Congress-BJP | కాంగ్రెస్‌, బీజేపీ దోస్త్‌ మేరా దోస్త్‌?.. లోపల ఆలింగనాలు బయట నట యుద్ధాలు

‘లోపల ఆలింగనాలు.. బయట ‘నట’యుద్ధాలు అన్నట్టుగా కాంగ్రెస్‌, బీజేపీ వైఖరి బయపడింది. ‘కుండ పగిలితే పగిలింది. కానీ, కుక్క సంగతి తెలిసింది’ అనే రీతిలో రెండు పార్టీలు భవిష్యత్తులో రాష్ర్టాన్ని మోసగించే విషయంలో పోటీ పడ్డాయనే విషయం ప్రచారంలో తేటతెల్లమైందని సామాజిక పరిశీలకులు విశ్లేషిస్తున్నారు.

• ఇదీ జాతీయ పార్టీల అసలు రూపం
• రక్తికట్టించిన ఢిల్లీ స్క్రిప్టులు
• తెలంగాణపై బయటపడ్డ కాంగ్రెస్‌, బీజేపీ వైఖరి

Congress-BJP | హైదరాబాద్‌, మే 11 (నమస్తే తెలంగాణ): ‘లోపల ఆలింగనాలు.. బయట ‘నట’యుద్ధాలు అన్నట్టుగా కాంగ్రెస్‌, బీజేపీ వైఖరి బయపడింది. ‘కుండ పగిలితే పగిలింది. కానీ, కుక్క సంగతి తెలిసింది’ అనే రీతిలో రెండు పార్టీలు భవిష్యత్తులో రాష్ర్టాన్ని మోసగించే విషయంలో పోటీ పడ్డాయనే విషయం ప్రచారంలో తేటతెల్లమైందని సామాజిక పరిశీలకులు విశ్లేషిస్తున్నారు. ఈ ప్రచారం సందర్భంగానైనా తెలంగాణ సమాజానికి పాలు ఏవో.. నీళ్లు ఏవో.. నిజమేదో..అబద్ధమేదో.. ఎవరిని నమ్మాలో.. ఎవరిని నమ్మకూడదో తెలిసిపోయిందని ఉదహరిస్తున్నారు.

రాష్ట్రంలో అధికారంలో ఉన్న కాంగ్రెస్‌ పార్టీ, కేంద్రంలో రెండుసార్లు అధికారాన్ని చేపట్టి ‘అబ్‌కీ బార్‌ చార్‌సౌ పార్‌’ అనే నినాదంతో మూడోసారి అధికారం కోసం ముందుకొచ్చిన బీజేపీ.. ఈ రెండు జాతీయ పార్టీలు తెలంగాణను భవిష్యత్తులో ఏం చేయబోతున్నాయోనని అనుమానాలు కలుగుతున్నాయని రాజకీయ విశ్లేషకులు ఆందోళన వ్యక్తం చేస్తున్నారు. కేంద్రంలో అధికారంలోకి రావటమే పరమావధిగా ఆ పార్టీలు పోటాపోటీగా ప్రజలను మభ్యపెట్టాయని, తెలంగాణ అస్తిత్వ ఆరాటాలను, ఆత్మగౌరవ ఆకాంక్షలను పట్టించుకోలేదని వాటి కార్యాచరణ ద్వారా నిరూపించాయని విశ్లేషించారు. భవిష్యత్తుల్లో ఆ రెండు పార్టీలతో తెలంగాణ ప్రయోజనాలకు భారీ ముప్పు వాటిల్లబోతున్నదని వాటి కార్యాచరణనే బహిరంగంగా తేల్చిచెప్పాయని, తెలంగాణ సమాజం ఇప్పుడెలా రియాక్ట్‌ అవుతుందన్నదే ఆసక్తిగా మారిందన్నారు.

కీలక అంశాలపై పీటముడి
ఎన్నికల ప్రచారం సందర్భంగా పలు కీలక అంశాలు తెరమీదికి వచ్చాయి. బీఆర్‌ఎస్‌ లేవనెత్తిన అనేక అంశాలపై కాంగ్రెస్‌, బీజేపీ దాటవేత ధోరణినే అనుసరించాయి. తెలంగాణ విషయంలో రెండు జాతీయ పార్టీల వైఖరి ఒక్కటేనని సామాజికవేత్త తేల్చిచెప్పారు. ఆయా అంశాల్లో ఆయన విశ్లేషణ ఇలా ఉంది..

