Retirement plan | జీవన చిత్రం ఒక్కోసారి రసాయన చర్య కన్నా వేగంగా మారిపోతుంది. ఇక్కడ ఉత్ప్రేరకంతో పనిలేదు! క్రియా జనితాలను అంచనా వేయకుండా ప్రయోగానికి పూనుకుంటే రసాయన చర్య బెడిసి కొడుతుందని కెమిస్ట్రీ పాఠం చెబుతుంది! అలాగే భవిష్యత్తు దర్శించకుండా వర్తమానంలో తీసుకునే నిర్ణయాలు సగటు మనిషి శేష జీవితాన్ని నిస్సారంగా మార్చేస్తాయి. కొలువులో ఉన్నప్పుడు కాలరెగరేసుకొని తిరిగిన వ్యక్తి కూడా.. సరైన రిటైర్మెంట్ ప్లాన్ చేసుకోకపోతే వయసుడిగిన కాలంలో పరాధీనం కాకతప్పదు! పదవీ విరమణ తర్వాత మీ బతుకు జట్కాబండి పగ్గాలు మీ చేతుల్లో ఉండాలంటే ఈ సూత్రాలు ఫాలో అయిపోండి..
ప్రతి మనిషికీ కొన్ని ఆర్థిక లక్ష్యాలు ఉంటాయి. ఇల్లు, కారు, పిల్లల చదువు, వాళ్ల సెటిల్మెంట్ ఇలా జీవిత గమనంలో ఎన్నో మలుపులు ఎదురవుతాయి. ప్రతి మలుపులోనూ గెలుపు చూసిన వాళ్లలో చాలామంది రిటైర్మెంట్ మలుపు దగ్గర స్టీరింగ్ కంట్రోల్ చేయలేకపోతున్నారు. దూరదృష్టి లోపమే ఇందుకు ప్రధాన కారణం. ఆర్థిక లక్ష్యాల్లో రిటైర్మెంట్ ప్లాన్ ఆఖరిది అని భావించిన చాలామంది పరిస్థితి అగమ్యగోచరంగా మారిపోతున్నది! మీకు ఇలాంటి ఇబ్బంది ఎదురవ్వొద్దంటే.. ఆర్థిక లక్ష్యాల్లో రిటైర్మెంట్ ప్రణాళికకు ప్రాధాన్యం ఇవ్వండి.
ఆరోగ్య బీమా ఓ ధైర్యం
‘రిటైర్ అయ్యాక ఇంటి పట్టునే ఉండే మా ఇద్దరికీ లక్షలు కావాలా?’ ఈ భావన చాలామందిలో కనిపిస్తుంది. కానీ, అసలు ఖర్చులన్నీ అప్పుడే తడిసి మోపెడవుతాయి. కొడుకులూ, కోడళ్లూ దూరంగా ఉన్నా.. అనారోగ్యం మాత్రం తరచూ పలకరిస్తూ ఉంటుంది. ఆర్థికంగా బలంగా ఉంటే ఎంతటి ఆరోగ్య సమస్య తలెత్తినా ధైర్యం ఉంటుంది. ‘రిటైర్ అయ్యాక హెల్త్ ఇన్సూరెన్స్ తీసుకుందాంలే!’ అనుకుంటే పొరపాటు. అప్పుడు సవాలక్ష షరతులు పుట్టుకొస్తాయి.
చికిత్సకైన ఖర్చు బీమాలో కవర్ కాకపోతే, మలి వయసులో ఆర్థికంగా దెబ్బతిని, మానసికంగా మరింత కుంగిపోయే ప్రమాదం ఉంటుంది. అందుకే, ఆరోగ్యంగా ఉన్నప్పుడే హెల్త్ ఇన్సూరెన్స్ తీసుకోవాలి. అప్పుడు ఏ ఇబ్బంది వచ్చినా ఆస్పత్రికి కూడా వెకేషన్లా వెళ్లిరావచ్చు.
చరాస్తి ప్రధానం..
