హలో! ఫ్యామిలీ డాక్టర్‌

అది 1990. అప్పట్లో ఓ పల్లెటూరు. ఆ ఊళ్లో ఒక బడి, నాలుగు పచారీ కొట్లు, పంచాయతీ కార్యాలయంతో పాటుగా... ఆ పల్లె జీవితంలో భాగమయ్యేది ఓ చిన్న క్లినిక్‌. పిల్లలకి జ్వరం వచ్చినా, చెవిపోటు మెలిపెట్టినా, పెద్దోళ్ల మోకాళ్ల నొప్పులైనా, రక్తపోటు లాంటి జీవితకాలపు సమస్యలైనా... ఆ దవాఖానకే దారి.

అది 1990. అప్పట్లో ఓ పల్లెటూరు. ఆ ఊళ్లో ఒక బడి, నాలుగు పచారీ కొట్లు, పంచాయతీ కార్యాలయంతో పాటుగా… ఆ పల్లె జీవితంలో భాగమయ్యేది ఓ చిన్న క్లినిక్‌. పిల్లలకి జ్వరం వచ్చినా, చెవిపోటు మెలిపెట్టినా, పెద్దోళ్ల మోకాళ్ల నొప్పులైనా, రక్తపోటు లాంటి జీవితకాలపు సమస్యలైనా… ఆ దవాఖానకే దారి. డాక్టరుగారు సౌమ్యంగా ఉన్నా చిర్రుబుర్రులాడినా జనం దృష్టిలో తను దేవుడే. తన హస్తవాసి అలాంటిది మరి. కిటకిటలాడే గదిలో ఒకరి తర్వాత ఒకరుగా రోగ లక్షణాలు చెబుతుంటే, వింటూనే ఠకఠకా మందులు రాసేస్తారు. ఆ లక్షణాలు తగ్గకపోయినా, పరిస్థితి విషమంగా తోచినా… వెంటనే పెద్దాసుపత్రికి సిఫార్సు చేసేస్తారు.

రోగిని ఇంతని ఫీజు అడగకపోవచ్చు. తర్వాత ఇస్తానన్నా పట్టించుకోకపోవచ్చు. జన్మనిచ్చిన తల్లిలాగే, పెద్దచేసే తండ్రిలాగే, చదువు చెప్పే గురువులాగే… ఆయన కూడా మనల్ని ఆరోగ్యంగా చూసుకునే బాధ్యతను తీసుకున్నారు మరి. అందుకే ఇప్పటికీ చాలామందిని వాళ్ల ఊరి జ్ఞాపకాలు గుర్తుచేస్తే అందులో ఆ ఫ్యామిలీ డాక్టర్‌ తప్పకుండా గుర్తుకొస్తాడు. వాళ్లలో చాలామంది ఆర్‌ఎంపీలు కావచ్చు.

ఎంబీబీఎస్‌లూ ఉండవచ్చు. సర్జ్‌న్‌లూ కనిపించవచ్చు. కానీ ఫ్యామిలీ డాక్టర్‌గా ఇంటిల్లిపాదినీ కాచుకున్న చరిత్ర వాళ్లది. కానీ ఇప్పుడు పిల్లలకి, మోకాళ్ల నొప్పులకీ, డయాబెటిస్‌కీ, కిడ్నీ రాళ్లకీ… అన్నిటికీ వేర్వేరు డాక్టర్లు. తప్పేం కాదు. కానీ ఈ హడావుడిలో మాయమైపోతున్న ఫ్యామిలీ డాక్టర్ల వ్యవస్థ, దానివల్ల కలుగుతున్న నష్టాలను మాత్రం ఓసారి తలుచుకోవాల్సిందే!

ఓ యాభై ఏళ్ల గతంతో పోల్చుకుంటే ప్రస్తుతం ఆరోగ్యం పట్ల అవగాహన పెరిగింది. రోగాన్ని గుర్తించడం, చికిత్స, మందులు అన్నిటిలోనూ సౌలభ్యం పెరిగింది. రవాణాలో మార్పు వల్ల ‘పెద్దాసుపత్రులు’ మరింత చేరువయ్యాయి. కానీ మన కుటుంబాన్ని గమనించుకోవాల్సిన ఫ్యామిలీ డాక్టర్‌ అవసరం మాత్రం అలాగే ఉంది. ఇంకా మాట్లాడితే తన బాధ్యత మరింత పెరిగింది. కానీ అటువైపు వెళ్తున్న వైద్యులు, వారి దగ్గర చికిత్సను కోరుకునే రోగుల సంఖ్య మాత్రం గణనీయంగా తగ్గిపోతున్నది. నిశ్శబ్దంగా వచ్చిన ఈ మార్పు వెనుక కారణాలు మాత్రం చాలా స్పష్టంగా ఉన్నాయి. దానికంటే ముందు కాస్త మంచిని తల్చుకుందాం…

• ఫ్యామిలీ డాక్టర్‌ అంటే ఇంట్లో మనిషే. మన ఇంట్లో పసిపిల్లల దగ్గర్నుంచీ వృద్ధుల వరకూ ఎవరి సమస్యలు ఏమిటి, వాటికి ఎలాంటి చికిత్సలు జరుగుతున్నాయి, ఏ పనులు చేస్తారు, వారి జీవనశైలి ఎలా ఉంటుంది లాంటి కూలంకషమైన విషయాలన్నీ ఆయనకు కొట్టిన పిండి. దాంతో మన శరీర తత్వాన్ని బట్టి చికిత్స, అవసరాన్ని బట్టి మందులూ ఇస్తారు.
• ప్రపంచ ఆరోగ్య సంస్థ ప్రకారం మన దేశంలో దాదాపు 7.7 కోట్ల మంది మధుమేహంతో బాధపడుతున్నారు. మరో 2.5 కోట్ల మంది మధుమేహానికి చేరువగా ఉన్నారు. అందుకే మన దేశాన్ని మధుమేహ రాజధానిగా పిలుస్తున్నారు. కదలని మెదలని జీవనశైలి వల్లనో, వంశపారంపర్యంగానో ఈ మధుమేహంతో పాటుగా రక్తపోటు, ఊబకాయం లాంటి సమస్యలు వస్తున్నాయి. తరచూ ఫ్యామిలీ డాక్టర్‌ దగ్గరికి వెళ్లి చెకప్‌ చేయించుకోవడం, వాళ్ల మందులు క్రమం తప్పకుండా తీసుకోవడమే వీటికి పరిష్కారం.
