బీఆర్‌ఎస్‌ను గెలిపించి.. ప్రజలు గెలిచారు

దేశంలో ఎక్కడ ఎన్నికలు జరిగినా పార్టీలు, నేతలు కాకుండా ప్రజలు గెలువాలన్నదే తమ అభిమతమని సీఎం కేసీఆర్‌ అన్నారు. తెలంగాణలో బీఆర్‌ఎస్‌ను గెలిపించి ప్రజలు గెలిచారని పేర్కొన్నారు.

హైదరాబాద్‌, ఫిబ్రవరి 12 (నమస్తే తెలంగాణ): దేశంలో ఎక్కడ ఎన్నికలు జరిగినా పార్టీలు, నేతలు కాకుండా ప్రజలు గెలువాలన్నదే తమ అభిమతమని సీఎం కేసీఆర్‌ అన్నారు. తెలంగాణలో బీఆర్‌ఎస్‌ను గెలిపించి ప్రజలు గెలిచారని పేర్కొన్నారు. తమ గెలుపు ఇందులోనే ఉన్నదని భావించిన ప్రజలు, బీఆర్‌ఎస్‌ను రెండోసారి గెలిపించారని తెలిపారు. అసెంబ్లీలో ద్రవ్య వినిమయ బిల్లుపై చర్చ సందర్భంగా సీఎం కేసీఆర్‌ మాట్లాడారు. బీఆర్‌ఎస్‌ పాలనలో రాష్ట్రంలో ప్రతి ఒక్కరికీ ప్రయోజనం కలిగిందని, ప్రజలంతా బాగుపడ్డారని తెలిపారు. సీఎం ప్రసంగంలోని ముఖ్యాంశాలు..