పదవీ విరమణకు చేరువ అవుతుండగానే.. కొన్ని జాగ్రత్తలు పాటించాలి. అందులో ఒకటి స్థిరాస్తులను తగ్గించుకోవడం. అలాగని ఉన్న ఆస్తులన్నీ అమ్మేయమని కాదు. నెలనెలా రాబడి ఇవ్వని ఆస్తులను ఉంచుకోవడం వల్ల ఎలాంటి లాభమూ ఉండదు. ఉన్న స్థిరాస్తుల్లో నిరర్థకమైనవాటిని అమ్మి
పేపర్ అసెట్స్
(చరాస్తి)గా మార్చుకోవాలి. ప్రభుత్వ ఉద్యోగిగా పనిచేసినట్లయితే వస్తున్న పెన్షన్ ఎంతవరకు సరిపోతుందో అంచనాకు రావాలి. లోటు బడ్జెట్ ఉన్నట్లయితే దాన్ని పూడ్చుకునేలా అదనపు ఆదాయం సమకూర్చుకోవాలి. పెన్షన్ రానివాళ్లు మరింత జాగ్రత్తగా పొదుపు చేసుకోవాలి. ఉద్యోగంలో ఉన్నప్పుడే సరైన మార్గాల్లో మదుపు చేసి రిటైర్ అయ్యేనాటికి పెద్దమొత్తంలో నిధులు సమకూర్చుకోవాలి. భార్యాభర్తలిద్దరూ నెలంతా హాయిగా గడపడానికి ఎంత కావాలో, అంత వడ్డీ రూపంలో వచ్చేంత మొత్తాన్ని బ్యాంక్లో ఫిక్స్డ్ డిపాజిట్ చేసుకోవాలి. పెన్షన్ ప్లాన్స్, మ్యూచువల్ ఫండ్స్ ఏది ఎంచుకున్నా.. మీ అవసరాలను తీర్చేంత ఉండాలి.
భావోద్వేగాలకు లొంగొద్దు
పదవీ విరమణ కాగానే పెద్దమొత్తంలో డబ్బు చేతిలో ఉంటుంది. ఆ సొమ్మును కొడుకులకూ, కూతుళ్లకూ ఘనంగా పంచేసి ‘రామా కృష్ణా’ అనుకుంటూ కూర్చుంటానంటే ఈ రోజుల్లో కుదరదు. ఒక్కసారిగా భారీగా డబ్బు కండ్లకు కనిపించేసరికి ఏదో స్థిరాస్తి కొనుగోలు చేయాలనే ఆలోచన చాలామందికి కలుగుతుంది. ఉన్న ఇంటిని అభివృద్ధి చేయాలనే తపన కూడా కలుగుతుంది. ఉదాహరణకు ఒక వ్యక్తి రిటైర్ అయ్యాక కోటి రూపాయలు పెట్టి ఇల్లు కొన్నాడే అనుకుందాం. ఆ ఇంటి మీద గరిష్ఠంగా రూ.30 వేల అద్దె వస్తుంది. అదే కోటి రూపాయలు ఫిక్స్డ్ డిపాజిట్ చేసినా నెలకు రూ.60వేల వరకూ వడ్డీ వస్తుంది కదా! దీనికి తోడు స్థిరాస్తులు ఉన్నట్లయితే, ‘మా పేరు మీదికి ఎప్పుడు మారుస్తారు’ అని పిల్లల నుంచి ఒత్తిడి కూడా రావచ్చు. అత్యవసర పరిస్థితుల్లో .. ఇల్లు అమ్ముదాం అనుకున్నా కొనేవాళ్లు దొరక్కపోవచ్చు. అదే లిక్విడ్ క్యాష్ రూపంలో ఉన్నట్లయితే, మీ తదనంతరమే ఆ డబ్బు గురించిన ఆలోచన కలుగుతుంది. ఊహించని సందర్భాలు ఎదురైనప్పుడు ఎంత కావాలనుకుంటే అంత తీసుకునే వెసులుబాటూ ఉంటుంది. అందుకే ఆస్తుల పెంపకం, పంపకం ఈ రెండూ రిటైర్మెంట్ తర్వాత చేయకూడని పనులు. ఆర్థికంగా బలంగా ఉన్నప్పుడే శేష జీవితం ప్రశాంతంగా సాగుతుందని మరవొద్దు!!
మీరు రిటైర్ అవుతారు కానీ, ద్రవ్యోల్బణానికి పదవీ విరమణ ఉండదు. ఏటికేడూ పెరుగుతూనే ఉంటుంది. దానికి తగ్గట్టుగా ఖర్చులూ పెరుగుతాయి. వైద్య వ్యవస్థలో వస్తున్న మార్పుల కారణంగా, జీవన ప్రమాణాలూ పెరుగుతున్నాయి. రిటైర్ అయ్యాక కూడా మరో పాతికేండ్లు బతికే రోజులు ఇవి. ఈ 25 ఏండ్లు ప్రశాంతంగా జీవించాలంటే ఆర్థికంగా స్వావలంబన కలిగి ఉండటం ఒక్కటే మార్గం. వయసులో ఉండగానే పక్కా రిటైర్మెంట్ ప్రణాళిక సిద్ధం చేసుకోవడం.
– ఎం. రాం ప్రసాద్ సర్టిఫైడ్ ఫైనాన్షియల్ ప్లానర్ ram@rpwealth.in www.rpwealth.in