• నాన్‌ కమ్యూనికబుల్‌ డిసీజెస్‌. అంటే ఇవి ఒకరి నుంచి ఒకరికి సోకవు. ఆస్తమా నుంచి కిడ్నీ సమస్యల వరకూ చాలా సమస్యలు ఈ కోవలోకే వస్తాయి. కానీ మన ఆయుష్షుకి ఇవే కీలకం. ఓ అంచనా ప్రకారం మన దేశంలో 60 శాతం మరణాలకు ఇవే కారణం. ఆర్థికంగానూ, ఆరోగ్యపరంగానూ భారమయ్యే ఈ పరిస్థితుల్లో ఫ్యామిలీ డాక్టర్‌ది కీలకపాత్ర. సమస్య ముదరకుండా చికిత్స చేయడం దగ్గర్నుంచీ, పెద్దాసుపత్రిలో చికిత్స తీసుకుంటే… తిరిగివచ్చాక గమనించుకోవడం వరకూ తను బాధ్యత తీసుకుంటారు.
• ఓ అంచనా ప్రకారం మన దేశంలో 38 శాతం పిల్లలు, ఉండాల్సిన ఎత్తు కన్నా తక్కువ ఎత్తులో ఉన్నారు. ‘స్టంటెడ్‌’ అనే ఈ సమస్యకు కారణం పోషకాహార లోపమే. సాధారణ దృష్టికి తోచని ఇలాంటి ఎన్నో సమస్యలను డాక్టర్లు చూడగానే పసిగట్టేస్తారు. మన కళ్లజోడు ఫ్రేం నుంచి వేసుకున్న చెప్పుల వరకూ తెలిసీతెలియక చేసే లోపాలను గుర్తుపట్టేస్తారు. వీటన్నిటి గురించి సలహా ఇచ్చే చొరవ, అవకాశం ఫ్యామిలీ డాక్టర్లకే ఎక్కువ.
• మన దేశంలో వైద్యానికి అయ్యే ఖర్చులో 60 శాతం రోగుల కుటుంబాలే భరిస్తున్నాయి. సంస్థలు లేదా బీమా వ్యవస్థ నుంచి అందేది 40 శాతం మాత్రమే అని అంచనా. ఈ నేపథ్యంలో కేవలం అవసరమయ్యే చికిత్సనే అందించే ఫ్యామిలీ డాక్టర్లు మేలు చేస్తున్నట్టే.
• రోగం అనగానే మెడికల్‌ టెస్టులే గుర్తుకు వస్తున్న కాలమిది. రోగ నిర్ధారణ కోసం పరీక్షలు రాసినప్పుడు 88 శాతం రోగులకు అందులో ఒక్క పరీక్షన్నా అనవసరంగా రాస్తున్నారని ఓ నివేదిక చెబుతున్నది. అంతేకాదు తల మీద చిన్నపాటి దెబ్బలకు కూడా సీటీ స్కాన్‌ రాస్తున్నారనీ, లిపిడ్‌ ప్రొఫైల్‌ టెస్ట్‌ మమోగ్రాం లాంటివి తరచుగా అవసరం లేదనీ లలిత్‌ కపూర్‌ అనే సామాజిక ఉద్యమకారుడు హెచ్చరిస్తున్నారు. లేనిపోని ఇలాంటి పరీక్షల వల్ల ఆర్థికపరమైన సమస్యలతో పాటు రోగులు ఉద్వేగానికి కూడా లోనవుతున్నారని డాక్టర్‌ సంజయ్‌ పాటిల్‌ వాపోతున్నారు. ఫ్యామిలీ డాక్టర్‌ పర్యవేక్షణలో ఏ పరీక్ష అవసరం, అసలు దాని లక్ష్యం ఏంటి లాంటి అనుమానాలన్నీ తీరిపోతాయి.