• అన్నమో రామచంద్ర అంటూ పదికి పరకకు తండ్లాడి నిరాదరణకు గురైన వృద్ధులు, వికలాంగులు, వితంతువులు, ఒంటరి మహిళలు, బీడీ కార్మికులు గెలిచారు.
• నాడు బిందెడు నీళ్ల కోసం వీధివీధి తిరుగుతూ భుజాలు అరిగిపోయేలా నీళ్లు మోసి, నేడు తమ ఇంట్లోనే నల్లా ద్వారా స్వచ్ఛమైన భగీరథ నీళ్లు పట్టుకొంటున్న ఆడబిడ్డలు గెలిచారు.
• ఎప్పుడొస్తదో తెల్వని చాలీచాలని కరెంటు, కాలిపోయే మోటర్లు, పేలిపోయే ట్రాన్స్‌ఫార్మర్లతో ఎకరం నాటేస్తే అద్దెకరం ఎండిపోయి అల్లాడిన రోజులు పోయి, నేడు దర్జాగా కాలుమీద కాలేసుకొని 24 గంటల కరెంటు పొందుతున్న మా రైతన్నలు గెలిచారు.
• పెన్షన్‌ రూ.200కు బదులుగా రూ.2016 తీసుకొని దర్జాగా బతుకుతున్న 45 లక్షల మంది పెన్షన్‌దారులు గెలిచారు.
• వలస పోవాల్సిన దుర్గతి లేకుండా వాపసు వచ్చి ఇతర రాష్ర్టాల నుంచి కూలీలను తెప్పించుకొని పచ్చని పంటలు పండిస్తున్న పాలమూరు బిడ్డలు గెలిచారు.
• బ్రోకర్ల అవసరం లేకుండా, దళారుల బాధ లేకుండా, వీఆర్వోల మాయజాలం లేకుండా ధరణి పోర్టల్‌ తెచ్చుకొని రికార్డులను డిజటలైజేషన్‌ చేసుకొని దర్జాగా గుండెపై చేయి వేసుకొని బతుకుతున్న తెలంగాణ రైతులు గెలిచారు.
• రోజుల తరబడి సబ్‌ రిజిస్ట్రార్‌ కార్యాలయాల దగ్గర పడిగాపులు కాయాల్సిన అవసరం లేకుండా, నెలల తరబడి తిరిగే పని లేకుండా కేవలం 15 రోజుల్లో ధరణి ద్వారా సులభంగా రిజిస్ట్రేషన్లు చేయించుకొని, వెంటనే పాస్‌బుక్‌లు పొందుతున్న తెలంగాణ బిడ్డలు గెలిచారు.
• కాంగ్రెస్‌ కాలంలో పైరవీకారులు, బ్రోకర్లు గెలిస్తే.. మా కాలంలో ప్రజలు గెలిచారు.
• స్వతంత్ర భారతంలో అణచివేతకు, వివక్షకు తప్ప ఆదరణకు నోచుకోని దళితవర్గ ప్రజలు, తెలంగాణలో తొట్టతొలి విజయాన్ని సాధించారు.
• నాడు ‘మా తండాలో మా రాజ్యం గావాలె, మా గూడెంలో మా రాజ్యం గావాలె’ అని ఆదివాసీ, గిరిజనులు ఎంత పోరాడినా సాకారం కాకపోతే బీఆర్‌ఎస్‌ ప్రభుత్వం 3,500 తండాలను గ్రామ పంచాయతీలుగా మార్చి వాళ్ల గ్రామాలను వాళ్లే పాలించుకునే విధంగా చేసినందుకు మా తెలంగాణ గిరిజన బిడ్డలు గెలిచారు.
• ధరణి తీసేస్తమని అంటున్నరు.. తీసేస్తే చాలా మంచిది.. మీకు పుణ్యముంటది తీసేయండి. మీ కాలంలో బ్రోకర్లు, పైరవీకార్లు గెలిచారు. రిజిస్ట్రేషన్‌ ఆఫీసుల వద్ద రోజుల తరబడి ఉండాలే. మళ్లీ మీ రాజ్యం వస్తే మళ్లీ అవే బాధలు వస్తయి.
• తెలంగాణలో జనాభా దామాషాకు అనుగుణంగా గతంలో విస్మరించబడి నేడు 10 శాతం రిజర్వేషన్లు పొందిన లక్షలమంది ఆదివాసీ, లంబాడా బిడ్డలు గెలిచారు.
• ఏ రాష్ట్రంలో లేనివిధంగా వెయ్యి రెసిడెన్షియల్‌ సూళ్లలో, జూనియర్‌ కాలేజీల్లో నాణ్యమైన విద్యను పొందుతూ, భవిష్యబీఆర్‌ఎస్‌ను గెలిపించి.. ప్రజలు గెలిచారు
• 2016 పెన్షన్‌ పొందుతున్న 45 లక్షల మంది గెలిచారు
• ఇంట్లోనే నల్లా నీళ్లు పడుతున్న ఆడబిడ్డలు గెలిచారు
• 24 గంటల కరెంటు పొందుతున్న రైతన్న గెలిచాడు
• దళితబంధుతో చరిత్రలో తొలిసారి దళితులు గెలిచారు
• శాసనసభలో ముఖ్యమంత్రి కే చంద్రశేఖర్‌రావు త్తుకు బంగారు బాటలు వేసుకొంటున్న ఐదు లక్షల మంది విద్యార్థులు, వారి తల్లిదండ్రులు గెలిచారు.
• జ్యోతిబా పూలే, అంబేదర్‌ ఓవర్సీస్‌ స్కాలర్‌షిప్‌ ద్వారా రూ.20 లక్షల సాలర్‌షిప్‌లు పొంది విదేశాల్లో ఉన్నత విద్య అభ్యసిస్తున్న వేలమంది తెలంగాణ బిడ్డలు గెలిచారు.
• ఒకప్పుడు నీళ్లచారు, పురుగుల అన్న దుర్భర పరిస్థితులు పోయి, నేడు సన్నబియ్యం తింటున్న లక్షల మంది విద్యార్థులు గెలిచారు.
• చేతినిండా పనిలేక రోజుకు పదిమంది చొప్పున పోచంపల్లి, గద్వాల, సిరిసిల్ల, దుబ్బాక, సిద్దిపేట ప్రాంతాల చేనేత కార్మికులు ఆత్మహత్యలు చేసుకొన్నారు. నేడు ఆ దుస్థితి నుంచి బయటపడి బతుకమ్మ చీరల రూపంలో, ఇతర రూపాల్లో ఉపాధి పొందుతూ, ఆదాయంతోపాటు బీమా పొందుతున్న చేనేత కార్మికులు గెలిచారు.
• చెట్ల రఖం బకాయిలే కాకుండా, చెట్ల పన్నును రద్దు చేసుకొని, వైన్‌, బార్‌ షాపుల్లో 15 శాతం లైసెన్సులు పొందిన తెలంగాణ గౌడన్నలు గెలిచారు.
• లక్షలాది గొర్రెల పంపిణీతో లాభం పొంది, నేడు దేశంలోకెల్లా అత్యధిక సంఖ్యలో గొర్రెలను కలిగిన గొల్ల కురుమలు, యాదవ బిడ్డలు గెలిచారు.
• మంత్రి శ్రీనివాస్‌ యాదవ్‌ నాయకత్వంలో ప్రతి సంవత్సరం కోట్ల చేప పిల్లల్ని పంపిణీ చేయగా, వాటి ద్వారా రూ.కోట్ల ఆదాయాన్ని సంపాదిస్తున్న మత్స్యకారులు గెలిచారు.
• బీఆర్‌ఎస్‌ ప్రభుత్వం తెచ్చిన కల్యాణలక్ష్మి పథకం ద్వారా సాయం పొందిన 12 లక్షల మంది ఆడపిల్లల తల్లిదండ్రులు గెలిచారు.
• రైతుబంధు, రైతుబీమా అందుకొంటూ పంజాబ్‌ను తలదన్నే పంటలు పండించే స్థాయికి ఎదిగిన 70 లక్షల మంది తెలంగాణ రైతన్నలు గెలిచారు.
• 
• ఈ దేశంలో దేవున్ని కొలిచివాళ్లకు ఆదరణ లేదు. కొందరు నోరు తెరిస్తే జైశ్రీరాం అంటారు. కానీ మనసులో మాత్రం ఆ భావం ఉండదు. దేశంలో ఎక్కడా లేనివిధంగా మనవద్ద అర్చకులు కూడా నెలవారీగా, ప్రభుత్వ ఉద్యోగాలు మాదిరిగా జీతాలు పొందుతున్నారు. పురోహితులు గెలిచి మనసునిండా మాకు ఆశీర్వచనం ఇస్తున్నారు. నెలనెలా వేతనాలు పొందుతూ అర్చకులు గెలిచారు.
• కొత్తగా రాష్ట్రపతి ఉత్తర్వులు సాధించుకొని, 95 శాతం స్థానికులకే రిజర్వేషన్‌ సాధించుకొని, 2.40 లక్షలకు పైగా ఉద్యోగాలు సాధించిన తెలంగాణ యువకులు గెలిచారు.
• గతంలో రాష్ట్రంలో కవులకు, కళాకారులకు ఆదరణ లేదు. కాళోజీ, దాశరథి పేరిట అవార్డులను అందుకొంటూ కవులు, కళాకారులు గెలిచారు.
• టీఎస్‌ఐపాస్‌, బీపాస్‌తో సులభంగా అనుమతులు పొందతున్న పారిశ్రామికవేత్తలు, బిల్డర్లు, కార్మికులు గెలిచారు.
• 30 శాతం వాటాను లాభాల్లో పొందుతూ, ప్రైవేటీకరణ బారి నుంచి కాపాడుకొంటున్న సింగరేణి బిడ్డలు గెలిచారు.
• ప్రతి గ్రామంలో ఒక పార్కు, క్రీడాప్రాంగణం, వైకుంఠధామం, డంప్‌యార్డ్‌, ట్రాక్టర్‌, చెత్త సేకరణ విధానం, ప్రతి ఇంటిలో పరిశుద్ధమైన మంచినీరు, పచ్చని చెట్లతో అలరారుతూ దేశంలో ఎక్కడాలేని ప్రగతిని సాధించిన తెలంగాణ పల్లె ప్రజలు బీఆర్‌ఎస్‌ గెలుపులో భాగంగా గెలిచారు.
• మైనార్టీల కోసం పదేండ్లలో గత ప్రభుత్వాలు పెట్టింది రూ.900 కోట్లు కాగా, బీఆర్‌ఎస్‌ ప్రభుత్వం రూ.12 వేల కోట్లు ఖర్చు చేసింది. ఇది బీఆర్‌ఎస్‌, తెలంగాణ మైనార్టీల విజయం.
• పార్టీలు గెలిచినా, గెలువకపోయినా ప్రజలు గెలువాలె. ఫ్లైఓవర్లు, అండర్‌పాస్‌లు, ఓవర్‌ పాస్‌లు నిర్మించాం. వీళ్లకు పెద్ద పీట, వాళ్లకు చిన్నపీట అనే తేడా లేకుండా అన్ని కులాలకు కమ్యూనిటీ హాల్స్‌ నిర్మించాం. వందలు, వేల కోట్ల విలువైన భూములు ఇచ్చి, వందల కోట్ల గ్రాంట్స్‌ ఇచ్చి అన్ని కులాలకు, అన్ని సామాజిక వర్గాలకు రాజధాని నగరంలో మా భవంతి అని కాలర్‌ ఎగరేసుకొని చెప్పే అవకాశం ఇచ్చిన ఒకే ఒక్క ప్రభుత్వం బీఆర్‌ఎస్‌ ప్రభుత్వం. ఈ విధంగా బీఆర్‌ఎస్‌ పాలనలో అన్ని కులాలు గెలిచాయి.

