Visit:
బర్మింగ్హమ్ : వరుసగా రెండు టీ20 సిరీస్ ఓటముల నైరాశ్యంలో ఉన్న భారత క్రికెట్ జట్టును వన్డే ఫార్మాట్ మళ్లీ విజయాల బాట పట్టించింది. ఇంగ్లండ్తో మూడు మ్యాచ్ల వన్డే సిరీస్లో భాగంగా మంగళవారం బర్మింగ్హమ్లో జరిగిన తొలి వన్డేలో టీమిండియా.. 6 వికెట్ల తేడాతో నెగ్గి సిరీస్లో 1-0 ఆధిక్యం సాధించింది. ప్రత్యర్థి నిర్దేశించిన 259 పరుగుల ఛేదనను భారత్.. 45.2 ఓవర్లలో 4 వికెట్లు కోల్పోయి ఛేదించింది. శుభ్మన్ గిల్ (75 బంతుల్లో 11 ఫోర్లు, 1 సిక్స్తో 80 రిటైర్డ్ హర్ట్) కెప్టెన్ ఇన్నింగ్స్, ప్లేయర్ ఆఫ్ ది మ్యాచ్ అక్షర్ పటేల్ (52 బంతుల్లో 5 ఫోర్లు, 1 సిక్స్తో 57 నాటౌట్) ఆల్రౌండ్ మెరుపులకు తోడు వాషింగ్టన్ సుందర్ (52 నాటౌట్) రాణించాడు. తొలుత టాస్ గెలిచి బ్యాటింగ్ చేసిన ఇంగ్లండ్.. 47.5 ఓవర్లలో 258 రన్స్కు ఆలౌట్ అయింది. 80కే 5 కీలక వికెట్లు కోల్పోయిన దశలో ఆ జట్టును జో రూట్ (76 బంతుల్లో 6 ఫోర్లు, 1 సిక్స్తో 76 నాటౌట్), లియామ్ డాసన్ (83 బంతుల్లో 6 ఫోర్లు, 1 సిక్స్తో 68) ఆదుకున్నారు. బ్యాట్తో మెరిసిన అక్షర్.. బంతితో (4/62) నాలుగు వికెట్లు తీయగా ప్రసిద్ధ్ (2/50), యువ పేసర్ గుర్నూర్ బ్రార్ (2/61)కు తలా రెండు వికెట్లు దక్కాయి. ఈనెల 16న కార్డిఫ్లో రెండో వన్డే జరుగుతుంది.
రెండు బౌండరీలతో ఛేదనను మొదలెట్టిన సారథి గిల్.. సీనియర్లు రోహిత్ (11), కోహ్లీ (5) వెంటవెంటనే నిష్క్రమించినా కెప్టెన్ ఇన్నింగ్స్తో మెప్పించాడు. శ్రేయస్ (35) అండతో నిలకడగా ఆడాడు. వీలుచిక్కినప్పుడల్లా బంతిని బౌండరీకి తరలించిన అతడు.. కరన్ 20వ ఓవర్లో అర్ధ సెంచరీని పూర్తిచేసుకున్నాడు. అదిల్ ఓవర్లో రెండు ఫోర్లు బాదిన అతడు.. బెతెల్, జాక్స్నూ అలవోకగా ఎదుర్కుని శతకం దిశగా సాగాడు. మరో ఎండ్లో శ్రేయస్ అతడికి చక్కటి సహకారం అందించడంతో భారత్ లక్ష్యం వైపుగా కదిలింది. మూడో వికెట్కు వంద పరుగులు జోడించి ఛేదన వైపుగా సాగుతున్న సమయంలో గిల్ కుడికాలి గాయంతో ఇబ్బందిపడి మైదానాన్ని వీడాడు. ఇంగ్లండ్ దీనిని ఒక అవకాశంగా మలుచుకుని వరుసగా వికెట్లు పడగొట్టి పోటీలోకి వచ్చింది. ఆర్చర్ 27వ ఓవర్లో సింగిల్ తీసే క్రమంలో శ్రేయస్.. బ్రూక్ డైరెక్ట్ త్రోకు బలయ్యాడు. ఆ వెంటనే రాహుల్ (1) టంగ్ వేసిన బాల్ను వికెట్ల మీదకు ఆడుకుని క్లీన్బౌల్డ్ అయ్యాడు. అయితే అక్షర్, వాషింగ్టన్ మాత్రం ఇంగ్లండ్ ఆశలపై నీళ్లు చల్లారు. ఈ జోడీ అభేద్యమైన ఐదో వికెట్కు 102 రన్స్ జోడించి మెన్ ఇన్ బ్లూను గెలుపుబాట పట్టించింది. బంతితో రాణించిన అక్షర్.. ఇంగ్లండ్ పేస్, స్పిన్ బౌలర్లను సమర్థవంతంగా ఎదుర్కుని వాషింగ్టన్ సహకారంతో లాంఛనాన్ని పూర్తిచేశాడు.
