కాబోయే అమ్మల కోసం..

కాబోయే తల్లులకు మాత్రం.. ఫ్యాషనబుల్‌గా ఉండాలని అనిపించదా? సౌకర్యవంతమైన దుస్తులు ధరించాలని ఉండదా? అందులోనూ ఆ సమయంలో ఆమె మనసుకు ప్రశాంతత అవసరం.

కాబోయే తల్లులకు మాత్రం.. ఫ్యాషనబుల్‌గా ఉండాలని అనిపించదా? సౌకర్యవంతమైన దుస్తులు ధరించాలని ఉండదా? అందులోనూ ఆ సమయంలో ఆమె మనసుకు ప్రశాంతత అవసరం. ఒంటి మీద ఏదో ఒకటి వేలాడదీసుకుంటే.. ఇబ్బందిగా అనిపించదూ? అందుకే, అభి కల్యాణి అనే మామ్‌ప్రెన్యూర్‌ గర్భిణుల కోసం ఓ రంగుల ప్రపంచాన్ని సృష్టించింది.

ఆ చెన్నై యువతి ‘తొట్టిల్‌ మెటర్నిటీ’ పేరుతో ఓ స్టార్టప్‌కు ప్రాణం పోసింది. అలా అని, తనేం పారిశ్రామికవేత్త కూతురో, కోడలో కాదు. సామాన్య మహిళ. రంపపు కోతను తలపించే వైవాహిక బంధం నుంచి బయటపడింది. అప్పటికే తను పదినెలల గర్భిణి. చేతిలో చిల్లిగవ్వ లేదు. మేమున్నామని ఆదుకునేవారు లేరు. ఆ దుర్మార్గుడు పట్టా కాగితాలు కూడా తగులబెట్టేశాడు. దీంతో ఉద్యోగం దొరకడం అసాధ్యమైంది. అయినా సరే వెనకడుగు వేయలేదామె. తమిళంలో తొట్టిల్‌ అంటే.. ఊయల.

త్వరలోనే, తన నట్టింట్లో ఊయలలూగబోయే బిడ్డకు బంగారు భవిష్యత్తు కల్పించాలన్నదే అభి లక్ష్యం. కాబట్టే, అదే పేరుతో ఓ అంకుర సంస్థను స్థాపించింది. ప్రత్యేకించి గర్భిణుల కోసం మాక్సీ డ్రెస్‌లు, కుర్తీలు, బ్లౌజులు, నైట్‌ గౌన్‌లు, ఫొటోషూట్‌ గౌన్‌లు.. ఇలా అనేకం డిజైన్‌ చేసింది. ఇప్పటికే ఆన్‌లైన్‌లో ఈ ఉత్పత్తులు ఆదరణ పొందాయి. గత ఏడాది చెన్నైలోని ఆళ్వార్‌పేటలో ఓ ఆఫ్‌లైన్‌ స్టోర్‌ కూడా ప్రారంభించింది కల్యాణి.