ఫ్యామిలీ డాక్టర్ల కష్టాలు!

ఒకప్పుడంటే పది రూపాయల ఫీజు తీసుకున్నా ఆదాయం కింద చెల్లిపోయేది. కానీ రోజులు మారాయి. వైద్య విద్య పూర్తిచేయడానికి అయ్యే విపరీత ఖర్చులతో పాటు ప్రపంచీకరణ పుణ్యమా అని జీవనశైలి ఖర్చులూ పెరిగిపోయాయి. క్లినిక్‌ల నిర్వహణ వ్యయాలూ పెరిగాయి. ఓ మల్టి స్పెషాలిటీ ఆసుపత్రిలో విజిటింగ్‌ డాక్టర్‌గా పనిచేసినా, కడుపులో చల్ల కదలకుండా వచ్చే ఆదాయం… ప్రత్యేకమైన క్లినిక్‌ల ద్వారా రావడం లేదన్నది చాలామంది ఆవేదన. కేవలం ఆర్థికపరమైన సమస్యలే కాదు! ఇతరత్రా చాలా సమస్యలూ వారిని వేధిస్తున్నాయి.

• జ్వరం వస్తే డోలో, జలుబు చేస్తే రిలెంట్‌, కడుపునొప్పికి మెట్రోజిల్‌… ఇలా మందుల పేర్లు కాకుండా వాటి కంపెనీల పేర్లు ఎప్పుడైతే జనాలకు అలవాటయ్యాయో, ఏ సమస్య వచ్చినా వారే కొనుక్కుని వేసుకోవడం పెరిగిపోయింది. వైద్యుడి చీటీ లేకుండా ‘ఓవర్‌ ద కౌంటర్‌’ మందులను అందించేందుకు విదేశాల్లో చాలా నిబంధనలు ఉన్నాయి. మన దగ్గర మాత్రం నిద్రమాత్రలు సైతం ఎక్కడో అక్కడ దొరికేస్తున్నాయి. భారతీయులు డోలో 650ని చాక్లెట్లు నమిలినట్టు నమిలేస్తున్నారంటూ ఇటీవల పళనియప్పన్‌ అనే వైద్యుడు చేసిన ట్వీట్‌ ఈ పరిస్థితికి అద్దం పడుతుంది. ఇక చిన్నపాటి సమస్యలకు వైద్యులతో పనేముంది.
• కొవిడ్‌ సమయంలో చాలా పనులు ఆన్‌లైన్‌లో చేయవచ్చనే భరోసా ఏర్పడింది. వాటిలో వైద్యం కూడా ఒకటి. అందుకే కేంద్ర ప్రభుత్వం సైతం ఈ-సంజీవని లాంటి ఆన్‌లైన్‌ వైద్య సేవలను అందుబాటులోకి తెచ్చింది. ఇక ప్రాక్టో, 1ఎంజీ లాంటి ప్రైవేట్‌ సేవలు కూడా వైద్యాన్ని ఆన్‌లైన్‌లోకి తెచ్చేశాయి. మన దేశంలో 2022 నాటికి బిలియన్‌ డాలర్ల వ్యాపారంగా ఉన్న ఈ టెలిమెడిసిన్‌ 2030 నాటికి 5 బిలియన్‌ డాలర్లు దాటేస్తుందని ఇన్‌సైట్స్‌ అనే సంస్థ అంచనా వేస్తున్నది. ఇది ఫ్యామిలీ డాక్టర్లకు ప్రత్యక్ష పోటీనే!
• వైద్యం అంటే ఆసుపత్రి, రోగ నిర్ధారణ అంటే పరీక్షలు అనే అభిప్రాయాలు బలపడుతున్నాయి. ముఖ్యంగా నగరాల్లో ఎటుచూసినా హాస్పిటల్సే కనిపిస్తున్నాయి. వీటి సంఖ్య ఏటా 8 శాతం పెరుగుతున్నట్టు తెలుస్తున్నది.
• సాంకేతికత చాలా వేగంగా మారుతున్నా ఇప్పటికీ చాలామంది ఫ్యామిలీ డాక్టర్లు పాత పద్ధతులనే పాటిస్తున్నారనే అపవాదు ఉంది. కొన్ని క్లినిక్‌లలో కనీస శుభ్రత కూడా ఉండదు. డిజిటల్‌ థర్మామీటర్లు సైతం కనిపించని ఇలాంటి క్లినిక్‌లకు వెళ్లేందుకు యువతరం అంత ఆసక్తి చూపించదు. అది సహజం.
• ఏటా మన దేశంలో లక్షమంది వైద్య పట్టా పుచ్చుకుంటున్నారని అంచనా. వీరిలో అతి తక్కువ మంది మాత్రమే ఫ్యామిలీ మెడిసిన్‌ వైపు అడుగులు వేస్తున్నారు. దాంతో ఇప్పటికే ఉన్న వైద్యుల మీద భారం పడుతున్నది. మరీ ముఖ్యంగా గ్రామీణ ప్రాంతాల్లో కుటుంబ వైద్యుల ముందు జనం బారులు తీరాల్సిన పరిస్థితి. ఇది వైద్యుడి పనివేళల మీద విపరీతమైన ఒత్తిడి తెస్తున్నది. పైగా ఇంజక్షన్‌ చేయడం దగ్గర నుంచీ శాంపిల్‌ సేకరణ వరకూ అన్నీ ఒకరే చేయాల్సిన పరిస్థితి ఉంటే ఇక ఆ భారం చెప్పనక్కర్లేదు.

మార్పులూ రావాలి!