• ఇచ్చంపల్లి విషయంలో: గోదావరి నీటిని ఇచ్చంపల్లి ప్రాజెక్టు నిర్మించి తమిళనాడుకు తరలిస్తామని బాహాటంగా బీజేపీ ప్రచారం చేసింది. దీనిపై కాంగ్రెస్‌ అగ్రనాయకులు రాహుల్‌గాంధీ, ప్రియాంకగాంధీ స్పందించటం లేదంటే అర్థం ఉంది కానీ తెలంగాణ రాష్ట్ర ప్రజల ఓట్లతో అధికార పీఠం ఎక్కిన ముఖ్యమంత్రి రేవంత్‌రెడ్డి, ఆయన మంత్రివర్గ సహచరులెవ్వరూ స్పందించకపోవటం అనుమానాలకు తావిస్తున్నది.
• హైదరాబాద్‌ను కేంద్రపాలిత ప్రాంతం చేస్తామని ఒక జాతీయ పార్టీ అంటే.. హైదరాబాద్‌ దేశానికి రెండో రాజధాని చేస్తే తమకు సమ్మతమని మరో జాతీయ పార్టీ పేర్కొన్నది. హైదరాబాద్‌ , తెలంగాణ ప్రయోజనాలను పాతర వేయటంలో రెండు పార్టీల వైఖరి ఒక్కటే.
• కాంగ్రెస్‌, బీజేపీ లోపాయికారి ఒప్పందం: ఆ రెండు పార్టీలు లోపాయికారి ఒప్పందం కుదుర్చుకున్నాయని అభ్యర్థుల ఎంపిక, నియోజకవర్గాల్లో అగ్రనేతల ప్రచార కార్యాచరణ. ఎన్నికల షెడ్యూల్‌ కన్నా ముందే రెండు పార్టీలు బీఆర్‌ఎస్‌ సిట్టింగ్‌ ఎంపీలను తమ పార్టీల్లో చేర్చుకొని టికెట్లివ్వటం.
• ఆర్‌ఆర్‌ ట్యాక్స్‌: సాక్షాత్తు ప్రధాని మోదీ, హోం మంత్రి అమిత్‌షా కేంద్ర మంత్రులు, బీజేపీ సమస్త పరివారం ఆర్‌ఆర్‌ ట్యాక్స్‌ అని బాహాటంగా ఆరోపించినా సీఎం రేవంత్‌రెడ్డి మాట వరుసకైనా దానిపై స్పందించకపోవటం.
• ఎన్నికల తరువాత సీఎం రేవంత్‌రెడ్డి బీజేపీలో చేరతారని ఓ సిట్టింగ్‌ ఎంపీ బహిరంగ ప్రకటన చేసినా వాటిపై రేవంత్‌ స్పందించకపోవటం.
• జిల్లాల పునర్విభజన: జిల్లాల పునర్విభజన చేస్తామని కాంగ్రెస్‌ పార్టీ పేర్కొంటే… బీజేపీ దానికి వంతపాట.
• ఒకటే మాట..ఒకటే బాణం: తెలంగాణ హక్కులను ఎత్తగొట్టడంలో కాంగ్రెస్‌, బీజేపీది ఒకటే మాట… ఒకటే బాణం. ఇన్నాళ్లు అధికారంలో ఉండి కారణాంతరాల వల్ల విభజన హామీలను నెరవేర్చలేకపోయాం. మరోసారి అధికారంలోకి వస్తే నెవవేరుస్తామని బీజేపీ అనకపోగా.. ఆ పార్టీ ఎంపీ అభ్యర్థి ఓ టీవీ ఛానెల్‌ ఇంటర్వ్యూలో విభజన సమయంలో హామీలు ఇచ్చింది కాంగ్రెస్‌ మేం కాదు’ అని పేర్కొంటే.. కాంగ్రెస్‌ అభ్యర్థి స్పందించడు. అధికారంలోకి వస్తే నెరవేరుస్తామనే భరోసా ఇవ్వదు.
• రాష్ట్రంలోని ఒక్క ప్రాజెక్టుకైనా జాతీయ హోదా ఇస్తామని రెండు పార్టీలు హామీ ఇవ్వవు. ఇలా మొత్తంగా పార్లమెంట్‌ ఎన్నికల సందర్భంగా రెండు జాతీయ పార్టీలు తెలంగాణపై విషం చిమ్మటమే పనిగా పెట్టుకొని, భవిష్యత్తు చిత్రాన్ని ఆవిష్కరించాయని ఈ తరుణంలో తెలంగాణ అప్రమత్తంగా వ్యవహరించాలని ఆ సామాజికవేత్త సూచించారు.