ఇంటిగ్రేటెడ్‌ పీజీ.. యమ క్రేజీ

ఒక్కసారి చేరితే.. అదే కాలేజీలో డిగ్రీ.. పీజీ పూర్తిచేయొచ్చు. కష్టపడి ఐదేండ్లు చదివితే.. డిగ్రీతో పాటు, పీజీ పట్టాను సొంతం చేసుకోవచ్చు.

• ఒకే కాలేజీలో డిగ్రీ, పీజీ పూర్తికి చాన్స్‌
• ఇంటర్‌ పూర్తిచేసిన వారికి అవకాశం
• ఈ – కోర్సులపై విద్యార్థుల ఆసక్తి

హైదరాబాద్‌, సెప్టెంబర్‌ 21 (నమస్తే తెలంగాణ) : ఒక్కసారి చేరితే.. అదే కాలేజీలో డిగ్రీ.. పీజీ పూర్తిచేయొచ్చు. కష్టపడి ఐదేండ్లు చదివితే.. డిగ్రీతో పాటు, పీజీ పట్టాను సొంతం చేసుకోవచ్చు. ఇలాంటి అద్భుత అవకాశం కల్పిస్తున్నదే ఇంటిగ్రేటెడ్‌ పీజీ. ఈ కోర్సుల పట్ల ఇటీవలి కాలంలో విద్యార్థులు ఆసక్తి చూపుతున్నారు. ఈ ఏడాది కామన్‌ పోస్ట్‌ గ్రాడ్యుయేట్‌ ఎంట్రెన్స్‌ టెస్ట్‌ (సీపీగెట్‌)లోనే గణనీయంగానే విద్యార్థులు ఉత్తీర్ణులయ్యారు. ఎయిమ్స్‌, ఐసర్‌, బిట్స్‌ పిలానీ, ఐఐటీలు, సెంట్రల్‌ వర్సిటీ వంటి ప్రతిష్ఠాత్మక విద్యాసంస్థలు ఇంటిగ్రేటెడ్‌ పీజీ కోర్సులు అమలుచేస్తున్నాయి. ఇదే తరహాలో రాష్ట్రంలోనూ ఇంటిగ్రేటెడ్‌ కోర్సులను నిర్వహిస్తున్నారు. సీపీగెట్‌ ద్వారా సీట్లను భర్తీచేస్తున్నారు. ఇంటర్‌ పూర్తిచేసిన వారు ఈ కోర్సుల్లో చేరవచ్చు.

ప్రయోజనాలు..

• ప్రవేశ పరీక్షల ఒత్తిడిని ఎదుర్కోవచ్చు. ఎక్కడ సీటు వస్తుందోనన్న ఆందోళన ఉండదు.
• అధ్యాపకులు, విద్యార్థుల మధ్య దీర్ఘకాల అనుబంధం ఏర్పడి, కోర్సును విజయవంతంగా పూర్తిచేయవచ్చు.
• విద్యార్థి మొదటి మూడేండ్లు చదివి ఆపేస్తే డిగ్రీ, నాలుగేండ్లు పూర్తిచేస్తే ఆనర్స్‌, ఐదేండ్లు పూర్తిచేస్తే పీజీ సర్టిఫికెట్‌ చేతిలో పెడతారు.
• సమయంతో పాటు డబ్బును ఆదా చేసుకోవచ్చు.

ఎక్కడెక్కడంటే..

• ఇంటిగ్రేటెడ్‌ కెమిస్ట్రీ/ ఫార్మాస్యూటికల్‌ కెమిస్ట్రీ కోర్సు ఉస్మానియాలో నిజాం కాలేజీ, పాలమూరు, తెలంగాణ, మహాత్మాగాంధీ సహా అన్ని వర్సిటీల్లో అమల్లో ఉన్నది.
• ఎంబీఏ కోర్సును మహాత్మాగాంధీ వర్సిటీలో నిర్వహిస్తున్నారు.
• ఎకనామిక్స్‌ కోర్సు శాతవాహన వర్సిటీలో అందుబాటులో ఉన్నది.
• బయోటెక్నాలజీ కోర్సును కాకతీయ వర్సిటీలో నిర్వహిస్తున్నారు.