• ప్రభుత్వాలు… ఫ్యామిలీ డాక్టర్స్‌ మరీ ముఖ్యంగా గ్రామీణ ప్రాంతాల్లో పనిచేసే వైద్యుల అవసరాన్ని పూర్తిగా గుర్తించినట్టు కనిపించదు. ప్రజల ఆరోగ్యం కోసం వారితో కలిసి పనిచేయాలి. సబ్సిడీలు లాంటి సౌకర్యాలు ఇస్తే కాస్త ఊరటగా ఉంటుంది.
• ఫ్యామిలీ క్లినిక్‌ అంటే పాత, మోటు పద్ధతులు అనే అపవాదును వదులుకోవాలి. డిజిటల్‌ వస్తువులు, పరిశుభ్రత, ఆన్‌లైన్‌ అపాయింట్‌మెంట్‌ లాంటి సదుపాయాలు కల్పిస్తే రోగులకు వెసులుబాటుగా ఉంటుంది.
• ఇతర దేశాలతో పోలిస్తే మన వైద్య సంస్థలు ‘ఫ్యామిలీ మెడిసిన్‌’కి తక్కువ ప్రాధాన్యత ఇస్తాయనీ… జాతీయ స్థాయిలో అందుకు సమగ్రమైన కోర్సులు లేవనే అపవాదు ఉంది. మన వైద్య కోర్సులు ఎక్కువగా ఆసుపత్రులకు లేదా రోగ నిర్ధారణకు ప్రాధాన్యత ఇస్తున్నాయని ఓ పరిశీలన.
• వైద్యరంగంలో ఎప్పటికప్పుడు అనూహ్యమైన మార్పులు వస్తుంటాయి. సదస్సులు, శిక్షణల ద్వారా ఈ సమాచారాన్ని ఎప్పటికప్పుడు ఫ్యామిలీ డాక్టర్లకు అందించాల్సిన బాధ్యత ప్రభుత్వానిదే. కానీ ఆ దిశగా ఎంతవరకు చొరవ ఉందన్నది ప్రశ్నార్థకమే!

ఎవరీ ఫ్యామిలీ డాక్టర్స్‌?

ఎంబీబీఎస్‌ పూర్తి చేసిన తర్వాత ఫ్యామిలీ మెడిసిన్‌ రంగంలో మరో స్పెషలైజేషన్‌ చేస్తే ‘ఫ్యామిలీ ఫిజీషియన్‌’గా గుర్తింపు దొరుకుతుంది. రోగ నిర్ధారణ మొదలుకుని రోగులతో అనుబంధం పెంచుకోవడం వరకూ ఈ కోర్సులో ఓ కుటుంబ వైద్యుడికి ఉండాల్సిన అన్ని నైపుణ్యాలనూ నేర్పిస్తారు. అలాగని వీరు మాత్రమే ఫ్యామిలీ డాక్టర్లుగా చెలామణీ అవ్వాలనే నిబంధన ఏమీ లేదు. ఎంబీబీస్‌తో ఆగిపోయినవారు, ఎంబీబీఎస్‌ తర్వాత సర్టిఫికెట్‌ కోర్సులు చేసినవారు, ఆర్‌ఎంపీ లాంటి కొన్ని గుర్తింపులు తెచ్చుకున్నవారూ… అంతదాకా ఎందుకు! ఏదన్నా రంగంలో స్పెషలైజేషన్‌ చేసినా కూడా అన్నిరకాల వ్యాధులనూ పరిశీలించేందుకు సిద్ధంగా ఉన్నవారు ఫ్యామిలీ డాక్టర్లే!

గ్రామీణ భారతానికి రక్ష!

మన దేశంలో ప్రతీ 834 మందికీ ఓ వైద్యుడు ఉన్నాడని గణాంకాలు చెబుతున్నాయి. చాలా దేశాలతో పోలిస్తే ఇది మెరుగైన సంఖ్యే అని ప్రపంచ ఆరోగ్య సంస్థే చెబుతున్నది. కానీ వీళ్లలో ఎక్కువ శాతం నగరాల్లోనే ఉంటున్నారు. పల్లెల్లో ఉంటున్న నాలుగో వంతు మంది వైద్యులకు తోడు, ఆర్‌ఎంపీలు, ప్రాథమిక ఆరోగ్య నిపుణులే అక్కడి వైద్యానికి కీలకం. 65 శాతం జనాభా గ్రామాల్లోనే ఉండే మన దేశంలో చిన్నాచితకా సమస్యలన్నిటికీ ఫ్యామిలీ డాక్టర్లే సంజీవని. ఆయుష్మాన్‌ భారత్‌ లాంటి పథకాలకైనా, కొవిడ్‌ లాంటి ఉపద్రవాల్లో అయినా ఈ ఫ్యామిలీ డాక్టర్లదే ముఖ్యపాత్ర. మరో విషయం… అపరిశుభ్రత, కలుషిత నీరు లాంటి సమస్యలు అక్షరాస్యత, అవగాహన తక్కువగా ఉండే గ్రామీణ ప్రాంతాల్లోనే ఎక్కువ. వీటి విషయంలో హెచ్చరించే బాధ్యత తీసుకుంటున్నారు అక్కడి వైద్యులు.

