక్‌, ఇన్‌స్టాగ్రామ్‌ తదితర 14 సోషల్‌ మీడియా సంస్థలను పరిశోధించాయి. ఇలా సేకరించిన సమాచారంతో ‘సైబర్‌ బుల్లీయింగ్‌ ఇన్‌ ప్లెయిన్‌ సైట్‌’ పేరుతో మెకాఫే నివేదిక విడుదల చేసింది.

నివేదికలోని కీలక అంశాలు

• ప్రపంచవ్యాప్తంగా చిన్నారుల్లో సగటున 17 శాతం మంది అపరిచితుల నుంచి, 21 శాతం తెలిసినవారి నుంచి సైబర్‌ వేధింపులకు గురవుతున్నారు.
• మనదేశంలో మాత్రం 45 శాతానికిపైగా అపరిచితుల నుంచి సైబర్‌ బెదిరింపులకు గురవుతుండగా, 48% మంది పరిచితుల నుంచే బెదిరింపులకు గురవుతున్నారు.
• 10 ఏండ్లలోపు ప్రతి ముగ్గురిలో ఒకరు జా త్యాహంకారం, లైంగిక వేధింపులు, భౌతిక హాని బెదిరింపులకు గురవుతున్నారు.
• ఇతర దేశాలతో పోల్చితే భారతీయ చిన్నారులపై వేధింపులు 1.5 రెట్లు ఎక్కువ.
•  వేధింపులు తాళలేక సోషల్‌మీడియా అకౌంట్లను డిలీట్‌ చేస్తున్న చిన్నారులు 58 శాతం.
• వేధింపులకు గురవుతున్న 10-14 ఏండ్ల్ల వారు 32%. 14-18 ఏండ్ల వారు 34 %.
• వేధింపుల గురించి పిల్లలను ముందుగానే హెచ్చరిస్తున్న తల్లిదండ్రులు 48 శాతం.
• వేధింపుల విషయాన్ని స్నేహితులతో పంచుకొంటున్నవారు 87 శాతం.
• వేధింపుల విషయాన్ని తల్లిదండ్రుల వద్ద గోప్యంగా ఉంచుతున్నవారు 45 శాతం.