Children Stories | జరమొచ్చి కచేరీలకు రాని బీర్బల్‌కు భలే తమాషా పరీక్ష పెట్టిన అక్బర్‌

Children Stories | అకుబర్‌, బీరుబల్‌ కతలు మీకు ఎరుకే గదా! ఇది అసొంటి కతనే! ఒకపారి పాపం బీరుబల్‌కు జరమొచ్చింది. కచేరీలకు నాలుగైదు దినాలు పోలేదు. బీరుబల్‌ రాకపోయేటాలకు.. దినాము పొద్దువోలేదు అకుబర్‌కు. ఆల్లనీల్లను అడిగితె.. జరమచ్చింది, గందుకే కచేరీలకు అత్తలేడంట జెప్పిండ్రు.

November 26, 2023 / 05:37 AM IST

Children Stories | జరమొచ్చి కచేరీలకు రాని బీర్బల్‌కు భలే తమాషా పరీక్ష పెట్టిన అక్బర్‌

Children Stories | అకుబర్‌, బీరుబల్‌ కతలు మీకు ఎరుకే గదా! ఇది అసొంటి కతనే! ఒకపారి పాపం బీరుబల్‌కు జరమొచ్చింది. కచేరీలకు నాలుగైదు దినాలు పోలేదు. బీరుబల్‌ రాకపోయేటాలకు.. దినాము పొద్దువోలేదు అకుబర్‌కు. ఆల్లనీల్లను అడిగితె.. జరమచ్చింది, గందుకే కచేరీలకు అత్తలేడంట జెప్పిండ్రు. తన తాన పనిజేశిన చిన్నప్పటి సోపతాయె! సూసద్దమని ఇంటికి వోయిండు. అకుబర్‌ పోయెటాలకు నెత్తిమీద తడి బట్ట గప్పుకొని మంచం మీద ఉన్నడు బీరుబల్‌. అకుబర్‌ను సూడంగనే చేయిలేపి సలాం జేశిండు. నాలుగైదు దినాల సంది తిండి తిప్పలు లేకపోయె వరకు బీరుబల్‌ పీనుగోలె అయిండు. ఆయినెను సూసి.. మునుపటి క్యాలి ఉందా? లేదా? సూడాలనుకున్నడు అకుబర్‌.

అంతట్లకే దూపయి నీళ్లు తాగనీకి మెల్లగ లేశి, పక్క అర్రలకు పోయిండు బీరుబల్‌. ఆయినె పోవుడుతోనే.. జేబులకెల్లి రుమాలు దీసి, బీరుబల్‌ మెత్తకింద వెట్టి.. ఏం దెలువనట్టే గూకున్నడు అకుబర్‌. నీళ్లు తాగి అచ్చినంక మెత్తమీద తలకాయ వెట్టంగనే.. ఎట్లనో అనిపియ్యవట్టింది బీరుబల్‌కు. అటూఇటూ బొర్రవట్టిండు. ఏడనో కిందమీదైనట్టు అనిపిచ్చింది. ఆయినె ఆపసోపాలు వడుడు సూశి.. “ఏమైంది? గట్ల జేస్తున్నవు” అంట అడిగిండు అకుబర్‌. “ఇంతట్లకే నా మంచం మీద ఏదో కిందమీదైంది. ఏమైందో తెలుత్తలేదు” అన్నడు బీరుబల్‌. “ఏ జరమచ్చింది గదా! అట్లనే గొడ్తది. ఏంగాలే!” అంట అన్నడు అకుబర్‌. “కాదు కాదు. మెత్త కింద ఏదో ఎత్తుగ గొడ్తంది!” అంట శెయ్యి వెట్టిండు. శెయ్యికి రుమాలు తలిగింది. అది దీస్కొని.. “గింత శిన్న బట్టముక్క ఆడ వెడితె.. నీకు ఎట్ల తెలిశింది?” అంట అడిగిండు అకుబర్‌. దానికి బీరుబల్‌.. “హజూర్‌! జరం నా పెయ్యికి అచ్చింది గని.. నా మనసుకు గాదు గదా!” అంట అనంగనే.. “కావాల్ననే పరీచ్చవట్టి సూద్దామని వెట్టిన!” అంట అన్నడు అకుబర్‌.

– పత్తిపాక మోహన్