డాక్టర్‌ మీదే టెస్టులు

• ‘డాక్టర్‌ గారు అసలే చాలా బిజీగా ఉంటారు, పైగా అక్కడ వెయిటింగ్‌ కూడా ఎక్కువగా ఉంటుంది…. చిన్నచిన్న సమస్యలకు ఆయన్ని కలవకపోవడమే మంచిది’ అని చాలామంది రోగులు తమ ఫ్యామిలీ డాక్టర్‌ను కలిసేందుకు ఇష్టపడరట. కేంబ్రిడ్జ్‌ విశ్వవిద్యాలయం పరిశోధనలో తేలిన విషయం ఇది.
  నిజానికి చాలాసార్లు చిన్నచిన్న సమస్యలే పెద్ద జబ్బులకు లక్షణాలనీ, కాబట్టి అవసరం అనుకున్నప్పుడు సంశయించక వైద్యుడిని కలవాలని వీరు సూచిస్తున్నారు.
• ఒకే ఫ్యామిలీ డాక్టర్‌ని తరచూ కలవడం వల్ల, కొన్నాళ్లకు తనతో ఓ అనుబంధం ఏర్పడుతుందని బ్రిస్టల్‌ విశ్వవిద్యాలయంలో జరిగిన పరిశోధన చెబుతున్నది. దీనివల్ల రోగులు తమ అనారోగ్యాలను మరింత స్పష్టంగా చెబుతున్నారనీ, వాటికి మెరుగైన చికిత్స లభిస్తున్నదనీ తెలుస్తున్నది.
• ఇంగ్లండులో చేసిన ఓ పరిశోధనలో ఫ్యామిలీ డాక్టర్ల మీద ఆధారపడేవారిలో అప్పటికప్పుడు హాస్పిటల్లో అడ్మిట్‌ అయ్యే ప్రమాదం తక్కువని తేలింది. తమ ఆరోగ్యాన్ని తరచూ పర్యవేక్షించుకునే అవకాశం, వ్యాధులు తొలిదశలోనే ఉన్నప్పుడు వాటికి చికిత్స తీసుకోవడమే ఇందుకు కారణం.
• ప్రతీ పరిశోధనా ఫ్యామిలీ డాక్టర్లకు అనుకూలంగా ఉంది అనడానికి లేదు. ఉదాహరణకు కార్డిఫ్‌ విశ్వవిద్యాయం పరిశోధకులు సేకరించిన వివరాల్లో పంటినొప్పి తగ్గడానికని ఫ్యామిలీ డాక్టర్‌ దగ్గరికి వెళ్లినవారికి శాశ్వత పరిష్కారం సూచించకుండా యాంటీబయాటిక్స్‌ ఇవ్వడం వల్ల వారి శరీరం ఆ మందులకు అలవాటుపడిపోయిన సందర్భాలు కనిపించాయి. ప్రతి నొప్పికీ మందే కాదు, ఇతర ‘స్పెషలిస్ట్‌’ చికిత్సలు కూడా అవసరం పడతాయనే విషయాన్ని ఇది సూచిస్తుంది.

ఎలాంటి వ్యక్తిని ఎంచుకోవాలి?

