పిల్లల్లో కొవిడ్‌ టెన్షన్‌ వద్దు!

బడులు ప్రారంభమయ్యాయి. దేశంలో కొవిడ్‌ కేసులు కూడా పెరగటం మొదలయ్యాయి. దీంతో పిల్లలకు ఏమవుతుందోనని తల్లిదండ్రుల్లో ఆందోళన మొదలైంది.

• 12 ఏండ్లలోపు వారికి ప్రమాదం తక్కువే
• తల్లిదండ్రులకు ఐసీఎంఆర్‌ శాస్త్రవేత్తల భరోసా

హైదరాబాద్‌, జూలై 9 (నమస్తే తెలంగాణ): బడులు ప్రారంభమయ్యాయి. దేశంలో కొవిడ్‌ కేసులు కూడా పెరగటం మొదలయ్యాయి. దీంతో పిల్లలకు ఏమవుతుందోనని తల్లిదండ్రుల్లో ఆందోళన మొదలైంది. అయితే, మరీ అంతగా ఆందోళన చెందాల్సిన అవసరం లేదని ఇండియన్‌ కౌన్సిల్‌ ఆఫ్‌ మెడికల్‌ రిసెర్చ్‌(ఐసీఎంఆర్‌) శాస్త్రవేత్తలు భరోసా ఇస్తున్నారు. 12 ఏండ్లలోపు ఉన్న పిల్లలకు కొవిడ్‌ వచ్చే చాన్స్‌ చాలా తక్కువ అని తెలిపారు. ఐదేండ్లలోపు పిల్లల్లో అయితే ఊపిరితిత్తులు ఇన్ఫెక్షన్‌కు గురయ్యే అవకాశమే లేదని స్పష్టం చేస్తున్నారు. కాకపోతే పాఠశాలల్లో తగిన జాగ్రత్తలు తీసుకోవాలని సూచించారు.

సూచనలివీ

• పిల్లలకు తరగతి గదుల్లో కాకుండా ఓపెన్‌ ఎన్విరాన్‌మెంట్‌లో తరగతులు నిర్వహించేలా చూసుకోవాలి.
• సామాజిక దూరం పాటించడం, మాస్కులు ధరించడం అనేది నర్సరీ, ప్రైమరీ స్కూల్‌ పిల్లలకు కష్టమైన పని. అందుకే వారికి ఓపెన్‌ ఎన్విరాన్‌మెంట్‌లో వీలుకాకుంటే వెంటిలేషన్‌ ఉన్న తరగతి గదుల్లో ఉంచడం మంచిది. ఏసీ తరగతి గదులు ఎట్టిపరిస్థితుల్లోనూ మంచివి కావు.
• పాఠశాల ఉద్యోగులు, సిబ్బంది, 12 ఏండ్ల వయసు దాటిన పిల్లల్లో కొవిడ్‌ లక్షణాలు ఉన్నాయా? లేవా? అనేది ఎప్పటికప్పుడు తెలుసుకోవడం మంచిది. లక్షణాలున్న వారికి టెస్టు చేసి నిర్ధారించేలా ఏర్పాట్లు చేసుకోవాలి.
• ఉపాధ్యాయులు, ఉద్యోగులు ప్రికాషనరీ డోస్‌ వ్యాక్సినేషన్‌ తీసుకొనేలా యాజమాన్యాలు చర్యలు తీసుకోవాలి. పిల్లలను తీసుకొచ్చే బస్సు సిబ్బంది, డ్రైవర్లకు తప్పనిసరిగా వ్యాక్సినేషన్‌ చేయించాలి.