Gandhi Bhavan | కాంగ్రెస్‌ క్యాడర్ కొట్లాటలకు అడ్డాగా గాంధీభవన్‌.. ఎన్నిసార్లు దాడులు చేశారో తెలుసా.. ఇదిగో లిస్ట్‌!

Gandhi Bhavan | దేశంలోనే సుదీర్ఘ చరిత్ర ఉన్న పార్టీగా చెప్పుకుంటున్నా.. నియమాలు, నైతికత, సంస్కారాన్ని మర్చిపోవడం కాంగ్రెస్‌ పార్టీ నేతలకు వెన్నతో పెట్టిన విద్యగా మారింది. వారిలో వారు ఘర్షణలకు దిగడం, దాడులకు తెగబడటం, వర్గపోరుతో బహిరంగ వేదికలపైనే వాదులాడుకోవటం నిత్యకృత్యమైపోయింది.

Gandhi Bhavan | హైదరాబాద్‌, నవంబర్‌ 3 (నమస్తే తెలంగాణ): దేశంలోనే సుదీర్ఘ చరిత్ర ఉన్న పార్టీగా చెప్పుకుంటున్నా.. నియమాలు, నైతికత, సంస్కారాన్ని మర్చిపోవడం కాంగ్రెస్‌ పార్టీ నేతలకు వెన్నతో పెట్టిన విద్యగా మారింది. వారిలో వారు ఘర్షణలకు దిగడం, దాడులకు తెగబడటం, వర్గపోరుతో బహిరంగ వేదికలపైనే వాదులాడుకోవటం నిత్యకృత్యమైపోయింది. తమ పార్టీలో ఇదంతా అంతర్గత ప్రజాస్వామ్యం అని వారు ఎంత సర్దిచెప్పుకోవటానికి ప్రయత్నించినా.. సొంతపార్టీ కార్యాలయాలపై దాడులు, సొంత పార్టీ జెండాలనే తగలబెట్టుకోవటం చూసేవాళ్లకు ఏవగింపు కలిగిస్తున్నాయి. ప్రజా సమస్యలపై స్పందనలకంటే అంతర్గత ఘర్షణలతోనే ఆ పార్టీ మీడియాలో ప్రధానంగా కనిపిస్తున్నది.

గాంధీభవన్‌పై కాంగ్రెస్‌ క్యాడర్‌ దాడులు
కాంగ్రెస్‌ పార్టీ అంటేనే వర్గపోరుకు ఐకాన్‌గా చెప్పుకునే పరిస్థితి మొదటి నుంచి ఉన్నది. తెలంగాణ ఉద్యమం.. సమైక్య పాలకుల కాలంలోనూ పార్టీ ప్రధాన కార్యాలయం గాంధీభవన్‌ అరుపులు, పెడబొబ్బలు, దాడులు, ఘర్షణలతో అట్టుడికేది. ఉదాహరణకు కొన్ని ఘటనలు..