• చాలాసార్లు మనం సంప్రదించే వైద్యుడి అర్హతను గమనించుకోం. తను ఆర్‌ఎంపీ లాంటి కోర్సులు చేశాడా లేదా ఎంబీబీఎస్‌ పట్టా తీసుకున్నాడా లేదా అని గమనించుకోవాలి. అవసరమైతే తన రిజిస్టర్డ్‌ నెంబరుని www.nmc.org.in లాంటి వెబ్‌సైట్ల ద్వారా నిర్మొహమాటంగా పరీక్షించుకోవచ్చు. దేశంలో పదిలక్షల మంది నకిలీ వైద్యులున్నారనే గణాంకాలు వింటే, ఈ తరహా జాగ్రత్త ఎంత అవసరమో అర్థమవుతుంది.
• ప్రతి వైద్యుడికీ ఏదో ఒక ప్రత్యేకత ఉంటుంది. ఏదన్నా సర్టిఫికెట్‌ కోర్సు చేయడం ద్వారానో, ఓ హాస్పిటల్లో పనిచేయడం వల్లో, ప్రత్యేక ఆసక్తితోనో వాళ్లు కొన్ని అంశాల మీద పట్టు సాధిస్తారు. పిల్లల వైద్యం, మధుమేహం, జ్వరాలు, రక్తపోటు… ఇలా ఏదో ఓ నేర్పు ఉండవచ్చు. ప్రత్యేకమైన అవసరాలు ఉన్నవారు అందుకు అనుగుణమైన వైద్యులను ఎంచుకోవాలి.
• వైద్యుడు మనకు దగ్గరలో ఉన్నారా? అప్పుడప్పుడూ కాకుండా ప్రత్యేకమైన క్లినిక్‌లో తగినంత సమయాన్ని కేటాయిస్తుంటారా? తరచూ టూర్ల మీద వెళ్లకుండా అందుబాటులో ఉంటారా? ఫోన్‌కి స్పందిస్తారా? లాంటి అంశాలనూ గమనించుకోవాలి. లేకపోతే నిజంగా తన సలహా, సంప్రదింపు అవసరం అయినప్పుడు అవి దొరక్కపోతే కష్టం.
• ఓ వైద్యుడి దగ్గరికి మొదటిసారి వెళ్లినప్పుడు మన ఆరోగ్య చరిత్రను క్షుణ్నంగా వింటున్నారా? ఏదన్నా సమస్యను చెప్పినప్పుడు దాని కారణాలనీ, జీవనశైలిలో చేసుకోవాల్సిన మార్పులనీ సూచిస్తున్నారా లేకపోతే మందు రాసి పంపేస్తున్నారా? పెడసరంగా కాకుండా ధైర్యాన్నిచ్చేలా మాట్లాడుతున్నారా? మందులు, టెస్టులు రాసినప్పుడు వాటి వెనుక కారణాలు వివరిస్తున్నారా? లాంటి అంశాలన్నీ ఓ వైద్యుడి మీద నమ్మకాన్ని నిర్ధారిస్తాయి.
• ఈసీజీ, మధుమేహ పరీక్ష లాంటి మౌలిక పరికరాలతో పాటు అవసరమైతే కాసేపు చికిత్స చేసి (ఉదా॥ స్లైన్‌ ఎక్కించడం, కుట్లు వేయడం) పంపేందుకు అవసరమయ్యే వసతి ఉందో లేదో గమనించుకోవాలి. ఈ చికిత్సలకు బీమా సౌకర్యం ఉంటే మరీ మంచిది.
• ఒక డాక్టర్‌తో కాసేపు గడిపితే తను ఎంతవరకు ‘కమర్షియల్‌’ అన్నది అర్థమైపోతుంది. కాస్త మానవతా దృక్పథం ఉన్న వైద్యులను ఎంచుకోవడం వల్ల వారితో మానసిక, ఆర్థిక అనుబంధాలు మెరుగ్గా ఉంటాయి.

మన స్థూల జాతీయోత్పత్తిలో కేవలం 2.1 శాతం మాత్రమే బడ్జెట్లో వైద్య రంగం కోసం కేటాయించినట్టు తెలుస్తుంది. దీన్నిబట్టి తక్కువ ఖర్చుతో మెరుగైన వైద్యం అందాల్సిన అగత్యం ఉంది. అందుకు ఒకటే జవాబు! కుటుంబ వైద్యుడు. తను అండగా లేకపోతే దేశంలోని మధ్య, దిగువ తరగతి ప్రజల ఆరోగ్యం గాల్లో దీపంగా మారిపోతుంది. ఇప్పటికీ అయిదురూపాయల డాక్టరు, పదిరూపాయల డాక్టరు అంటూ నామమాత్రపు ఖర్చుతో చికిత్స చేసే వైద్యుల గురించి గొప్పగా చెప్పుకొంటున్నాం అంటే కారణం… మానవతా దృక్పథం ఉన్న వైద్యుల పట్ల మనకు ఉన్న అభిమానమే. అలాంటి వైద్యులకు అండగా నిలిచే ఫ్యామిలీ డాక్టర్‌ రంగాన్ని ఆదరించి, నిలబెట్టడం మన చేతుల్లో కూడా ఉంది.

– కె.సహస్ర