Health tips | మీ వంటగ‌దిలో ఉన్న ఈ వ‌స్తువుల‌తో వ‌చ్చే లాభాలు తెలిస్తే షాక‌వ్వాల్సిందే

December 19, 2021 / 03:43 PM IST

Health tips | భారతీయుల వంటగది సహజ సిద్ధమైన పోషకాల గని. వంటల్లో వాడే అనేక దినుసులలో అపారమైన ఔషధ గుణాలు దాగి ఉన్నాయి. అలాంటి సుగుణాల వివరాలు తెలుసుకుందాం..

పొద్దుతిరుగుడు గింజలు

వీటిలో విటమిన్‌- ఇ అపారం. వీటిని ఆహారంలో భాగం చేసుకోవడం వల్ల కాలానుగుణంగా వచ్చే వ్యాధుల ముప్పు తప్పుతుంది. ఇవి వాల్‌నట్స్‌ కంటే రెండు రెట్లు ఎక్కువ ప్రొటీన్లను ఇస్తాయి. అంతేకాకుండా పల్లీలతో పోలిస్తే ఆరు రెట్లు ఎక్కువ విటమిన్‌- ఇ ఉంటుంది. రోజూ ఒక టేబుల్‌ స్పూన్‌ పొద్దు తిరుగుడు గింజలు తింటే ఆరోగ్యానికి ఎంతో మంచిది. అతిగా తింటే మాత్రం వికారం, దద్దుర్లు, బరువు పెరుగదల ముప్పు పొంచి ఉంటుంది.

బ్రకోలి

పోషకాలతో సమృద్ధమైన ఆకుకూర బ్రకోలి. గర్భిణులకు ఇది ఫోలిక్‌ ఆమ్లానికి గని లాంటిది. పైగా విటమిన్‌- సి, ఎ, ఇ లాంటి యాంటీ ఆక్సిడెంట్లతో నిండి ఉంటుంది. శరీరంలో పేరుకుపోయిన ఫ్రీ రాడికల్స్‌ నుంచి విముక్తి పొందడానికి ఇవి దోహదపడతాయి. అయితే కడుపు ఉబ్బరం లేదా పేగుల్లో మంటగా అనిపిస్తే మాత్రం బ్రకోలీని మితంగా తీసుకోవాలి.

మిరియాలు

సుగంధ ద్రవ్యాల రాణిగా ప్రసిద్ధి చెందిన మిరియాలు యాంటీ ఆక్సిడెంట్లు, ఫ్లేవనాయిడ్స్‌, ఎ, సి విటమిన్లతో సమృద్ధమై ఉంటాయి. ఇందులో ఉండే పైపెరైన్‌ అనే శక్తిమంతమైన యాంటీ ఆక్సిడెంట్‌ ఫ్రీ రాడికల్స్‌తో పోరాడటంలో దోహదపడుతుంది. అరుగుదలను మెరుగుపరుస్తుంది. మేలుచేసే ఆహార పదార్థాలను శరీరం గ్రహించడంలో దోహదపడుతుంది.

కొత్తిమీర

గొప్ప వనమూలిక. ఫైబర్‌, విటమిన్‌ కె, ఎ, క్యాల్షియంతో సమృద్ధమైంది. అరుగుదలలో సాయకారి. రక్తంలో చక్కెర స్థాయులను తగ్గిస్తుంది. హానికర లోహాల నుంచి శరీరానికి స్వస్థత చేకూరుస్తుంది. ఒత్తిడితో పోరాడుతుంది. నిద్రను మెరుగుపరుస్తుంది. మహిళల రుతుచక్రం సవ్యంగా సాగేలా దోహదపడుతుంది.

కుంకుమ పువ్వు

దానికే ప్రత్యేకమైన రంగుతో, గొప్ప సువాసనతో అలరారే సుగంధ ద్రవ్యం కుంకుమ పువ్వు. మెరిసే చర్మం కోసం, క్యాన్సర్‌పై పోరాటం కోసం, బరువును, కొలెస్ట్రాల్‌ను తగ్గించుకోవడానికి, నిద్రలేమి, కుంగుబాటు నివారణకు, గుండె వ్యాధుల నియంత్రణకు, ఆహారం అరుగుదలకు కుంకుమపువ్వు చేసే మేలు అంతాయింతా కాదు.

పుదీనా

ఏడాదంతా సర్వసాధారణంగా ఉపయోగించే ఔషధ మొక్క పుదీనా. ఇది మెదడు పనితీరును మెరుగుపరుస్తుంది. దగ్గును నివారిస్తుంది.

తులసి

భారతీయ సంప్రదాయంలో పూజనీయమైన స్థానం తులసిది. అంతేకాదు వంటిల్లునూ ఆరోగ్యవంతం చేస్తున్నది. తులసి శరీర రోగ నిరోధక వ్యవస్థకు మంచిది. వాతం, క్యాన్సర్‌, ఒత్తిడితో పోరాడే యాంటీ ఆక్సిడెంట్లకు నిలయం. గుండె కవాటాల ఆరోగ్యాన్ని మెరుగుపరుస్తుంది. మధుమేహాన్ని నివారిస్తుంది.

అశ్వగంధ

ఒత్తిడికి కారణం శరీరంలో ఉండే కార్టిసోల్‌ అనే హార్మోన్‌. రక్తంలో కార్టిసోల్‌ స్థాయులను తగ్గించడం ద్వారా అశ్వగంధ ఒత్తిడిని తట్టుకునేలా చేస్తుంది.

కరివేపాకు

విటమిన్‌ ఎ, బి, సి, ఇలతో సమృద్ధం. పిండిపదార్థాలు, భాస్వరం (ఫాస్పరస్‌) కూడా ఉంటాయి. ఇందులో ఉన్న ఫోలిక్‌ ఆమ్లం రక్తహీనతతో (ఎనీమిక్‌) బాధపడే రోగులకు మంచిది.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి