ఇదే జోరు కొనసాగిస్తా

భారత స్టార్‌ అథ్లెట్‌ నీరజ్‌ చోప్రా హైదరాబాద్‌లో సందడి చేశాడు. ఇటీవలే హాంగ్జౌ వేదికగా జరిగిన ప్రతిష్ఠాత్మక ఆసియా క్రీడల్లో పసిడి పతకంతో మెరిసిన నీరజ్‌ సోమవారం అండర్‌ ఆర్మర్‌ షోరూమ్‌ ప్రారంభ కార్యక్రమంలో పాల్గొన్నాడు. అంతకుముందు గచ్చిబౌలి స్టేడియంతో పాటు గోపీచంద్‌ బ్యాడ్మింటన్‌ అకాడమీని సందర్శించిన నీరజ్‌..యువ అథ్లెట్లతో సరదాగా గడిపాడు.

• క్రీడా సంస్కృతి పెరిగింది
• హైదరాబాద్‌లో సౌకర్యాలు భేష్‌
• నగరంలో నీరజ్‌చోప్రా సందడి

హైదరాబాద్‌, ఆట ప్రతినిధి: భారత స్టార్‌ అథ్లెట్‌ నీరజ్‌ చోప్రా హైదరాబాద్‌లో సందడి చేశాడు. ఇటీవలే హాంగ్జౌ వేదికగా జరిగిన ప్రతిష్ఠాత్మక ఆసియా క్రీడల్లో పసిడి పతకంతో మెరిసిన నీరజ్‌ సోమవారం అండర్‌ ఆర్మర్‌ షోరూమ్‌ ప్రారంభ కార్యక్రమంలో పాల్గొన్నాడు. అంతకుముందు గచ్చిబౌలి స్టేడియంతో పాటు గోపీచంద్‌ బ్యాడ్మింటన్‌ అకాడమీని సందర్శించిన నీరజ్‌..యువ అథ్లెట్లతో సరదాగా గడిపాడు. ఇప్పటికే ప్రతిష్ఠాత్మక ఒలింపిక్స్‌, ప్రపంచ చాంపియన్‌షిప్‌, డైమండ్‌ లీగ్‌, కామన్వెల్త్‌, ఆసియాగేమ్స్‌లో పసిడి పతకాలు సొంతం చేసుకున్న నీరజ్‌.. బరిలో ఉన్నంత వరకు తాను ఇదే జోరు కొనసాగిస్తానని ధీమా వ్యక్తం చేశాడు. ఈ సందర్భంగా నీరజ్‌ మాట్లాడుతూ ‘ఈ సీజన్‌లో కచ్చితంగా 90 మీటర్ల మార్క్‌ను అధిగమిస్తానన్న నమ్మకం నాకుంది. గాయాలు అనేవి కెరీర్‌లో భాగం. అయినా ఎక్కడా ఆత్మైస్థెర్యం కోల్పోకుండా ముందుకు సాగుతూ పసిడి పతకాలు సాధిస్తున్నాను. 90మీటర్ల మార్క్‌ చేరుకునేందుకు నా ప్రయత్నాలు కొనసాగుతూనే ఉంటాయి’ అని అన్నాడు.

ఆసియాడ్‌ ప్రదర్శనపై?

• హాంగ్జౌ ఆసియాగేమ్స్‌లో భారత ప్లేయర్లు అంచనాలకు మించి రాణించారు. గత కామన్వెల్త్‌లో 70 పతకాలు సాధిస్తే ఈసారి అదనంగా మరో 37 పతకాలతో కొత్త చరిత్ర లిఖించాం. ఇదంతా ఒక్క రాత్రిలో సాధ్యమైంది కాదు. ఇందుకోసం అందరూ చాలా కష్టపడ్డారు. ప్రతీ విభాగంలో ప్లేయర్లు అద్భుత ప్రదర్శన కనబరిచారు.

దేశంలో క్రీడా సంస్కృతిపై?

• దేశంలో క్రీడల పట్ల ఆసక్తి నానాటికీ పెరుగుతున్నది. ఇది కేవలం అథ్లెటిక్స్‌కు పరిమితం కాలేదు. ఆసియాగేమ్స్‌లో అథ్లెటిక్స్‌తో పాటు షూటింగ్‌, ఆర్చరీ, మిగతా విభాగాల్లోనూ చాలా పతకాలు వచ్చాయి. పారిస్‌ ఒలింపిక్స్‌కు ముందు ఆత్మవిశ్వాసాన్నిచే అంశమిది.

యువ అథ్లెట్లకు మీరిచ్చే సందేశం?

• కెరీర్‌లో నిలదొక్కుకోవాలంటే ఓపిక అనేది చాలా కీలకం. నేను అంతర్జాతీయ టోర్నీల్లో పాల్గొనేందుకు మూడేండ్లు పట్టింది. పతకం సాధించేందుకు మరో ఆరేండ్లు వేచిచూడాల్సి వచ్చింది. అనుకున్న లక్ష్యాన్ని అందుకోవాలంటే ఓపిక అవసరం. 2015కు ఇప్పటికీ హైదరాబాద్‌ నగరం చాలా మారిపోయింది. పెద్ద పెద్ద బిల్డింగ్‌లతో అద్భుతంగా కనిపిస్తున్నది. నగరంలో స్పోర్ట్స్‌ కల్చర్‌ పెరిగింది. ఇక్కడి పలు క్రీడా మైదానాలను సందర్శించడం చాలా బాగా అనిపించింది.