9 డిగ్రీ కాలేజీలతో క్లస్టర్‌!

• ఉన్నత విద్యామండలి నిర్ణయం
• ఒక్కోకాలేజీలో 30-60 మంది
• విద్యార్థులు చేరేందుకు అవకాశం
• మార్గదర్శకాలు రెడీచేసిన అధికార్లు

హైదరాబాద్‌, సెప్టెంబర్‌ 21 (నమస్తే తెలంగాణ): ఒక కాలేజీలోని వనరులను మరో కాలేజీ విద్యార్థులు పూర్తిస్థాయిలో సద్వినియోగం చేసుకొనే క్లస్టర్‌ విధానాన్ని విస్తరించాలని ఉన్నత విద్యామండలి అధికారులు నిర్ణయించారు. డిగ్రీ కాలేజీలను పరస్పరం అనుసంధానించే ఈ విధానాన్ని ఈ ఏడాది తొమ్మిది కళాశాలల్లో అమలుచేయనున్నారు. మంగళవారం కోఠి మహిళా కాలేజీలో సమావేశమైన అధికారులు క్లస్టర్‌ విధానం అమలుపై లోతుగా చర్చించారు. ఇప్పటికే పలు అంశాలపై అవగాహనకు రాగా.. తాజాగా మరికొన్ని మార్గదర్శకాలను సిద్ధంచేశారు. ఒక్కో క్లస్టర్‌ కాలేజీలో ఇతర కళాశాల నుంచి కనిష్ఠంగా 30, గరిష్ఠంగా 60 మంది విద్యార్థులకు అవకాశమివ్వాలని ప్రాథమికంగా నిర్ణయించారు.

క్లస్టర్‌ కాలేజీలివే..

నిజాంకాలేజీ, కోఠి మహిళాకాలేజీ, సిటీ కాలేజీ, బేగంపేట మహిళా కాలేజీ, భవన్స్‌ కాలేజీ, రెడ్డి మహిళా కాలేజీ, సెయింట్‌ ఆన్స్‌ కాలేజీ, సెయింట్‌ ఫ్రాన్సిస్‌ కాలేజీ, లయోలా కాలేజీ..

మార్గదర్శకాలివే..

• డిగ్రీ మూడో సంవత్సరాన్ని సైతం క్లస్టర్‌ విధానంలో పూర్తిచేయవచ్చు.
• డిగ్రీలో మూడు సబ్జెక్టులకుగాను రెండింటిని అడ్మిషన్‌ పొందిన కాలేజీలో, ఒక సబ్జెక్టును క్లస్టర్‌ కాలేజీలో పూర్తిచేసుకోవచ్చు.
• క్లస్టర్‌ కాలేజీలోని ల్యాబులు, గ్రంథాలయాలు, ఆటస్థలాలు, తరగతి గదులను వినియోగించుకోవచ్చు.
• విద్యార్థులు, అధ్యాపకులను కాలేజీల మధ్య మార్పిడి చేసుకోవచ్చు.
• క్లస్టర్‌ కాలేజీలో అదనపు ఫీజులుండవు. వర్సిటీ నిర్దేశించిన పరీక్ష ఫీజు మాత్రమే ఉంటుంది.
• క్లస్టర్‌ విధానం పర్యవేక్షణకు కాలేజీ, వర్సిటీ, రాష్ట్రస్థాయిలో కమిటీలుంటాయి. సమస్యలు ఉత్పన్నమైతే ఈ కమిటీలు పరిష్కరిస్తాయి.
• క్లస్టర్‌ కాలేజీలో చదివేందుకు విద్యార్థితోపాటు తల్లిదండ్రులు సమ్మతిపత్రాన్ని తప్పనిసరిగా సమర్పించాల్సి ఉంటుంది.