INDvsSA 1st Test: భారత్ – దక్షిణాఫ్రికా మధ్య ఈనెల 26 నుంచి మొదలుకాబోయే టెస్టు సిరీస్ మొదలుకావాల్సి ఉండగా ఫస్ట్ టెస్టు ఆరంభానికి ముందే టీమిండియాకు వరుస షాకులు తాకుతున్నాయి. కీలక ఆటగాళ్లు ఒక్కొక్కరుగా జట్టుకు దూరమవుతున్నారు. మహ్మద్ షమీ, ఇషాన్ కిషన్ల తర్వాత తాజాగా రుతురాజ్ గైక్వాడ్ కూడా గాయం కారణంగా ఈ సిరీస్ నుంచి తప్పుకున్నాడు. అయితే గైక్వాడ్ సిరీస్ నుంచి తప్పుకోవడం మరో ముంబై బ్యాటర్కు కలిసొచ్చేదే.. రుతురాజ్ తప్పుకోవడం సర్ఫరాజ్ ఖాన్కు లైన్ క్లీయర్ అయినట్టేనా..?
దేశవాళీలో తోపు..
దేశవాళీ క్రికెట్లో సర్ఫరాజ్ ఖాన్ గడిచిన మూడు నాలుగేండ్లుగా పరుగుల వరద పారిస్తున్నాడు. ముఖ్యంగా రంజీ క్రికెట్లో అయితే అతడి ఫామ్ పీక్స్లో ఉంది. ఫస్ట్ క్లాస్ క్రికెట్లో ఆసీస్ దిగ్గజం డాన్ బ్రాడ్మన్ తర్వాత అత్యధిక సగటు సర్ఫరాజ్కే ఉంది. 26 ఏండ్ల సర్ఫరాజ్.. 41 ఫస్ట్క్లాస్ మ్యాచ్లలో ఏకంగా 71.70 సగటుతో 3,657 పరుగులు సాధించాడు. ఇందులో ఏకంగా 13 సెంచరీలున్నాయి. సగటున ప్రతి 2 ఇన్నింగ్స్లకు ఒకసారి అతడు అర్థ సెంచరీలు చేస్తున్నాడు.
Sarfaraz Khan smashed a hundred from just 61 balls in the Intra Squad match between India vs India A. 🔥 pic.twitter.com/FbHM8APHPp
— Johns. (@CricCrazyJohns) December 22, 2023
ఛాన్స్ దక్కేనా..?
గత ఏడాదిన్నర కాలంగా సర్ఫరాజ్ జాతీయ జట్టులోకి రేపోమాపో వస్తాడని వాదనలు వినిపించినా బీసీసీఐ మాత్రం అతడి ఫిట్నెస్, వ్యవహార శైలి కారణంగా ఎంట్రీ ఇవ్వడం లేదన్నది ప్రధాన విమర్శ. గతేడాది బంగ్లాదేశ్ టెస్టు సిరీస్, ఈ ఏడాది బోర్డర్ – గవాస్కర్ ట్రోఫీలో అతడికి ఛాన్స్ దక్కుతుందనుకున్నా అతడికి నిరాశ తప్పలేదు. తాజాగా దక్షిణాఫ్రికా పర్యటనలోనే ఉన్న సర్ఫరాజ్.. సౌతాఫ్రికా ఏ తో జరిగిన మ్యాచ్లో ఫిఫ్టీతో రాణించాడు. ప్రిటోరియా వేదికగా ఇంట్రా స్క్వాడ్ మ్యాచ్ లో కూడా 61 బంతుల్లోనే సెంచరీ సాధించాడు. రుతురాజ్ గైర్హాజరీతో అయినా సర్ఫరాజ్ కు ఛాన్స్ దక్కుతుందని క్రికెట్ విశ్లేషకులు అభిప్రాయపడుతున్నారు. ఇషాన్ కిషన్ కూడా సిరీస్ నుంచి తప్పుకోవడం సర్ఫరాజ్కు కలిసొచ్చేదే. ఇంట్రా స్క్వాడ్ మ్యాచ్లో రోహిత్తో పాటు టీమ్ మేనేజ్మెంట్ దృష్టిలో పడ్డ సర్ఫరాజ్ తుది జట్టులో చోటు దక్కించుకుంటే అతడికి అది గోల్డెన్ ఛాన్సే అవుతుంది. దక్షిణాఫ్రికాలో పరిమిత ఓవర్ల ఫార్మాట్లకు దూరంగా ఉన్న రోహిత్, విరాట్, అశ్విన్తో పాటు శుభ్మన్ గిల్, బుమ్రాలు రీఎంట్రీ ఇస్తున్నారు. మిడిలార్డర్లో రహానే, పుజారాలపై వేటు వేసిన టీమ్ మేనేజ్మెంట్ సర్ఫరాజ్ను ప్రయత్నించవచ్చునన్న వాదనలు లేకపోలేదు. రోజురోజుకూ పోటీ పెరుగుతున్న టీమిండియాలో సర్ఫరాజ్ గనక చోటు దక్కించుకోకుంటే అతడు మరో పృథ్వీ షా అవుతాడని భారత క్రికెట్ జట్టు అభిమానులు వాపోతున్నారు.