Electrocuted | విద్యుత్తు షాక్‌తో చనిపోతే పరిహారం 5 లక్షలు.. చెల్లింపులో అధికారుల నిర్లక్ష్యం

రాష్ట్రంలో విద్యుత్తు షాక్‌ మరణాల సంఖ్య ఏటేటా పెరుగుతూ వస్తున్నది. కరెంటు తీగలు యమపాశాలై ఏటా వందలాది మంది ప్రజల ప్రాణాలను బలితీసుకుంటున్నాయి. ఈ పరిస్థితులు బాధిత కుటంబాల్లో విషాదాన్ని నింపుతున్నాయి. ఇంటి పెద్ద మరణంతో కుటుంబాల్లో ఆర్థిక కల్లోలం వెంటాడుతున్నది.

• విద్యుత్తు మరణాలకు విద్యుత్తు సంస్థల చెల్లింపు
• ఉమ్మడి రాష్ట్రంలో కేవలం రూ.లక్ష
• స్వరాష్ట్రం వచ్చాక భారీగా పెంపు
• పశువులు, జీవాల మృతికీ పరిహారం
• ఏటా పెరుగుతున్న మరణాల సంఖ్య

Electrocuted | హైదరాబాద్‌, డిసెంబర్‌ 22 (నమస్తే తెలంగాణ): రాష్ట్రంలో విద్యుత్తు షాక్‌ మరణాల సంఖ్య ఏటేటా పెరుగుతూ వస్తున్నది. కరెంటు తీగలు యమపాశాలై ఏటా వందలాది మంది ప్రజల ప్రాణాలను బలితీసుకుంటున్నాయి. ఈ పరిస్థితులు బాధిత కుటంబాల్లో విషాదాన్ని నింపుతున్నాయి. ఇంటి పెద్ద మరణంతో కుటుంబాల్లో ఆర్థిక కల్లోలం వెంటాడుతున్నది. ఈ దశలో విద్యుత్తు షాక్‌తో మరణించిన వారి కుటుంబాలకు సంబంధిత విద్యుత్తు సంస్థలు నష్టరిహారాన్ని చెల్లిస్తాయి. వ్యక్తులు మరణిస్తే వయేభేదం లేకుండా రూ.5 లక్షలు పరిహారంగా చెల్తిస్తారు. పశువుల మరణాలకు విద్యుత్తు సంస్థలు రూ.40 వేలు చెల్లిస్తుండగా, జీవాల మరణాలకు రూ.7 వేల చొప్పున చెల్లిస్తున్నాయి.

2014కు ముందు వ్యక్తుల మరణాలకు పరిహారం కేవలం రూ.ఒక లక్ష మాత్రమే ఉండేది. చిన్న పిల్లలు మరణిస్తే రూ.50 వేలు, పశువులకు రూ.3 వేలు మాత్రమే ఇచ్చేవారు. మేకలు, గొర్రెలకు 2014కు ముందు ఎలాంటి నష్టపరిహారాన్ని అందించేవారే కాదు. బీఆర్‌ఎస్‌ సర్కారు చొరవతో ఈ నష్టపరిహారాన్ని పెద్ద మొత్తంలో పెంచడం విశేషం. చిన్న పిల్లలు, పెద్దలన్న తేడాల్లేకుండా వ్యక్తులు మరణిస్తే రూ.5 లక్షలు ఎక్స్‌గ్రేషియాగా ఇస్తున్నారు. సంఘటన జరిగిన నెల రోజుల్లోపు అన్నిరకాల డాక్యుమెంట్లు జతచేసి దరఖాస్తు సమర్పించాలి. తొలుత సంబంధిత సంస్థ అసిస్టెంట్‌ ఇంజినీర్‌ (ఏఈ) ప్రాథమిక విచారణ జరుపుతారు. ఆ తర్వాత డివిజినల్‌ ఇంజినీర్‌ (డీఈ) సమగ్ర విచారణ జరిపి పైఅధికారులకు నివేదికను సమర్పిస్తారు. అనంతరం నష్టపరిహారాన్ని సంబంధిత డీఈ కార్యాలయం నుంచే పొందవచ్చు.

కావాల్సిన డాక్యుమెంట్లు

ప్రాథమిక విచారణ నివేదిక, సమగ్ర విచారణ నివేదిక, పోలీస్‌ ఎఫ్‌ఐఆర్‌, పంచనామా నివేదిక, డెత్‌ సర్టిఫికెట్‌, తాసిల్దార్‌ జారీచేసిన చట్టపరమైన వారసుల ధ్రువీకరణ పత్రం, సంఘటన ఫొటో, సంఘటన లొకేషన్‌ వివరాలను దరఖాస్తుతో సహా సమర్పించాలి.

