Visit:
నమస్తే తెలంగాణ నెట్‌వర్క్‌, నవంబర్‌ 30 : పంచాయతీ ఎన్నికల వేళ బీఆర్‌ఎస్‌ పార్టీలో చేరికలు జోరుగా సాగుతున్నాయి. రంగారెడ్డి జిల్లా కడ్తాల్‌ మండలం ముద్విన్‌ గ్రామంలోని బీజేపీకి చెందిన 60 మంది నాయకులు, కార్యకర్తలతోపాటు బీఎస్పీ మండల నాయకుడు మహేశ్‌ తదితరులు మాజీ ఎమ్మెల్యే జైపాల్‌యాదవ్‌ సమక్షంలో బీఆర్‌ఎస్‌లో చేరారు. ఆదివారం హైదరాబాద్‌లోని తన నివాసంలో మాజీ మంత్రి హరీశ్‌రావు వీరికి గులాబీ కండువాలు కప్పి పార్టీలోకి స్వాగతించారు. సూర్యాపేట జిల్లా హుజూర్‌నగర్‌ నియోజకవర్గ పరిధిలోని మఠంపల్లి మండల హనుమంతులగూడెం, కామంచికుంట తండా గ్రామాలకు చెందిన మాజీ ఎంపీటీసీ బొమ్మకంటి నరసింహరావు, బదావత్‌ రాంబాబుతోపాటు ఆయా గ్రామాలకు చెందిన పలువురు కాంగ్రెస్‌ నాయకులు, తుంగతుర్తి నియోజకవర్గం అర్వపల్లి మండలం తిమ్మాపురం గ్రామానికి చెందిన పలువురు కాంగ్రెస్‌ సీనియర్‌ నాయకులు పెద్దిరెడ్డి గోవర్ధన్‌రెడ్డి, బొల్లం వెంకన్న యాదవ్‌, చామకూరి మహేశ్‌గౌడ్‌ బీఆర్‌ఎస్‌లో చేరారు.
వీరికి సూర్యాపేటలో మాజీ మంత్రి, ఎమ్మెల్యే జగదీశ్‌రెడ్డి గులాబీ కండువాలు కప్పి పార్టీలోకి ఆహ్వానించారు. కుమ్రంభీం ఆసిఫాబాద్‌ జిల్లా కాగజ్‌నగర్‌లో పట్టణంలో సిర్పూర్‌(టీ) మండల మాజీ ఎంపీపీ మాలతి-మనోహర్‌ ఆదివారం బీఆర్‌ఎస్‌ పార్టీలో చేరారు. పార్టీ రాష్ట్ర ప్రధాన కార్యదర్శి ఆర్‌ఎస్‌ ప్రవీణ్‌కుమార్‌ గులాబీ కండువా కప్పి ఆమెను పార్టీలోకి ఆహ్వానించారు. మహబూబాబాద్‌ జిల్లా పెద్దవంగర మండలం రెడ్డికుంటతండా పరిధిలోని సర్పంచ్‌తండాకు చెందిన తొర్రూరు మాజీ జడ్పీటీసీ జాటోత్‌ కమలాకర్‌ ఇటీవల కాంగ్రెస్‌ పార్టీలో చేరారు. మళ్లీ ఆయన ఆదివారం మాజీ మంత్రి ఎర్రబెల్లి దయాకర్‌రావు సమక్షంలో తిరిగి సొంతగూటికి చేరారు. జగిత్యాల జిల్లా బుగ్గారం మండలానికి చెందిన బీజేపీ సీనియర్‌ నాయకులు పోలంపల్లి మల్లేశం, భారతపు గంగాధర్‌ ఆదివారం జగిత్యాల జిల్లా కేంద్రంలో మాజీ మంత్రి కొప్పుల ఈశ్వర్‌ సమక్షంలో గులాబీ కండువాలు కప్పుకొన్నారు. భద్రాద్రి కొత్తగూడెం జిల్లా అశ్వారావుపేట మండలం అనంతారం గ్రామంలో వివిధ పార్టీలకు చెందిన బానోత్‌ రత్నకిశోర్‌, నునావత్‌ అనూషదేవి, బానోత్‌ రాము, మిటియా, కాకా వెంకటేశ్‌, పాయం శేఖర్‌, ప్రసాద్‌, మూర్తితో 30 కుటుంబాల వారు బీఆర్‌ఎస్‌లో చేరగా మాజీ ఎమ్మెల్యే మెచ్చా నాగేశ్వరరావు గులాబీ కండువాలు కప్పి వారిని పార్టీలోకి ఆహ్వానించారు.
