Gurukula Jobs | గురుకుల కృషీవలురు.. ఒకేసారి రెండు కంటే ఎక్కువ ఉద్యోగాలు సాధించిన సరస్వతీ పుత్రులు

వారంతా చిన్నప్పుడు సరస్వతీ పుత్రులుగా రాణించారు. ఇప్పుడు ఉద్యోగాల వేటలో అలుపెరుగని కృషి చేసి జాక్‌పాట్‌ కొట్టారు.

• ఒకేసారి ఐదు ఉద్యోగాలకు ముగ్గురి అర్హత
• నాలుగేసి నౌకర్లు సాధించిన నలుగురు
• ఏడుగురికి మూడు చొప్పున కొలువులు
• రెండేసి కొలువులకు భార్యాభర్తల ఎంపిక

Gurukula Jobs | న్యూస్‌నెట్‌వర్క్‌, మార్చి 2 (నమస్తే తెలంగాణ): వారంతా చిన్నప్పుడు సరస్వతీ పుత్రులుగా రాణించారు. ఇప్పుడు ఉద్యోగాల వేటలో అలుపెరుగని కృషి చేసి జాక్‌పాట్‌ కొట్టారు.

ముగ్గురికి ఐదు ఉద్యోగాలు

మెదక్‌ జిల్లా గజ్వేల్‌కు చెందిన అమరవాది మృణాళిని, హనుమకొండ జిల్లాకు చెందిన పల్లెర్ల రసజ్జ, జగిత్యాల జిల్లా పెగడపల్లి మండలం ల్యాగలమర్రికి చెందిన పుప్పాల మమత ఇటీవల వెల్లడైన గురుకుల పరీక్షల ఫలితాల్లో ఒక్కొక్కరు ఐదు ఉద్యోగాలకు అర్హత సాధించారు. మృణాళిని ప్రస్తుతం ఉస్మానియా విశ్వవిద్యాలయంలో రావి సీతాదేవి ఆధ్వర్యంలో ‘రామాయణం పద్య కావ్యం’పై పీహెచ్‌డీ చేస్తున్నది. రసజ్ఞ ప్రస్తుతం ఉస్మానియా యూనివర్సిటీ కెమిస్ట్రీ విభాగంలో పీహెచ్‌డీ చేస్తున్నది.

నలుగురికి నాలుగు చొప్పున..

• వికారాబాద్‌ జిల్లా నవాబుపేట మండలం పులుమామిడికి చెందిన లక్ష్మీగళ్ల మహిపాల్‌ ఒకేసారి నాలుగు ఉద్యోగాలకు ఎంపికయ్యాడు. ప్రస్తుతం ఉస్మానియా యూనివర్సిటీలో తెలుగులో పరిశోధన చేస్తున్నాడు. డీఎల్‌, జేఎల్‌, పీజీటీ, టీజీటీ ఉద్యోగాలు సాధించాడు.
• జగిత్యాల జిల్లా భీమారానికి చెందిన బసవరాజుల రాజేశ్‌.. టీజీటీ, పీజీటీ, డీఎల్‌, జేఎల్‌ ఉద్యోగాలు సాధించాడు. రాజేశ్‌ భార్య సంయుక్త నెల రోజుల క్రితం ఎక్సైజ్‌ కానిస్టేబుల్‌గా ఉద్యోగంలో చేరారు.
• జగిత్యాలకు చెందిన కొడేరి భాగ్యలక్ష్మి నాలుగు ఉద్యోగాలకు ఎంపికైంది. డిగ్రీ లెక్చరర్‌, జూనియర్‌ లెక్చరర్‌, పీజీటీ, టీజీటీ ఉద్యోగాలను ఏకకాలంలో సాధించింది. ఆమెకు పెండ్లి కాగా, బీడీలు చుట్టేది.
• జగిత్యాల జిల్లా కోరుట్లకు చెందిన కటుకం దేదీప్య పీజీటీ, జూనియర్‌ లెక్చరర్‌ (పొలిటికల్‌ సైన్స్‌), డిగ్రీ లెక్చరర్‌ (పొలిటికల్‌ సైన్స్‌), గ్రూప్‌-4 ఉద్యోగాలకు ఎంపికైంది.

ఏడుగురికి మూడు చొప్పున ఉద్యోగాలు

• రాజన్న సిరిసిల్ల జిల్లా ఎల్లారెడ్డిపేటకు చెందిన గుండం శిరీష గతేడాది గురుకుల పీజీటీ తెలుగు అపాయింట్‌మెంట్‌ ఆర్డర్‌ తీసుకుంది. తాజాగా టీజీటీ, జేఎల్‌ సాధించింది. జగిత్యాల జిల్లా బీర్‌పూర్‌కు చెందిన దాసరి స్వప్న టీజీటీ, పీజీటీ, జేఎల్‌ ఉద్యోగాలు పొందింది. సిరిసిల్లకు చెందిన బైరి పుష్పలత కేజీబీవీ సీఆర్‌టీ సోషల్‌లో తంగళ్లపల్లి కేజీబీవీలో సేవలందిస్తున్నది. తాజాగా టీజీటీ, పీజీటీ (సోషల్‌), జేఎల్‌ (సివిక్స్‌)కు ఎంపికైంది. రాజన్న సిరిసిల్ల జిల్లా తంగళ్లపల్లి మండలం నేరెళ్లకు చెందిన నేరెళ్ల సౌజన్య 2023 ఆగస్టు నుంచి రుద్రంగిలోని కేజీబీవీలో జూనియర్‌ లెక్చరర్‌గా పనిచేస్తున్నది. ఇప్పుడు పీజీటీ, టీజీటీ, జేఎల్‌ ఉద్యోగాలకు ఎంపికైంది. కరీంనగర్‌ జిల్లా గంగాధర మండలం నాగిరెడ్డిపూర్‌కు చెందిన జంగలపల్లి స్వాతి పీజీటీ (మాథ్స్‌), జేఎల్‌, టీజీటీ (మాథ్స్‌) ఉద్యోగానికి ఎంపికైంది. జనగామ జిల్లా జఫర్‌గఢ్‌ మండలం తిమ్మంపేటకు చెందిన జోగు శ్రీకాంత్‌ టీజీటీ జనరల్‌ సైన్స్‌, పీజీటీ ఫిజికల్‌ సైన్స్‌, జేఎల్‌ కెమిస్ట్రీ సాధించారు. జయశంకర్‌ భూపాలపల్లి జిల్లా గోరికొత్తపల్లి మండలం జగ్గయ్యపేటకు చెందిన సునీతారెడ్డి టీజీటీ, పీజీటీ, జేఎల్‌ ఉద్యోగాలకు ఎంపికయ్యారు.

దంపతులిద్దరికీ ఉద్యోగాలు

జగిత్యాల జిల్లా మెట్‌పల్లి మండలం చౌలమద్ది అనుబంధ గ్రామమైన మారుతీనగర్‌కు చెందిన భార్యాభర్తలు శనిగరం విజయ్‌కుమార్‌ – స్వప్నికలు ఒకేసారి ప్రభుత్వ ఉద్యోగాలు సాధించారు. విజయ్‌కుమార్‌ జేఎల్‌తోపాటు టీజీటీ(సోషల్‌)కు ఎంపికయ్యారు. ఆయన భార్య స్వప్నిక టీజీటీ(ఇంగ్లిష్‌) పోస్టుకు అర్హత సాధించారు.