190 కోట్లతో అగ్నిమాపక ప్రతిపాదనలు

తెలంగాణ అగ్నిమాపకశాఖకు రావాల్సిన రూ.190 కోట్ల నిధులు, వాటి ఖర్చులకు సంబంధించిన ప్రతిపాదనలను కేంద్ర హోం శాఖకు పంపినట్టు ఫైర్‌ డీజీ వై నాగిరెడ్డి గురువారం తెలిపారు.

• కేంద్ర హోంశాఖకు పంపిన తెలంగాణ అగ్నిమాపకశాఖ
• త్వరలో తుది అనుమతులు:ఫైర్‌ డీజీ వై నాగిరెడ్డి

హైదరాబాద్‌, జనవరి 4 (నమస్తే తెలంగాణ): తెలంగాణ అగ్నిమాపకశాఖకు రావాల్సిన రూ.190 కోట్ల నిధులు, వాటి ఖర్చులకు సంబంధించిన ప్రతిపాదనలను కేంద్ర హోం శాఖకు పంపినట్టు ఫైర్‌ డీజీ వై నాగిరెడ్డి గురువారం తెలిపారు. 2020-25 సంబంధించిన 15వ ఆర్థిక సంఘం నిధుల నుంచి రూ.190.14 కోట్లను కేంద్ర ప్రభుత్వం విడుదల చేయనున్నది. ఈ మేరకు మనతోపాటు ఆయా రాష్ర్టాలకు చెందిన అగ్నిమాపక విభాగాలను కేంద్ర ప్రతిపాదనలు పంపాలని కోరడంతో తెలంగాణ అగ్నిమాపక శాఖ డీజీ వై నాగిరెడ్డి వెంటనే ప్రతిపాదనలు పంపారు. ఈ క్రమంలో ప్రభుత్వం రాష్ట్రవాటాగా 47.53 కోట్లను విడుదల చేయడంతో మిగిలిన 142.61 కోట్లను విడుదల చేసేందుకు కేంద్ర ప్రభుత్వం సుముఖత వ్యక్తం చేసినట్టు ఆయన చెప్పారు. ఈ మేరకు గత డిసెంబర్‌ 14న ఢిల్లీలోని కేంద్ర హోంశాఖ ఆధ్వర్యంలో నిర్వహించిన సమావేశానికి హాజరైనట్టు తెలిపారు. 2023-24లో రూ. 73.41 కోట్లు, 2024-25లో రూ.66.56 కోట్లు, 2025-26లో రూ.50.17 కోట్లు విడుదలయ్యే అవకాశం ఉందని ఫైర్‌ డీజీ వెల్లడించారు. మొదటి ఇన్‌స్టాల్‌మెంట్‌లో వచ్చే 73.41 కోట్లను 40 కోట్ల ఖర్చయ్యే 104 మీటర్ల హైడ్రాలిక్‌ వాహనంతోపాటు ఇతర ఆధునిక వాహనాలను కొనుగోలు చేస్తున్నట్టు తెలిపారు.

• 18 కొత్త అగ్నిమాపక కేంద్రాల నిర్మాణానికి రూ.57.04 కోట్లు
• స్టేట్‌ ట్రైనింగ్‌ సెంటర్స్‌ అండ్‌ కెపాసిటీ బిల్డింగ్స్‌కు రూ.9.51 కోట్లు
• అధునాతన వాహనాల కొనుగోలుకు అత్యధికంగా రూ.85.57 కోట్లు
• అర్బన్‌ ఏరియాల్లో అగ్నిమాపక కేంద్రాలను బలోపేతానికి రూ.9.50 కోట్లు
• రాష్ట్ర ప్రత్యేక వినతులు (అగ్నిమాపక కేంద్రాల ఆధునీకరణ, పెండింగ్స్‌ వర్క్స్‌) రూ.28.52 కోట్లు