Robbery | నీ కష్టం పగోడికి కూడా రావొద్దు భయ్యా! చోరీకి వచ్చి ఏమీ దొరక్క టేబుల్‌పై రూ.20 పెట్టి వెళ్లిన దొంగ

Robbery | హోటల్‌లో దొంగతనానికి వచ్చిన ఓ చోరుడు.. అక్కడ ఎంతసేపు వెతికినా చిల్లిగవ్వ కూడా దొరక్కపోవడంతో 'పాపం, ఇది పేద హోటల్‌ లాగా ఉంది. మనమే దానం చేసి పోదాం' అని తన జేబులో ఉన్న రూ. 20 నోటు తీసి టేబుల్‌పై పెట్టి వెళ్లాడు

Robbery | దొంగతనానికి వచ్చిన ఓ వ్యక్తి తాను చోరీకి వచ్చిన చోట కాజేయడానికి ఏమీ దొరక్కపోవడంతో జాలితో టేబుల్‌ మీద రూ. 20 పెట్టి వెళ్లిన ఘటన ఆలస్యంగా వెలుగులోకి వచ్చింది. తెలంగాణాలోని రంగారెడ్డి జిల్లా మహేశ్వరంలో ఈనెల 18న ఈ ఘటన చోటు చేసుకుంది. స్థానికంగా ఎమ్మార్వో ఆఫీసు ముందు ఉన్న ఓ పెద్ద హోటల్‌లో దొంగతనానికి వచ్చిన ఓ చోరుడు.. అందులో ఎంతసేపు వెతికినా చిల్లిగవ్వ కూడా దొరక్కపోవడంతో ‘పాపం, ఇది పేద హోటల్‌ లాగా ఉంది. మనమే దానం చేసి పోదాం’ అనితన జేబులో ఉన్న రూ. 20 నోటు తీసి టేబుల్‌పై పెట్టి వెళ్లాడు. ఇందుకు సంబంధించిన వీడియో అంతా హోటల్‌లో ఉన్న సీసీ టీవీ కెమెరాల్లో రికార్డు అయి సదరు మంచిదొంగ గారి మానవత్వం ప్రపంచానికి ప్రదర్శితమైంది.

వివరాల్లోకెళ్తే.. మహేశ్వరంలో ఉన్న ఎమ్మార్వో ఆఫీసు ఎదుట ఉన్న హోటల్‌లో దొంగతనం చేయాలని ఓ దొంగ పకడ్బందీగా ప్లాన్‌ వేశాడు. అనుకున్నదే తడువుగా పక్కాగా రెక్కీ నిర్వహించి రాత్రి వేళ అందరూ వెళ్లగానే చోరీకి సిద్ధమయ్యాడు. దొంగతనం చేస్తే పోలీసులకు ఆనవాళ్లు కూడా దొరకకూడదనుకుని చేతులకు గ్లవ్స్‌ వేసుకున్నాడు. సీసీటీవీలో తన ముఖం కనిపించకుండా ఉండేందుకు ముఖానికి మాస్క్‌ వేసుకున్నాడు. ఇంకేం.. ఎన్నో ఆశలతో రణక్షేత్రంలోకి దూకాడు. తీరా లోపలికెళ్లి చూస్తే ఎక్కడ వెతికినా చిల్లిగవ్వ కనపడటం లేదు. బిల్‌ కౌంటర్‌లో సూక్ష్మ దర్శిని వేసి చూసినా పైసా లేదు. శకునం బాగా లేదనుకున్నాడో ఏమో గానీ ఇక అక్కడుండి లాభం లేదనుకుని బయటకు వెళ్లడానికి నిశ్చయించుకున్నాడు.

 

A thief, who apparently came prepared to make a grand heist in #Maheshwaram #Rangareddy district #Telangana, was caught on CCTV expressing his utter dismay over the lack of cash. In a twist of generosity, he left behind Rs 20 on the table and even swiped a bottle from the fridge… pic.twitter.com/AbnuTh17er

— dinesh akula (@dineshakula) July 26, 2024

వెళ్తూ వెళ్తూ అక్కడ ఉన్న ఫ్రిజ్‌ దగ్గరికి వెళ్లి అక్కడేమైనా తినడానికి దొరక్కపోతాయో తినేసి వెళ్దామనుకున్నాడు. కానీ అక్కడా అతడికి నిరాశ తప్పలేదు. ఇక లాభం లేదనుకుని ఓ వాటర్‌ బాటిల్‌ను తీసుకున్నాడు. నేరుగా బిల్‌కౌంటర్‌ దగ్గర ఉన్న సీసీ టీవీ దగ్గరకు వచ్చి దూకుడులో బ్రహ్మనందం పెన్‌ కెమెరాలో నాగార్జునతో మాట్లాడినట్టుగా.. ‘మీ హోటల్‌లో వాటర్‌ బాటిల్ తప్ప ఇంకేం దొరకలేదు. మీ కష్టం నాకెందుకు. ఇదిగో రూ. 20 నోటు పెట్టిపోతున్నా. ఎంజాయ్‌. పండగొ’ అనుకుంటూ అక్కడ్నుంచి జారుకున్నాడు. ఈ తతంగం అంతా సీసీ టీవీలో రికార్డు అవడంతో అదికాస్తా నెట్టింట వైరల్‌ అవుతోంది. దీనిని చూసిన నెటిజన్లు ‘వీడెవడో మంచిదొంగగా ఉన్నాడు’ అంటూ కామెంట్స్‌ పెడుతున్నారు.