గుజరాత్‌ గెలుపు బాట

వరుసగా రెండు ఓటముల తర్వాత మహిళల ప్రీమియర్‌ లీగ్‌ (డబ్ల్యూపీఎల్‌) 3వ సీజన్‌లో గుజరాత్‌ జెయింట్స్‌ మళ్లీ గెలుపు బాట పట్టింది. గురువారం బెంగళూరులోని చిన్నస్వామి స్టేడియం వేదికగా రాయల్‌ చాలెంజర్స్‌ బెంగళూరు (ఆర్‌సీబీ)తో జరిగిన మ్యాచ్‌లో గుజరాత్‌.. 6 వికెట్ల తేడాతో నెగ్గింది.

• బెంగళూరుకు మూడో ఓటమి రాణించిన గార్డ్‌నర్‌

బెంగళూరు: వరుసగా రెండు ఓటముల తర్వాత మహిళల ప్రీమియర్‌ లీగ్‌ (డబ్ల్యూపీఎల్‌) 3వ సీజన్‌లో గుజరాత్‌ జెయింట్స్‌ మళ్లీ గెలుపు బాట పట్టింది. గురువారం బెంగళూరులోని చిన్నస్వామి స్టేడియం వేదికగా రాయల్‌ చాలెంజర్స్‌ బెంగళూరు (ఆర్‌సీబీ)తో జరిగిన మ్యాచ్‌లో గుజరాత్‌.. 6 వికెట్ల తేడాతో నెగ్గింది. బంతితో సమిష్టిగా రాణించిన గుజరాత్‌.. మొదట బ్యాటింగ్‌ చేసిన ఆర్‌సీబీని నిర్ణీత 20 ఓవర్లలో 125/7 కే కట్టడిచేసింది. కనిక అహుజా (28 బంతుల్లో 33, 1 ఫోర్‌, 2 సిక్సర్లు) టాప్‌ స్కోరర్‌ కాగా రఘ్వి బిస్త్‌ (22), జార్జియా వర్హెమ్‌ (20 నాటౌట్‌) ఆర్‌సీబీ గౌరవప్రదమైన స్కోరు చేసేందుకు సాయపడ్డారు.

గుజరాత్‌ బౌలర్లలో తనూజా కన్వర్‌ (2/16), డియాండ్ర డాటిన్‌ (2/31), కాశ్వీ గౌతమ్‌ (1/17) ప్రత్యర్థిని కట్టడి చేశారు. ఈ సీజన్‌లో దూకుడుమీదున్న బెంగళూరు స్టార్‌ బ్యాటర్‌ ఎలీస్‌ పెర్రీ డకౌట్‌ అయింది. డబ్ల్యూపీఎల్‌లో 22 ఇన్నింగ్స్‌లు ఆడిన ఆమెకు డకౌట్‌ అవడం ఇదే ప్రథమం. జెయింట్స్‌.. 16.3 ఓవర్లలోనాలుగు వికెట్లు కోల్పోయి ఛేదనను పూర్తిచేసింది. మూనీ (17), డియోల్‌ (5) నిరాశపరిచినా ఆ జట్టు సారథి ఆష్లీ గార్డ్‌నర్‌ (31 బంతుల్లో 58, 6 ఫోర్లు, 3 సిక్సర్లు) మరోసారి కెప్టెన్‌ ఇన్నింగ్స్‌తో గుజరాత్‌ను విజయపథాన నిలిపింది. లిచ్‌ఫీల్డ్‌ (30 నాటౌట్‌) ఆమెకు అండగా నిలిచింది. డిఫెండింగ్‌ చాంపియన్‌గా బరిలోకి దిగిన బెంగళూరుకు ఆడిన ఐదు మ్యాచ్‌లలో ఇది వరుసగా మూడో ఓటమి.