• 2014 సెప్టెంబర్‌ 1 నాడు ఏఐసీసీ కార్యదర్శి ఆర్‌సీ కుంతియా, అప్పటి పీసీసీ అధ్యక్షుడి సమక్షంలోనే ఖమ్మం జిల్లా నేతలైన రేణుకాచౌదరి, ఆర్‌ వెంకట్‌రెడ్డి, పొంగులేటి సుధాకర్‌రెడ్డి వర్గాలు పరస్పరం దాడులకు దిగాయి. అదేరోజు దుబ్బాకలో జరిగిన కాంగ్రెస్‌ పార్టీ సమావేశం (మెదక్‌ లోక్‌సభ ఉప ఎన్నికలు) సందర్భంగా ఫ్లెక్సీలో ఎమ్మెల్సీ ఫారూఖ్‌ హుస్సేన్‌ ఫొటో లేకపోవడంతో ఆయనకు, జానారెడ్డికి మధ్యన తీవ్ర వాగ్వాదం జరిగింది. ఇదే సమయంలో సమావేశం హాలు బయట ఇరు వర్గాలు పరస్పరం దూషించుకోవడంతో గందరగోళం ఏర్పడింది. ఆపై అప్పటి మాజీ ఎమ్మెల్యే ముత్యంరెడ్డి, సంజీవరెడ్డి మధ్య తోపులాట జరిగింది.
• 2019 ఫిబ్రవరి 2 నాడు కాంగ్రెస్‌ నేతల ఆధిపత్య పోరుకు గాంధీభవన్‌ వేదికగా మారింది. ఓబీసీ సెల్‌ అధ్యక్షుడు శ్రీకాంత్‌గౌడ్‌ ఆధ్వర్యంలో సీఎల్పీ నేత భట్టి విక్రమార్కకు సన్మాన కార్యక్రమంలో శ్రీకాంత్‌గౌడ్‌, వీ హన్మంతరావు బూతులు తిట్టుకున్నారు. దీంతో ఇరు వర్గాల మధ్య పిడిగుద్దులు, తోపులాటలు తప్పలేదు. శ్రీకాంత్‌ అనుచరులు వీహెచ్‌పై దాడి చేశారు.
• 2014 ఏప్రిల్‌ 2 నాడు ఎన్నికల్లో టికెట్లకు సంబంధించి పలు నియోజకవర్గాల నేతలు, కార్యకర్తలు గాంధీభవన్‌ ముందు ధర్నా నిర్వహించారు. అసంతృప్తులు దాడి చేస్తారనే భయంతో గాంధీభవన్‌లో సుమారు పది మంది బౌన్సర్లతో భద్రత ఏర్పాటు చేయాల్సిన పరిస్థితి నెలకొన్నది. మైనారిటీలకు తగిన ప్రాతినిధ్యం ఇవ్వలేదని మైనారిటీ విభాగం అధ్యక్షుడు సిరాజుద్దీన్‌ ఆధ్వర్యంలో కార్యకర్తలు గాంధీభవన్‌లోకి చొచ్చుకెళ్లి పీసీసీ అధ్యక్షుడి కార్యాలయం ముందే ధర్నాకు దిగారు.
• 2019 మార్చి 4న గాంధీభవన్‌ ముందు ధర్నాలు, రాస్తారోకోలు షురా మామూలయ్యాయి. నాగర్‌కర్నూల్‌ లోక్‌సభ టికెట్టు ఆశించిన సతీశ్‌మాదిగ, మాజీ ఎమ్మెల్యే సంపత్‌ వర్గీయులు గాంధీభవన్‌లో హంగామా సృష్టించారు.
• 2018, నవంబర్‌ 4న అసెంబ్లీ ఎన్నికల సందర్భంగా మహాకూటమిగా ఏర్పడకముందే సీట్ల కోసం నాయకులు జుట్లు పట్టుకుని దాడులకు దిగారు. శేరిలింగంపల్లి టికెట్‌ ఆశించిన నాయకుల అనుచరులు పరస్పరం రాళ్లదాడులు చేసుకొన్నారు. మరో నేత అనుచరులు గాంధీభవన్‌ ఎదుట ఒంటిపై కిరోసిన్‌ పోసుకుని ఆత్మహత్యకు ప్రయత్నించగా.. మరో అనుచరుడు బ్లేడ్‌తో చేతిని కోసుకుని నిరసన తెలిపాడు.
• 2019, నవంబర్‌ 5న సీనియర్‌ నేత గులాంనబీ ఆజాద్‌ సమక్షంలో గాంధీభవన్‌లో వీ హనుమంతరావు, షబ్బీర్‌ అలీ పరస్పరం పరుష పదజాలంతో తిట్టుకున్నారు. అదే సమయంలో పీసీసీ పదవి కోమటిరెడ్డి వెంకట్‌రెడ్డికి ఇవ్వాలంటూ ఆయన అనుచరులు నినాదాలు చేస్తుండగా.. కొందరు ఉత్తమ్‌కుమార్‌రెడ్డికి వ్యతిరేకంగా నినాదాలు చేస్తూ.. ఆజాద్‌ ఎదుట బైఠాయించారు.
• 2018 ఎన్నికల్లో కాంగ్రెస్‌ సారధ్యంలో మహాకూటమిగా ఏర్పడిన పార్టీల నేతలు, కార్యకర్తల దాడులు, ప్రతిదాడులు, నిరసనలు, ఘర్షణలతో గాంధీభవన్‌ దద్దరిల్లింది. 9.11.2018 నాడు ఇలా ఆందోళన చేసేవారిని అడ్డుకునేందుకు ఏకంగా గాంధీభవన్‌కే తాళం వేయాల్సి వచ్చింది. కొందరు కార్యకర్తలు పెట్రోల్‌ పోసుకుని ఆత్మాహుతికి ప్రయత్నించడంతో తీవ్ర ఉద్రిక్తత ఏర్పడింది. ఉప్పల్‌, నకిరేకల్‌, మల్కాజిగిరి, ఖానాపూర్‌ తదితర నియోజకవర్గాల నుంచి వచ్చిన కాంగ్రెస్‌ శ్రేణులు ధర్నాలు, మౌన ప్రదర్శనలు, అర్ధనగ్న ప్రదర్శనలు, నిరాహార దీక్షలకు దిగారు.
• 12.3.2014 నాడు గాంధీభవన్‌లో ఏఐసీసీ నేత, పీసీసీ అధ్యక్షుడి సమక్షంలోనే నేతలు, కార్యకర్తలు బాహాబాహీకి దిగారు. కుర్చీలతో కొట్టుకున్నారు. కుర్చీలు విసురుకోవడంతో మీడియా హాలు తలుపుల అద్దాలు పగిలాయి.
• 22.12.2022 నాడు గాంధీభవన్‌ రణరంగంగా మారింది. అధిష్ఠానం దూత దిగ్విజయ్‌ సింగ్‌ ఎదుటనే నేతలు అరుపులు, నినాదాలు, ధర్నాలతోరచ్చ రచ్చ చేశారు. పలువురు నేతలు గల్లాలు పట్టుకుని దాడులకు దిగారు.
  తాజాగా ఎన్నికలకు నోటిఫికేషన్‌ రాకముందే గాంధీభవన్‌లో ధర్నాలు, నిరసనలు, ఘర్షణలు, నినాదాలు, పిడిగుద్దులు రోజురోజుకూ పెరుగుతున్నాయి. టిక్కెట్లు రానివారు, అసంతృప్త నేతలు గాంధీభవన్‌పై దండెత్తి ఆగ్రహాన్ని వెళ్లగక్కుతున్నారు.

