కట్టంగూర్(నకిరేకల్), ఏప్రిల్ 4: ప్రమాదవశాత్తు టైరు పంచరై కారు పల్టీ కొట్టడంతో అందులో ప్రయాణిస్తున్న ఒకరు మృతి చెందారు. మరో నలుగురికి తీవ్ర గాయాలయ్యాయి. ఈ ఘటన నల్లగొండ జిల్లా నకిరేకల్ బైపాస్ రోడ్డులో ఆదివారం జరిగింది. పోలీసులు తెలిపిన ప్రకారం, హైదరాబాద్ ఫిలింనగర్ నుంచి తణుకుకు సినిమా చిత్రీకరణ కోసం షూటింగ్ బృందం సభ్యులు కారులో బయలుదేరారు. నకిరేకల్ పట్టణంలోని బైపాస్ రోడ్డు వద్దకు రాగానే కారు టైరు పంచరై అదుపు తప్పి రోడ్డు పక్కన పల్టీ కొట్టింది. దీంతో కారులో ప్రమాణిస్తున్న సినిమా సౌండ్ ఇంజినీర్ గార్లపాటి రవి(53) అక్కడికక్కడే మృతిచెందాడు. ఎడిటర్ జి.అనిల్ కుమార్, కారు డ్రైవర్ సురేందర్, వికారాబాద్కు చెందిన శ్రీకాంత్, హైదరాబాద్ పార్వతీనగర్కు చెందిన ఏ.శ్రీనివాస్ తీవ్రంగా గాయపడ్డారు. క్షతగాత్రులకు నకిరేకల్ ప్రభుత్వ దవాఖానలో ప్రథమ చికిత్స చేసి మెరుగైన వైద్యం కోసం హైదరాబాద్కు తరలించారు. కేసు నమోదు చేసుకొని దర్యాప్తు చేస్తున్నట్లు పోలీసులు తెలిపారు.