బీఆర్‌ఎస్‌ గెలుపంటే సామూహిక గెలుపు. రాజకీయాల్లో ప్రజలు గెలిస్తేనే గెలుపు. వ్యక్తి గెలిస్తేనో, పార్టీ గెలిస్తేనో అది గెలుపు కాదు. తెలంగాణ రాష్ట్రం వస్తది, తెలంగాణ ధనిక రాష్ట్రమైతది. ఇండియాలోనే ఎక్కువ జీతాలు వస్తాయని చెప్పిన. వచ్చింది ఆ అదృష్టం నాకే దక్కింది. ఇండియాలో అతి ఎక్కువ జీతాలు పొందుతూ తెలంగాణ ఉద్యోగులు గెలిచారు. ఒక్క బీఆర్‌ఎస్‌ గెలుపులో ఇన్ని గెలుపులు ఉన్నాయి. తెలంగాణ సమాజం గెలుపు ఉన్నది. రేపు కూడా ఇంకా పెంచుతం. కష్టపడుతున్నరు, ఆదాయం పెరుగుతున్నది కాబట్టి ఇంకా పెంచుతాం. ఉద్యోగులు మా బిడ్డలే. పీఆర్సీ టైం వస్తది. వారి కడుపు నింపుతం. అన్నింటికీ మించి చిరు ఉద్యోగులు రెగ్యులర్‌ స్కేల్‌ జోన్‌లో ఉన్నరు. ఈ విధంగా ఒక మానవీయ కోణంలో చేసుకుంటూ పోతా ఉన్నం.
– సీఎం కేసీఆర్‌