ఏడేండ్లలో 4,420 మంది మృతి

రాష్ట్రంలో విద్యుత్తు షాక్‌ మరణాలు ఆందోళన కలిగిస్తున్నాయి. గడిచిన ఏడేండ్లలో రాష్ట్రవ్యాప్తంగా 4,420 మంది విద్యుత్తు షాక్‌తో చనిపోయారు. అంటే ఏటా 700 మంది చొప్పున ప్రాణాలు కోల్పోతుండగా, రోజుకు ఇద్దరి ప్రాణాలను కరెంట్‌ కబలిస్తున్నది. ఈ ఏడాది మార్చిలో విద్యుత్తు తీగలు తగిలి ఏకంగా ఒకే గ్రామంలో ముగ్గురు మరణించారు. మరోచోట భార్యభర్తలు చనిపోయారు. 2024 ఆగస్టు వరకు దక్షిణ తెలంగాణ విద్యుత్తు పంపిణీ సంస్థ పరిధిలో 86, ఉత్తర తెలంగాణ విద్యుత్తు పంపిణీ సంస్థ పరిధిలో 132 చొప్పున మృత్యువాత ఘటనలు చోటుచేసుకున్నాయి. ఉత్తర తెలంగాణ డిస్కం పరిధిలోనే ఏటా అత్యధిక విద్యుత్తు షాక్‌ మరణాలు నమోదవుతున్నాయి.

ఇటీవలి ప్రమాద ఘటనలు

• ఈ ఏడాది ఏప్రిల్‌లో మానకొండూరు మండలం లింగాపూర్‌లో ట్రాన్స్‌ఫార్మర్‌ వద్ద విద్యుత్తు షాక్‌తో రైతు చనిపోయాడు. మేలో సంగారెడ్డి జిల్లా మునిపల్లిలో ఎల్‌సీ తీసుకొని విద్యుత్తు స్తంభం ఎక్కి వైర్లు సరిచేస్తుండగా విద్యుత్తు సరఫరా జరిగి విద్యుత్తు లైన్‌మన్‌ మరణించాడు.
• కామారెడ్డి జిల్లా ఎల్లారెడ్డి మండలం జంగమాయపల్లిలోని బోరు మెటర్‌ స్విచ్‌ ఆఫ్‌ చేస్తుండగా కరెంట్‌ షాక్‌ తగిలి రైతు చనిపోయాడు. ములుగు జిల్లా మండలంపల్లిలో మరో రైతు విద్యుదాఘాతంతో
  చనిపోయాడు.
• ఈ ఏడాది జనవరిలో అత్తాపూర్‌లో సంక్రాంతి పండుగ సందర్భంగా గాలిపటాలు ఎగరేస్తూ ఓ బాలుడు విద్యుత్తు షాక్‌కు గురై మరణించాడు.
• ఈ ఏడాది ఫిబ్రవరి 12న భూపాలపల్లి జిల్లాలో వణ్యప్రాణుల నుంచి రక్షణ కోసం ఏర్పాటుచేసిన విద్యుత్తు వైరు తాకి కూంబింగ్‌ కోసం వెళ్లిన గ్రేహౌండ్స్‌ బృందంలో ఉన్న కానిస్టేబుల్‌ ఏ ప్రవీణ్‌ విద్యుత్తు షాక్‌తో మరణించారు.
• 2023 డిసెంబర్‌లో నిర్మాణంలో ఉన్న ఇంటి గోడలకు నీళ్లు పెడుతుండగా, ప్రమాదవశాత్తు విద్యుత్తు తీగలకు తాకడంతో జోగులాంబ గద్వాల జిల్లా అయిజలో యుగేంధర్‌ మృత్యువాతపడ్డాడు.
• 2023 నవంబర్‌లో వనపర్తి జిల్లా ఖిల్లాఘనపురం మండలం రుక్కన్నపల్లిలో పొలంలో ఏర్పాటుచేసిన విద్యుత్తు వైర్లు తాకి ఇద్దరు మృతిచెందారు.
• నిర్మల్‌ జిల్లాలో జెండాపైపు అమర్చుతుండగా, 11 కేవీ విద్యుత్తు తీగలు తగిలి ఇద్దరు ప్రాణాలు కోల్పోయారు.
• విద్యుత్తు ట్రాన్స్‌ఫార్మర్‌ను సరిచేస్తుండగా సూర్యాపేట జిల్లా నడిగూడెం మండలం తెల్లబల్లిలో సబ్‌స్టేషన్‌ ఆపరేటర్‌ ప్రాణాలు కోల్పోయాడు.
• సంగారెడ్డి జిల్లా పెద్ద గొట్టిముక్కలలో విద్యుత్తు తీగ తెగి ఫెన్సింగ్‌పై పడగా, పంటచేను చూసేందుకు వచ్చిన రైతు ఫెన్సింగ్‌ను ముట్టుకోవడంతో అక్కడికక్కడే మరణించాడు.
• 2023 జూలైలో సికింద్రాబాద్‌ లష్కర్‌ బోనాల సందర్భంగా అమ్మవారి దర్మనానికి వచ్చిన ఓ యువకుడు విద్యుత్తు స్తంభాన్ని ముట్టుకోవడంతో షాక్‌కు గురై ప్రాణాలు కోల్పోయాడు.