ఇది కేంద్ర సర్కారా? గూండాగిరా?

నువ్వు మౌనంలో దాక్కుంటే వదిలే సమస్యే లేదు... నేను నీ వెంటబడి తీరుతా.. జవాబులు చెప్పేవరకూ వేటాడుతా...

• దేశ చరిత్రలో అత్యంత అసమర్థ ప్రధానమంత్రి మోదీ : కేసీఆర్‌
• మోదీ పాలనలో దేశమంతా అవినీతి, కుంభకోణాలే
• నాడు బ్రెయిన్‌ డ్రెయిన్‌, నేడు క్యాపిటల్‌ డ్రెయిన్‌
• ప్రతి చోటా పతనమే.. ఇది మీ కేంద్రం చెప్పే కథనమే
• మోదీ నా ప్రశ్నలకు జవాబేది? చెప్పలేని అశక్తత మీది
• ప్రతిపక్ష పాలిత రాష్ర్టాలను అడ్డుకొనే, కూల్చే కుట్రలు
• ఇది ప్రజాస్వామ్యమా? బ్లాక్‌మెయిల్‌ ప్రభుత్వమా?
• మీరు ఏక్‌నాథ్‌ షిండేల్ని తయారు చేస్తరా? సిగ్గులేదా?
• దేశ ప్రగతిని ప్రధానే అడ్డుకుంటున్న దౌర్భాగ్యమిది
• జడ్జిలను, జర్నలిస్టులను బెదిరిస్తరా? అహంకారమా?
• దేశంలో అప్రకటిత ఎమర్జెన్సీ అమలు అవుతున్నది
• ఆర్థిక నేరగాళ్లపై ఈడీ కేసులేవి? వాళ్లను దేశానికి తేరేం?
• మీ మౌనానికి కారణం.. వాళ్ల లూటీలో మీ వాటాఎంత?
• మీరు విశ్వగురువు కాదు; విష గురువు.. విద్వేష గురువు
• గుప్పెడు మంది వ్యాపారులకు సేల్స్‌మ్యాన్‌ ఈ మోదీ
• మోదీ చెప్పిన ఒక్కమాట నిజం, డబుల్‌ ఇంజిన్‌ కావాలి
• కేంద్ర రాష్ర్టాల్లో బీజేపీ లేని డబుల్‌ ఇంజిన్‌ సర్కార్లు రావాలి
• పరమ పవిత్ర కాశీ పుణ్యక్షేత్రాన్ని కూడా అపవిత్రం చేశారు
• కశ్మీరీ పండిట్ల నెత్తురు మీద నడిచి అధికారంలోకి వస్తరా?
• దేశాన్ని ఈ రాక్షసుల నుంచి కాపాడాలి.. జడ్జిలకు నా సెల్యూట్‌
• బీజేపీని తన్ని తరిమేయాలి… ఇది యువజనం బాధ్యత
• ప్రజలు వరుసగా గెలిపించిన తర్వాత పరివారవాదమేమిటి?
• భారత్‌లో ఎక్కడైనా కాళేశ్వరం ప్రాజెక్టులాంటిది ఉన్నదా?
• దేశంలో ప్రతి ఎకరానికీ నీళ్లిస్తామంటే రైతులు వద్దంటారా?
• నా ప్రతిమాటా నిబద్ధం.. దేశం కోసమే నా ఈ యుద్ధం
• అవసరమైతే టీఆర్‌ఎస్‌ జాతీయ పార్టీగా మారుతుంది
• ఎన్ని చేసినం? సచ్చినా ప్రజలు టీఆర్‌ఎస్‌ను వదులుకోరు
• బట్టకు పొట్టకు సావు లేకుండా అయింది నా తెలంగాణ
• రైతుబంధు సాయం కాదు; వ్యవసాయ స్థిరీకరణ వ్యూహం
• దమ్ముంటే డేట్‌ డిక్లేర్‌ చేయండి.. నేనే అసెంబ్లీ రద్దు చేస్తా!

నువ్వు మౌనంలో దాక్కుంటే వదిలే సమస్యే లేదు… నేను నీ వెంటబడి తీరుతా.. జవాబులు చెప్పేవరకూ వేటాడుతా…
కేసీఆర్‌ ఫైటర్‌.. ఈ వయసులో భయపడే సమస్యే లేదు..నాకు మనీ లేదు.. ల్యాండరింగ్‌ లేదు.. ఉన్నది సాగుభూమి
ఒక్కడు, ఒకే ఒక్కడు, ఒక బక్కోడు ఓర్పుగా, ఓపికగా, ఒక్కో లెక్కా పక్కాగా విప్పి చెప్తుంటే….
ఉక్కులాంటి గళం నుంచి చిక్కటి చిక్కు ప్రశ్నలు దేశ ముఖచిత్రంపై ప్రశ్న చిహ్నాలై నిలుస్తుంటే…
ముసురుపట్టిన ఆదివారం నాడు పెద్దేకాశి ఒక్కపొద్దు సాయంత్రాన ఆకలి కాదు, ఆలోచన రగిలింది. కడుపులో ఆవేదన కలిగింది!
కేంద్ర ప్రభుత్వ గణాంకాలతోనే కేంద్ర ప్రభుత్వ వైఫల్యాన్ని నిరూపిస్తూ.. మోదీ మాటలతోనే ఆయన మాయను పట్టిస్తూ.. బీజేపీ ధర్మం వెనక అధర్మాన్ని ఆవిష్కరిస్తూ… చిల్లర ఆరోపణల వెనకున్న అసలు అల్లరిని చూపిస్తూ..

నా ఈ భారతం ఇలా భారంగా బతకాల్సిందేనా?
నా ఈ దేశం ఇలా దీనంగా కునారిల్ల వలసిందేనా? అంటూ సీఎం కేసీఆర్‌ వేసిన ప్రశ్నలు ఏకాదశి రోజున దైవభక్తితో పాటు, దేశభక్తినీ రగిల్చాయి. ఒక దేశభక్తుని ఆవేదనను మన ముందుంచాయి. మనం ఎంచుకోవాల్సిన మార్గంపై ప్రశ్నల్ని మిగిల్చాయి!

యువజనులారా.. ఈ దేశం మీది
బీజేపీ అరాచకాలను, దుర్మార్గాలను ఇట్లనే భరిస్తూ పోతే ఈ దేశం తప్పకుండా సర్వనాశనమైతది. ఎటూ కాకుండాపోతది. చెడగొట్టడం, కూలగొట్టడం చాలా ఈజీ. పునర్నిర్మాణం చాలా కష్టం. దేశం దెబ్బతింటది. మంచిది కాదు. దయచేసి యువకుల్లారా! ఈ దేశం మీది. భవిష్యత్తు మీది. మీరు కాపాడుకోవాలి. దేశంలో ఉన్న ప్రతి మేథావికి, రచయితకు, కవికి, కళాకారునికి, జర్నలిస్టు లోకానికి నేను చేతులెత్తి దండం పెట్టి చెప్తున్నా. చెడుపై ఎక్కడో చోట పోరాటం మొదలు కావాలి. నాకు సంపూర్ణ విశ్వాసం ఉన్నది. ఇండియా రియాక్ట్స్‌. సందర్భం వచ్చిన ప్రతి సారీ ఈ దేశం రియాక్ట్‌ అయితది.