• తరతరాలుగా అణిచివేతకు గురైన దళితులు ఇప్పుడిప్పుడే బాగుపడేందుకు మొగ్గతొడుగుతున్న పథకం దళితబంధు. ఈ పథకం ద్వారా రాష్ట్రంలోని దళిత బిడ్డలు గెలిచారు

ఎల్వీ ప్రసాద్‌ ఎండీ, అంతర్జాతీయ కంటి చికిత్సా నిపుణుడు గుల్లపల్లి నాగేశ్వర్‌రావు, నేను ఒక కార్యక్రమానికి వెళ్లినం. అప్పుడు ఆయన ఓ మాట చెప్పారు. ‘నేను 150 దేశాల్లో కాన్ఫరెన్స్‌లకు హాజరయ్యాను. కానీ మొత్తం అంధత్వాన్ని నిర్మూలించడం ఎలా అనేదానిపై నాకు ఎక్కడా సమాధానం దొరకలేదు. కానీ, తెలంగాణ సీఎం కేసీఆర్‌ నాకు ఒక మార్గం చూపారు’ అని నన్ను ఉదాహరణగా చూపించారు. రాష్ట్రంలో కోట్ల మందికి కంటి పరీక్షలు నిర్వహించి అద్దాలు ఇస్తున్నాం. కంటి సమస్యలు పోయి వెలుగు చూస్తున్న తల్లులు, తండ్రులు అద్భుత గెలుపు సాధించారు

• కేసీఆర్‌ కిట్‌ రూపంలో మానవీయ కోణంతో ప్రభుత్వ మాతృవందనాన్ని స్వీకరించిన 14 లక్షల మంది తల్లులు, వారి పసిబిడ్డలు గెలిచారు.