గురుకుల బాలిక.. కోడింగ్‌ కేక!

నా పేరు కల్లూరి ఝాన్సీ. నిర్మల్‌ జిల్లాలోని నర్సాపూర్‌ సొంతూరు. అమ్మానాన్న టీచర్లు. నాలుగో తరగతి వరకు స్థానిక ప్రైవేట్‌ స్కూల్‌లో చదువుకున్నా. ఆ తర్వాత, అమ్మ నాతో తెలంగాణ గురుకుల ప్రవేశ పరీక్ష రాయించింది.

ఆ విద్యార్థిని కోడింగ్‌లో అద్భుతాలు సాధిస్తున్నది. గని కార్మికుల భద్రతకు భరోసానిచ్చే ఆవిష్కరణ సిద్ధం చేస్తున్నది. రోమ్‌లో జరుగనున్న ‘మేకర్స్‌ ఫెయిర్‌’కు ఎంపికైన ఏకైక భారతీయురాలిగా రికార్డు సాధించింది. అలా అని, కల్లూరి ఝాన్సీ ఐటీ దిగ్గజాల ఇంట్లో పుట్టలేదు. ఇంటర్నేషనల్‌ స్కూల్స్‌లో చదువుకోలేదు. తెలంగాణ గురుకుల పాఠశాల ఆవరణే తనకు కోడింగ్‌ పాఠాలు నేర్పింది, సృజనాత్మకంగా ఆలోచించడమూ బోధించింది. ఆ సాంకేతిక ప్రయాణమంతా ఝాన్సీ మాటల్లోనే..

నా పేరు కల్లూరి ఝాన్సీ. నిర్మల్‌ జిల్లాలోని నర్సాపూర్‌ సొంతూరు. అమ్మానాన్న టీచర్లు. నాలుగో తరగతి వరకు స్థానిక ప్రైవేట్‌ స్కూల్‌లో చదువుకున్నా. ఆ తర్వాత, అమ్మ నాతో తెలంగాణ గురుకుల ప్రవేశ పరీక్ష రాయించింది. మంచి మార్కులు రావడంతో.. పోచంపాడు తెలంగాణ సోషల్‌ వెల్ఫేర్‌ ఎడ్యుకేషనల్‌ రెసిడెన్షియల్‌ ఇన్‌స్టిట్యూషన్‌ సొసైటీ (టీఎస్‌డబ్ల్యూఈఆర్‌ఐఎస్‌)లో ఐదో తరగతి ప్రవేశానికి అవకాశం లభించింది. ఇక్కడ క్రీడలు, పోటీ పరీక్షలు, కోడింగ్‌ తదితర అంశాల్లో శిక్షణ ఇస్తారు. ఏడో తరగతిలో ఉన్నప్పుడు..

ప్రవేశ పరీక్ష రాసి మొయినాబాద్‌లోని కోడింగ్‌ అకాడమీకి ఎంపిక అయ్యాను. మా ఊరి నుంచి వందల కిలోమీటర్ల దూరం. అంతదూరం వెళ్లడానికి మొదట్లో భయంగా అనిపించింది. అంతలోనే, నా ఆశయం గుర్తుకొచ్చింది. ధైర్యంగా బయల్దేరాను. అక్కడినుంచి నా జీవితం మారిపోయింది. నా ఆలోచనలూ మారిపోయాయి. క్లాస్‌రూమ్‌లో ఉపాధ్యాయులు బోధించే ప్రతి పాఠాన్నీ సమాజానికి అన్వయించి అర్థం చేసుకోవడం అలవాటైంది. ప్రపంచం ఎదుర్కొంటున్న ఎన్నో సమస్యలకు కోడింగ్‌లో పరిష్కారం ఉంది. మనదైన సృజనతో వెదికి పట్టుకోవాలంతే. కోడింగ్‌.. ఆధునిక ప్రపంచ భాష. ఈ సందర్భంగా ఒక సంఘటన గురించి చెప్పాలి. ఎనిమిదో తరగతిలో.. మా సోషల్‌ టీచర్‌ ‘మైనింగ్‌ అండ్‌ మినరల్స్‌’ పాఠం, తెలుగు టీచర్‌
‘సింగరేణి’ పాఠం ఒకే రోజు బోధించారు. అప్పుడే, గని కార్మికుల సమస్యలకు పరిష్కారంగా ఓ ఆవిష్కరణ చేయాలనే ఆలోచన వచ్చింది.

