కెరీర్లో నడి వయసు ఓ సంక్షోభం. ఉన్న నైపుణ్యాలు పాతబడిపోతాయి. కొత్త నైపుణ్యాలు తలకెక్కవు. అప్పుడే బరిలోకి దూకిన నవతరం తమదైన సాంకేతిక ప్రతిభతో పాతకాలపు పనితనానికి సవాలు విసురుతుంది. ఈ సమయంలో ఫార్టీ ప్లస్ ఉద్యోగికి చదువు, కెరీర్, లైఫ్ కౌన్సెలింగ్.. ఈ మూడూ అవసరం అవుతాయి. నేహా కామని నేతృత్వంలోని ‘సెవెన్ హ్యాట్స్’ ఈ బాధ్యత తీసుకున్నది. ఇప్పటికే ఆమె అనేకమందిని కెరీర్ సంక్షోభం నుంచి ఒడ్డునపడేసింది. అదే సమయంలో కళాశాల విద్యార్థులకు జీవితం పట్ల స్పష్టతనిస్తూ శిక్షణ తరగతులు తీసుకుంటున్నది. ‘పాతబడిన పనిముట్లను అటకెక్కించండి. పాత పద్ధతులను పక్కన పెట్టండి. కొత్త ఆయుధాలను ఎంచుకోండి’ అంటారామె.
అమెరికాలోని యూనివర్సిటీ ఆఫ్ పెన్సిల్వేనియాలో చదివింది నేహ. మీ లక్ష్యం ఏమిటన్నది చెబితే చాలు.. దాన్ని చేరుకునే మార్గం బోధిస్తుంది. మీ కల ఏమిటన్నది వివరిస్తే చాలు.. దాన్ని నిజం చేసుకునే మార్గాలు చూపుతుంది. ‘మా శిక్షణ ఫలితంగా నచ్చిన కాలేజీలలో సీటు తెచ్చుకున్నవారు, కోరిన కొలువులలో విజయాలు సాధిస్తున్నవారు ఎంతోమంది’ అని గర్వంగా ప్రకటిస్తుంది నేహ. విజయానికి దగ్గరి మార్గాలు లేకపోవచ్చు. కానీ సుదూర ప్రయాణమూ మంచిది కాదు. దీనివల్ల అలసిపోతాం. వెనుకబడిపోతాం. అదే, చేతిలో ఓ దిక్సూచి ఉంటే.. ఇబ్బంది ఉండదు. నేరుగా చేరాల్సిన చోటికి, చేరాల్సిన సమయానికే చేరుతాం. అలాంటి ఓ పనిముట్టే ‘సెవెన్ హ్యాట్స్’.