Visit:
రాంచీ : భారత్‌, దక్షిణాఫ్రికా జట్లు వన్డే సమరానికి సిద్ధమయ్యాయి. ఆదివారం రాంచీ వేదికగా ఇరు జట్ల మధ్య మూడు వన్డేల సిరీస్‌ మొదలుకానుంది. సొంతగడ్డపై సఫారీల చేతిలో టెస్టుల్లో వైట్‌వాష్‌ ఎదుర్కొన్న టీమ్‌ఇండియా..వన్డేల్లో ప్రతీకారం తీర్చుకోవాలని చూస్తున్నది. గతంలో ఎన్నడూ లేని విధంగా స్పిన్‌ ఉచ్చులో విలవిలలాడిన భారత్‌..రెండు టెస్టుల్లో ఓడి తీవ్ర విమర్శలు ఎదుర్కొంటున్నది. ఓవైపు టీమ్‌ కాంబినేషన్‌తో పాటు చీఫ్‌ కోచ్‌ గౌతం గంభీర్‌ శైలిపై ఇంటాబయటా వాదనలు నడుస్తున్నాయి. ఈ నేపథ్యంలో టెస్టు ఓటమిని మరిపించేలా వన్డేల్లో సత్తాచాటేందుకు టీమ్‌ఇండియా పట్టుదలతో కనిపిస్తున్నది. దిగ్గజ ద్వయం విరాట్‌కోహ్లీ, రోహిత్‌శర్మ..సొంతగడ్డపై చాలా రోజుల తర్వాత బరిలో దిగుతుండటం అభిమానుల్లో ఆసక్తి రేపుతున్నది. టీ20, టెస్టులకు వీడ్కోలు పలికిన రొకో మొదటిసారి సొంత ఇలాఖాలో బరిలోకి దిగబోతున్నారు. అయితే 2027 వన్డే ప్రపంచకప్‌ టోర్నీని దృష్టిలో పెట్టుకుని ఈ ఇద్దరిని కొనసాగించాలా లేదా అనే దానిపై టీమ్‌ మేనేజ్‌మెంట్‌ సమాలోచనలు చేస్తున్నది.
మెగాటోర్నీకి దాదాపు రెండేండ్లు ఉన్న క్రమంలో విరాట్‌, రోహిత్‌ కొనసాగించడమా లేక గౌరవంగా పంపడమా అన్న దానిపై బోర్డు పెద్దలు ప్రణాళికలు రచిస్తున్నట్లు తెలుస్తున్నది. ఇదిలా ఉంటే రెగ్యులర్‌ కెప్టెన్‌ శుభ్‌మన్‌ గిల్‌ గైర్హాజరీలో కేఎల్‌ రాహుల్‌ జట్టు నాయకత్వ బాధ్యతలు అందుకోగా, తుది జట్టు కూర్పుపై ఎన్నడూ లేని విధంగా అస్పష్టత కొనసాగుతున్నది. ఓవైపు టెస్టు సిరీస్‌ ఓటమి వెంటాడుతున్న వేళ..గంభీర్‌ మెడపై కత్తి వేలాడుతున్నది. టెస్టు సిరీస్‌ ఘోర పరాజయాన్ని మరిపించాలనే పట్టుదలతో ఉన్న గంభీర్‌ అందుకు తగ్గట్లు తుది జట్టును ఎంపిక చేయాల్సి ఉంటుంది. ఓవైపు రొకో బెర్తులు ఖాయం కాగా, రిషబ్‌ పంత్‌, సుందర్‌, నితీశ్‌కుమార్‌రెడ్డి, తిలక్‌వర్మ, రుతురాజ్‌ గైక్వాడ్‌లో ఎవరికి తుది జట్టులో అవకాశం లభిస్తుంది అనేది ఆసక్తికరంగా మారింది. అర్ష్‌దీప్‌సింగ్‌, హర్షిత్‌రానా, ప్రసిద్ధ్‌ కృష్ణ పేస్‌ బాధ్యతలు పంచుకోనుండగా,కుల్దీప్‌, జడేజా స్పిన్‌ను నడిపించనున్నారు. మరోవైపు రబాడ, నోకియా గైర్హాజరీలోనూ సత్తాచాటేందుకు సఫారీలు ఆత్మవిశ్వాసంతో ఉన్నారు. ముఖ్యంగా కెప్టెన్‌ బవుమా, మార్క్మ్‌,్ర డికాక్‌, బ్రిట్జె, బ్రెవిస్‌తో బలంగా కనిపిస్తున్నది.