వర్క్‌ఫోర్స్‌ గార్డియన్‌ మైనింగ్‌

పరిశ్రమలో సిబ్బంది భద్రత కత్తిమీద సాము లాంటిది. డ్యూటీకి వెళ్లిన ఉద్యోగి సురక్షితంగా ఇంటికి చేరితే అదృష్టంగా భావించాల్సిన పరిస్థితి. ఈ సాంకేతిక యుగంలోనూ అదృష్టాన్ని నమ్ముకోవడం ఏమిటి? అందుకే నేను ఉద్యోగిని కంటికి రెప్పలా కాపాడుకునేలా ‘వర్క్‌ఫోర్స్‌ గార్డియన్‌’ పేరుతో హెల్మెట్‌ డిజైన్‌ చేయాలని నిర్ణయించాను. నా ఆలోచనలకు కోడింగ్‌ నైపుణ్యాన్ని జోడించాను. ఈ శిరస్ర్తాణం రాబోయే
ఆపదను ముందుగానే గుర్తించి కార్మికులను హెచ్చరిస్తుంది. కాంతి తీవ్రతను కొలుస్తుంది. మితిమీరిన వెలుతురు కంటికి ఇబ్బంది కలిగించకుండా నియంత్రిస్తుంది.

పరిసరాల్లోని తేమ, ఉష్ణోగ్రతను పర్యవేక్షిస్తుంది. అలసట, అనారోగ్యం వల్ల.. సిబ్బందికి మగతగా ఉంటే కనిపెట్టి చెబుతుంది. ప్రకృతి విపత్తుల సమయంలో ఫలానా ఉద్యోగి గనిలో ఏ ప్రాంతంలో ఉన్నాడనే సమాచారాన్ని మేనేజర్‌కు తెలియజేస్తుంది. ప్రమాదకర వాయువులను గుర్తించి అప్రమత్తం చేస్తుంది. కార్మికుడి ఆరోగ్య స్థితినీ పర్యవేక్షిస్తుంది. ఈ ఆవిష్కరణే నన్ను త్వరలో రోమ్‌లో జరుగనున్న ‘మేకర్స్‌ ఫెయిర్‌’కు ఎంపిక చేసింది. ఈ అరుదైన అవకాశం భారతదేశం నుంచి నాకే లభించింది. మా అన్నయ్య తొలిసారిగా ఇంజినీరింగ్‌లో నేర్చుకున్న కోడింగ్‌ మీద, నేను ఆరో తరగతిలోనే పట్టుసాధించాను. తెలంగాణ సోషల్‌ వెల్ఫేర్‌ సొసైటీ హైస్కూల్‌ స్థాయి నుంచే కోడింగ్‌ పాఠాలు బోధించడం వల్లే ఇదంతా సాధ్యమైంది. ఇప్పుడు నేను పదో తరగతి చదువుతున్నా. ఇంటర్నెట్‌ ఆఫ్‌ థింగ్స్‌, పైథాన్‌ ప్రోగ్రామింగ్‌, వెబ్‌ టెక్నాలజీ, యాప్‌, గేమ్‌ డెవలప్‌మెంట్‌.. తదితర అంశాలు కొట్టినపిండి. సొంతంగా అభివృద్ధి చేయగలను కూడా. ఈ నైపుణ్యం నాలో విశ్లేషణ శక్తిని పెంచింది. సృజనాత్మకతకు రెక్కలు తొడిగింది. కోడింగ్‌ నన్ను డిజిటల్‌ ప్రపంచంతో అనుసంధానం చేసింది. ఓ సాధారణ విద్యార్థి అయిన నన్ను ఇన్నొవేటర్‌గా తీర్చిదిద్దిన టీఎస్‌డబ్ల్యూఆర్‌ కోడింగ్‌ అకాడమీ ప్రిన్సిపల్‌కు, ఉపాధ్యాయులకు, తల్లిదండ్రులకు కృతజ్ఞతలు.

• ఇది సర్కారు ఘనతే

రోమ్‌లో జరుగనున్న ‘మేకర్స్‌ ఫెయిర్‌”కు ఎంపికైన ఏకైక భారతీయ విద్యార్థిగా మా కోడింగ్‌ అకాడమీకి చెందిన ఝాన్సీ ఘనత సాధించింది. నిరుపేద విద్యార్థులు కూడా అధునాతన సాంకేతికత వైపు దూసుకుపోవాలనే లక్ష్యంతో కోడింగ్‌ అకాడమీని ప్రారంభించిన సీఎం కేసీఆర్‌కు కృతజ్ఞతలు. హైస్కూల్‌ స్థాయిలోనే కోడింగ్‌ నేర్పాలనే ప్రభుత్వ ముందుచూపే అంతర్జాతీయ స్థాయి ఫెయిర్‌కు మా విద్యార్థి ఎంపికకు కారణం. భవిష్యత్తులోనూ అకాడమీ నుంచి ఇలాంటి ఆణిముత్యాలు మరిన్ని రాబోతున్నాయని గర్వంగా చెప్పగలను.

• నాగమణిమాల, ప్రిన్సిపల్‌ టీఎస్‌డబ్ల్యూఆర్‌ కోడింగ్‌ అకాడమీ మొయినాబాద్‌

…? రాజు అతికం