వీఆర్‌ఏల సమగ్ర వివరాల సేకరణ

వీఆర్‌ఏల క్రమబద్ధీకరణ దిశగా ప్రభుత్వం వేగంగా అడుగులు వేస్తున్నది. సీసీఎల్‌ఏ ఓ వైపు వీఆర్‌ఏల సంఘాలతో నిరంతరం సంప్రదింపులు జరుపుతున్నారు. మరోవైపు రాష్ట్రవ్యాప్తంగా ఉన్న వీఆర్‌ఏల వివరాలను సమగ్రంగా సేకరించాలని నిర్ణయించారు. ఈ మేరకు జిల్లాలకు 47 కాలమ్స్‌తో కూడిన కొత్త ఫార్మాట్‌ను పంపించారు.

May 23, 2023 / 02:29 AM IST

47 కాలమ్స్‌తో కొత్త ఫార్మాట్‌
కొత్త నియామకాలు వద్దని సీసీఎల్‌ఏ ఆదేశం

హైదరాబాద్‌, మే 22 (నమస్తే తెలంగాణ): వీఆర్‌ఏల క్రమబద్ధీకరణ దిశగా ప్రభుత్వం వేగంగా అడుగులు వేస్తున్నది. సీసీఎల్‌ఏ ఓ వైపు వీఆర్‌ఏల సంఘాలతో నిరంతరం సంప్రదింపులు జరుపుతున్నారు. మరోవైపు రాష్ట్రవ్యాప్తంగా ఉన్న వీఆర్‌ఏల వివరాలను సమగ్రంగా సేకరించాలని నిర్ణయించారు. ఈ మేరకు జిల్లాలకు 47 కాలమ్స్‌తో కూడిన కొత్త ఫార్మాట్‌ను పంపించారు. ఉద్యోగంలో చేరిన రకం, కులం, వయస్సు, విద్యార్హతలవారీగా వివరాలను సేకరిస్తున్నారు. వీటిని మూడు రోజుల్లోగా సేకరించి పంపించాలని అన్ని జిల్లాల కలెక్టర్లను సీసీఎల్‌ఏ ఆదేశించారు.

కులాలవారీ గణనలో భాగంగా జిల్లాకు ఎన్ని పోస్టులు మంజూరయ్యాయి? అం దులో ఎంతమంది నియమితులయ్యారు? ఖాళీలు ఎన్ని ఉన్నాయి? పనిచేస్తున్నవారి లో ఎస్సీ, ఎస్టీ, బీసీ, ముస్లిం మైనార్టీ, క్రిస్టియన్‌ మైనార్టీ, ఓసీలు ఎంతమంది ఉన్నా రు? అనే వివరాలను సేకరించనున్నారు.
వయసు మొత్తం 12 వర్గాలుగా విభజించారు. 17 ఏండ్లు మొదలు కొని, వందేండ్లకు పైబడినవారి వివరాల వరకు సేకరించనున్నారు.
విద్యార్హతలకు సంబంధించి.. నిరక్ష్యరాస్యులు, 6వ తరగతి వరకు చదివినవారు. 7-9, 10వ తరగతి, ఇంటర్‌, డిగ్రీ, బీటెక్‌, పీజీ చేసిన వారి వివరాలను వేర్వేరుగా సేకరిస్తారు.
నియామకానికి సంబంధించి.. డైరెక్ట్‌ రిక్రూట్‌మెంట్‌, వారసత్వం, కారుణ్య నియామకం, 2011కు ముందు నియమితులైనవారు, 2011 తర్వాత నియమితులైన వారు, ఒప్పంద ప్రాతిపదికన పనిచేస్తున్నవారు, నిషేధిత కాలంలో చేరినవారు, విధులకు దూరంగా ఉన్నవారు, సస్పెండ్‌ అయినవారు, క్రమరహిత అపాయింట్‌మెంట్‌లాంటి వివరాలన్నీ వేర్వేరుగా సేకరించనున్నారు.
వీఆర్‌ఏల క్రమబద్ధీకరణ నేపథ్యంలో.. ప్రస్తుతం ఖాళీగా ఉన్న పోస్టుల్లో ఎవరినీ చేర్చవద్దని, నియామకాలను నిలిపివేయాలని అన్ని మండలాల తాసిల్దార్లకు సీసీఎల్‌ఏ ఆదేశాలు జారీ చేశారు.