Telangana | ఆటలకు అందలమిస్తున్న ప్రభుత్వం.. క్రీడల్లో కొత్త శకం

నాటి సమైక్య పాలనలో తీవ్ర నిరాదరణకు గురైన క్రీడలు నేటి ప్రత్యేక తెలంగాణలో ప్రగతి పథంలో దూసుకెళుతున్నాయి. స్వరాష్ట్రం ఏర్పడిన నాటి నుంచి నేటి వరకు ఆటలకు అందలమిస్తున్న ప్రభుత్వం దేశానికి దిక్సూచిలా నిలుస్తున్నది. ఆటలు ఆరోగ్యానికే కాదు సమాజానికి మేలు చేకూరుస్తాయన్న సదుద్దేశంతో సీఎం కేసీఆర్‌ ఆలోచనలకు అనుగుణంగా కనీవినీ ఎరుగని రీతిలో సౌకర్యాలను అందుబాటులోకి తెచ్చారు.

• పదేండ్లలో అద్భుత ప్రగతి..
• స్టేడియాలు, క్రీడా ప్రాంగణాల నిర్మాణం
• సీఎం కేసీఆర్‌ విజన్‌తో మరింత ముందుకు

Telangana | నాటి సమైక్య పాలనలో తీవ్ర నిరాదరణకు గురైన క్రీడలు నేటి ప్రత్యేక తెలంగాణలో ప్రగతి పథంలో దూసుకెళుతున్నాయి. స్వరాష్ట్రం ఏర్పడిన నాటి నుంచి నేటి వరకు ఆటలకు అందలమిస్తున్న ప్రభుత్వం దేశానికి దిక్సూచిలా నిలుస్తున్నది. ఆటలు ఆరోగ్యానికే కాదు సమాజానికి మేలు చేకూరుస్తాయన్న సదుద్దేశంతో సీఎం కేసీఆర్‌ ఆలోచనలకు అనుగుణంగా కనీవినీ ఎరుగని రీతిలో సౌకర్యాలను అందుబాటులోకి తెచ్చారు. గ్రామీణ ప్రాంతాల్లో ప్రతిభ కల్గిన ప్లేయర్లను ప్రపంచంతో పోటీపడే విధంగా తీర్చిదిద్దాలనే తలంపుతో ఓవైపు స్టేడియాల నిర్మాణం, మరోవైపు క్రీడా ప్రాంగణాలు ఏర్పాటు చేసి కొత్త శకానికి నాందిపలికారు. జాతీయ, అంతర్జాతీయ వేదికలపై దేశ ఖ్యాతిని దశదిశలా ఇనుమడింపజేయాలన్న కేసీఆర్‌ విజన్‌ను అందిపుచ్చుకుంటూ క్రీడాశాఖ, సాట్స్‌ ముందుకు సాగుతున్నాయి. ప్రభుత్వ ఉద్యోగాలు, ఉన్నత చదువుల్లో రిజర్వేషన్‌ కోటాను అమలు చేస్తూ ప్రభుత్వం క్రీడలకు సముచిత ప్రాధాన్యం కల్పిస్తున్నది. ప్రతిష్ఠాత్మక టోర్నీల్లో పతకాలు సాధించిన ప్లేయర్లను భారీ నగదు ప్రోత్సాహకాలతో సత్కరిస్తున్నది. ఆరోగ్య తెలంగాణ సాకారమే లక్ష్యంగా అవిరళ కృషి చేస్తున్న ప్రభుత్వం దశాబ్ది ఉత్సవాల వేళ క్రీడాప్రగతిపై ప్రత్యేక కథనం.

తెలంగాణలో క్రీడలు సర్వతోముఖాభివృద్ధి సాధిస్తున్నాయి. ప్రత్యేక రాష్ట్రం ఏర్పడ్డ తర్వాత అభివృద్ధి పథంలో దూసుకెళుతూ దేశానికి దిక్సూచిలా నిలుస్తున్నాయి. మిగతా రంగాల్లో వలే క్రీడలకు అధిక ప్రాధాన్యమిస్తూ దేశంలో మొదటి స్థానంలో నిలుపాలన్న సీఎం కేసీఆర్‌ ఆలోచనలతో ప్రభుత్వం ముందుకెళుతున్నది. గడిచిన దశాబ్ద కాలంలో రాష్ట్ర క్రీడారంగంలో స్పష్టమైన మార్పు కనిపిస్తున్నది. రాష్ట్రం ఏర్పడక ముందు స్పోర్ట్స్‌ స్కూల్‌ హకీంపేటకు పరిమితం కాగా, స్వరాష్ట్రంలో కరీంనగర్‌, ఆదిలాబాద్‌లో ఏర్పాటుతో క్రీడాకారులకు మరింత చేరువైంది. దీనికి తోడు రాష్ట్రంలో ప్రతీ నియోజకవర్గానికి మినీ స్టేడియం నిర్మాణాలు చురుకుగా సాగుతున్నాయి. ఇప్పటికే 80 నియోజకవర్గాల్లో 113 నిర్మాణాలు, ఆధునీకరణ పనులకు గాను ప్రభుత్వం రూ.231.56 కోట్లు మంజూరు చేయడం జరిగింది. ఇందులో రూ.85.25 కోట్లతో 41 నిర్మాణాలు పూర్తయ్యాయి. మిగిలిన 34 నిర్మాణ దశలో ఉన్నాయి. ఇలా వీటికి తోడు రాష్ట్రంలో ఆరు స్పోర్ట్స్‌ అకాడమీలు ప్లేయర్లకు అందుబాటులోకి వచ్చాయి. వనపర్తి(బాస్కెట్‌బాల్‌), మహబూబ్‌నగర్‌, సిరిసిల్ల, రంగారెడ్డి (వాలీబాల్‌), గజ్వేల్‌ (ఫుట్‌బాల్‌), సిద్దిపేటలో ప్లేయర్లు మెరుగైన తర్ఫీదు పొందుతున్నారు. మరోవైపు ఉస్మానియా యూనివర్సిటీ (ఓయూ) వెలోడ్రమ్‌లో సైక్లింగ్‌, రెజ్లింగ్‌ సాట్స్‌ అకాడమీల ద్వారా ప్రతిభ కల్గిన యువ ప్లేయర్లు వెలుగులోకి వస్తున్నారు.

