CM Revanth Reddy | అధునాత‌న సాంకేతిక కేంద్రాలుగా ఐటీఐలు.. 1.30 గంటలకు ఏటీసీల‌కు సీఎం రేవంత్ శంకుస్థాప‌న‌

ఆధునిక ప‌రిశ్రమ‌ల అవ‌స‌రాల‌కు త‌గిన‌ట్లుగా యువ‌త‌ను తీర్చిదిద్దేందుకుగానూ ఐటీఐల‌ను (ITI) ఆధునిక సాంకేతిక కేంద్రాలుగా (ATC) మార్చాల‌ని ప్రభుత్వం నిర్ణయించింది.

హైద‌రాబాద్: ఆధునిక ప‌రిశ్రమ‌ల అవ‌స‌రాల‌కు త‌గిన‌ట్లుగా యువ‌త‌ను తీర్చిదిద్దేందుకుగానూ ఐటీఐల‌ను (ITI) ఆధునిక సాంకేతిక కేంద్రాలుగా (ATC) మార్చాల‌ని ప్రభుత్వం నిర్ణయించింది. ఇందుకోసం ఐటీఐల‌ను ఏటీసీలుగా తీర్చిదిద్దాల‌ని సీఎం రేవంత్ రెడ్డి (CM Revanth Reddy) నిర్ణయించారు. ఈ నేప‌థ్యంలో రాష్ట్రంలోని 65 ఐటీఐల‌ను ఏటీసీలుగా అప్ గ్రేడ్ చేసేందుకురాష్ట్ర ప్రభుత్వం టాటా టెక్నాల‌జీస్ లిమిటెడ్ (TTL‌)తో ప‌దేండ్లకుగానూ అవ‌గాహ‌న ఒప్పందం కుదుర్చుకుంది. మంగ‌ళ‌వారం మ‌ధ్యాహ్నం 1.30 గంట‌ల‌కు మ‌ల్లేప‌ల్లి ఐటీఐలో ఏటీసీల‌కు సీఎం రేవంత్ శంకుస్థాప‌న చేయ‌నున్నారు. ఐటీసీల‌కు సంబంధించిన ముఖ్య అంశాలు..

• 65 ఐటీఐల‌ను ఏటీసీలుగా అప్‌గ్రేడ్ చేస్తారు.
• ఆధునిక ప‌రిశ్రమ‌ల‌కు అవ‌స‌రాల‌కు అనుగుణంగా ఏటీసీల్లో యువ‌త‌కు శిక్షణ ఇస్తారు. ఇందుకోసం ఏటీసీల్లో అధునాత‌న సామ‌గ్రి, సాంకేతిక‌త ఏర్పాటు చేస్తారు.
• శిక్షణ ఇచ్చేందుకు 130 మంది నిపుణుల‌ను టీటీఎల్ నియ‌మిస్తుంది.
• ఏటీసీల్లో ఏటా 15,860 మందికి ఆరు ర‌కాల లాంగ్ ట‌ర్మ్‌ కోర్సుల్లో, 31,200 మందికి 23 ర‌కాల షార్ట్ ట‌ర్మ్‌ కోర్సుల్లో శిక్షణ అందిస్తారు.
• గ‌త ప‌దేండ్లలో రాష్ట్రంలోని ఐటీఐల్లో కేవ‌లం 1.5 ల‌క్షల మంది మాత్రమే శిక్షణ పొందారు. ఈ ఏటీసీల‌తో రానున్న ప‌దేండ్లలో 4 ల‌క్షల మంది శిక్షణ అందిచనున్నారు.
• ఐటీఐల‌ను ఏటీసీలుగా మార్చే ప్రాజెక్టు మొత్తం వ్యయం రూ.2,324.21 కోట్లు. ఇందులో రాష్ట్ర ప్రభుత్వం వాటా రూ.307.96 కోట్లు (13.26 శాతం) కాగా టీటీఎల్ వాటా రూ.2016.25 కోట్లు (86.74 శాతం)
• ఏటీసీలు కేవలం వివిధ కోర్సుల్లో శిక్ష‌ణకే ప‌రిమితం కాకుండా నైపుణ్యాభివృద్ధి కేంద్రాలుగా ప‌ని చేస్తాయి. అలాగే ఈ ఏటీసీలు ఔత్సాహిక పారిశ్రామికవేత్తలతో పాటు చిన్న‌, సూక్ష్మ‌, మ‌ధ్యత‌ర‌హా ప‌రిశ్రమ‌లు, భారీ ప‌రిశ్రమ‌ల‌కు టెక్నాల‌జీ హ‌బ్‌గా ప‌ని చేస్తాయి.
• ఏటీసీల్లో వివిధ కోర్సుల్లో శిక్షణ పొందిన వారికి టీటీఎల్ ఉద్యోగ అవ‌కాశాల‌ను క‌ల్పిస్తుంది.
• ఏటీసీలు భ‌విష్యత్తులో త‌మ సేవ‌ల‌ను పాలిటెక్నిక్‌, ఇంజినీరింగ్ విద్యార్థుల‌కు అంద‌జేస్తాయి.