మొదట నెమ్మదిగా ఇన్నింగ్స్ను ఆరంభించిన ఇంగ్లండ్.. 13వ ఓవర్ తర్వాత ఒక్కసారిగా తడబడి 4 ఓవర్ల వ్యవధిలో 5 కీలక వికెట్లు కోల్పోయింది. జాకబ్ బెతెల్ (14) నిరాశపరిచినా బెన్ డకెట్ (43) ఉన్నంతసేపు వేగంగా ఆడాడు. గుర్నూర్ను లక్ష్యంగా చేసుకుని అతడి 8వ ఓవర్లో 4, 6, 6తో పాటు మరుసటి ఓవర్లో రెండు బౌండరీలు బాదాడు. కానీ 13వ ఓవర్లో మళ్లీ బౌలింగ్కు వచ్చిన గుర్నూర్.. నాలుగు బంతుల వ్యవధిలో ఓపెనర్లను వెనక్కి పంపి టీమిండియాకు బ్రేక్ ఇచ్చాడు. ఆ వెంటనే కెప్టెన్ హ్యారీ బ్రూక్ (1).. బుమ్రా ఓవర్లో స్లిప్స్ వద్ద రోహిత్కు క్యాచ్ ఇచ్చాడు. 17వ ఓవర్లో ప్రసిద్ధ్.. ఇంగ్లిష్ టీమ్ను మరో దెబ్బకొట్టాడు. తొలుత జోస్ బట్లర్ (5)ను బోల్తా కొట్టించిన అతడు.. నాలుగో బంతికి సామ్ కరన్ను డకౌట్ చేయడంతో బ్రూక్ సేన ఐదో వికెట్ కోల్పోయింది. కొద్దిసేపటికే విల్ జాక్స్ (20) సైతం దూబే బౌలింగ్లో కీపర్ రాహుల్ అందుకున్న సూపర్ క్యాచ్తో పెవిలియన్ చేరాడు. 22 ఓవర్లకు 107/6తో పీకల్లోతు కష్టాల్లో ఉన్న ఆతిథ్య జట్టును డాసన్తో కలిసి రూట్ ఆదుకున్నాడు. ఈ ఇద్దరూ అనవసరపు షాట్లకు పోకుండా సింగిల్స్, డబుల్స్తో ఇన్నింగ్స్ను పునర్నిర్మించి ఏడో వికెట్కు 121 రన్స్ జోడించారు. అయితే అక్షర్ పటేల్ చివరి నాలుగు వికెట్లు పడగొట్టి ఆతిథ్య జట్టును తక్కువ స్కోరుకే పరిమితం చేశాడు.
150 వన్డేల్లో బుమ్రా 150 వికెట్ల క్లబ్లో చేరాడు. అలాగే, ఇంగ్లండ్ గడ్డపై అత్యధికంగా 31 వికెట్లు తీసిన భారత బౌలర్గా జడేజా (30) రికార్డును బ్రేక్ చేశాడు.
ఇంగ్లండ్: 47.5 ఓవర్లకు 258 ఆలౌట్ (రూట్ 76 నాటౌట్, డాసన్ 68, అక్షర్ 4/62);
భారత్: 45.2ఓవర్లకు 262/4 (గిల్ 80, అక్షర్ 57 నాటౌట్, టంగ్ 1/50)