సీఎం కేసీఆర్‌ నాయకత్వంలో రాష్ట్రం అన్ని రంగాల్లో అభివృద్ధి పథంలో దూసుకెళుతున్నది. అన్ని రంగాల్లో అభివృద్ధి లాగానే క్రీడల్లోనూ దేశం దృష్టికి అగుపించేలా ప్రభుత్వం కార్యక్రమాలు చేపడుతున్నది. సీఎం కేసీఆర్‌ ఆలోచనలకు అనుగుణంగా మంత్రి శ్రీనివాస్‌గౌడ్‌ సహకారంతో సాట్స్‌ ముందుకెళుతున్నది. క్రీడారంగాన్ని మరింత బలోపేతం చేసేందుకు స్టేడియాల నిర్మాణం, గ్రామీణ క్రీడా ప్రాంగణాలను భారీ ఎత్తున ఏర్పాటు చేశాం. ప్రైవేట్‌ కార్పొరేట్‌ సంస్థల సహకారంతో దేశంలో తెలంగాణను నంబర్‌వన్‌గా తీర్చిదిద్దేందుకు సాట్స్‌ కృషి చేస్తుంది.

– ఆంజనేయగౌడ్‌, సాట్స్‌ చైర్మన్‌

క్రీడా మౌలిక సదుపాయాలు

• రాష్ట్రంలో కరీంనగర్‌, వరంగల్‌, మెదక్‌ జిల్లాల్లో 8 లైన్‌ 400 మీటర్ల సింథటిక్‌ ట్రాక్‌ను ప్రభుత్వం రూ.19.50 కోట్లతో నిర్మించింది.
• రాష్ట్ర వ్యాప్తంగా 12,685 గ్రామాల్లో క్రీడా ప్రాంగాణాలు ఏర్పాటు చేశారు. మరికొన్ని త్వరలో అందుబాటులోకి రానున్నాయి. గ్రామీణ ప్రాంత ప్లేయర్లను వెలుగులోకి తీసుకొచ్చే ఉద్దేశంతో ప్రాంగణాలను నిర్మించారు. ఇదిలా ఉంటే ప్రతీ గ్రామానికి 23 క్రీడా పరికరాలతో కూడిన స్పోర్ట్స్‌ కిట్‌, టీషర్ట్‌లను అందించనున్నారు.
  భారీగా నగదు ప్రోత్సాహకాలు:
• రాష్ట్రం ఏర్పడిన తర్వాత జాతీయ, అంతర్జాతీయ స్థాయిలో ప్రతిభ కనబరిచిన క్రీడాకారులకు ప్రభుత్వం భారీగా నగదు ప్రోత్సాహకాలు అందిస్తున్నది. గతంలో ఒలింపిక్స్‌లో స్వర్ణం సాధిస్తే రూ.25 లక్షలు ఇస్తే..ప్రభుత్వం దాన్ని రూ.2కోట్లకు పెంచింది. రజతానికి కోటి, కాంస్యానికి 50 లక్షలకు పెంచుతూ నిర్ణయం తీసుకుంది.
• రాష్ట్రం ఏర్పడ్డ తర్వాత నగదు పురస్కారాలకు రూ.25.38 కోట్లు, ప్రోత్సాహకాలుగా రూ.5.31 కోట్లు ప్లేయర్లకు మంజూరు చేశారు.
• 2014 సుంచి ఇప్పటి వరకు క్రీడా సంఘాలకు రూ.9.19 కోట్ల నిధులను ప్రభుత్వం అందించింది.
• క్రీడాకారులను ప్రోత్సహించే దిశగా ఇతర రాష్ర్టాలకు ఆదర్శంగా నిలిచేలా సాంకేతిక విద్యలో 0.5% కోటా, ప్రభుత్వ నియామకాల్లో 2% కోటా అమలు చేస్తున్నది.
• రెండు సార్లు ప్రపంచ బాక్సింగ్‌ చాంపియన్‌గా నిలిచిన నిఖత్‌ జరీన్‌కు రెండు సార్లు రెండు కోట్లు, యువ షూటర్‌ ఇషాసింగ్‌కు రెండు కోట్లు నగదు బహుమానం అందజేసింది. దీనికి తోడు ఖరీదైన ఇంటిస్థలాలు సమకూర్చడంతో ప్రభుత్వ ఉద్యోగ నియామకం చేసింది. ఇటీవలే గ్రాండ్‌మాస్టర్‌ హోదా దక్కించుకున్న యువ చెస్‌ ప్లేయర్‌ ఉప్పల ప్రణీత్‌కు 2.50 కోట్లు, నందినికి 50 లక్షలను ప్రభుత్వం అందించింది.