మొదటి నుంచి అదే ధోరణి
కాంగ్రెస్‌ రక్తంలోనే ఇలాంటి ఘర్షణపూరిత లక్షణాలు ఉన్నాయని ఆ పార్టీ చరిత్ర తెలుసుకొంటే అర్థమవుతుంది. మొదట్లో భౌతిక దాడుల సంస్కృతి లేకున్నా.. రానురాను ఇలాంటి సంస్కృతికి కాంగ్రెస్‌ నేతలు, వారిని వెన్నంటి ఉండే కార్యకర్తలు అలవాటు చేసుకొన్నారు. పార్టీ విలువలకు కట్టుబడి ఉన్నవారికి కాకుండా.. రౌడీయిజం, దౌర్జన్యం, డబ్బులకు అమ్ముడుపోవడం, టిక్కెట్లు అమ్ముకొనేవారికి ప్రాధాన్యం ఇవ్వడంతో అందరూ అదేబాట పట్టారని రాజకీయ విశ్లేషకులు చెప్తున్నారు. పార్టీ అంతర్గత సమావేశాలైనా, ఇతరత్రా భేటీలైనా వర్గపోరు లేకుండా నిర్వహించడం ఎన్నడూ చూడలేదని కాంగ్రెస్‌ నేతలే వాపోతున్నారు. ఎన్నికల సమయంలో టికెట్లు అమ్ముకోవటం సాధారణ విషయంగా మారిందని చెప్తున్నారు. అందువల్లనే అసంతృప్తి పెరిగి ఘర్షణలు జరుగుతున్నాయని అంటున్నారు.