రైతుల కంటతడి రాష్ట్రానికి మంచిది కాదు : ఆల వెంకటేశ్వర్ రెడ్డి

రైతుల కంటతడి రాష్ట్రానికి మంచిది కాదని మాజీ ఎమ్మెల్యే ఆల వెంకటేశ్వర్ రెడ్డి అన్నారు.

దేవరకద్ర : రైతుల కంటతడి రాష్ట్రానికి మంచిది కాదని మాజీ ఎమ్మెల్యే ఆల వెంకటేశ్వర్ రెడ్డి అన్నారు. మంగళవారం మహబూబ్‌నగర్ జిల్లా దేవరకద్ర మండలం డోకూరు గ్రామంలో ఎండిన పంటలను పరిశీలించారు. ఈ సందర్భంగా ఆయన మాట్లాడుతూ.. వానకాలం పంటలు కూడా కాపాడలేని దుస్థితిలో కాంగ్రెస్‌ ప్రభుత్వం ఉందన్నారు. డోకూరులో జానకమ్మ కౌలుకు తీసుకొని సాగు చేస్తే మొత్తం పంట ఎండిపోయింది.

జానకమ్మ లాంటి రైతు కంటతడి పెడితే రాష్ట్రానికి మంచిది కాదన్నారు. ఐదు లక్షలు పెట్టుబడి పెడితే ఐదు రూపాయలు కూడా రాలేదన్నారు. గతంలో కోయిల్ సాగర్ నుండి దేవరకద్ర పెద్ద చెరువుకు నీళ్లు వదిలే వాళ్లం. అక్కడి నుండి వరుసగా చెరువులు నిండేవన్నారు. ప్రజలకు ఉపయోగపడని పదవులు ఎందుకు అని ప్రశ్నించారు.

కోయిల్ సాగర్ నుండి లగచర్లకు నీళ్లు తీసుకెళ్లేందుకు సర్వే నడుస్తుంది. కోయిల్ సాగర్ నుండి నీటి తరలింపు ప్రతిపాదన విరమించుకోవాలన్నారు. ఉమ్మడి పాలమూరు జిల్లాను కరువు జిల్లాగా ప్రకటింలన్నారు. అలాగే రైతులకు ఎకరాకు యాభై వేలు పరిహారం ఇవ్వాలని డిమాండ్‌ చేశారు.