1079 రోజుల తర్వాత ఫస్ట్‌ సిక్స్‌ కొట్టిన మాక్స్‌వెల్‌

ఇండియన్‌ ప్రీమియర్‌ లీగ్‌(ఐపీఎల్‌) 2021 ఆరంభ మ్యాచ్‌ హోరాహోరీగా సాగింది. ఆఖరి బంతి వరకు ఉత్కంఠగా సాగిన పోరులో రాయల్‌ ఛాలెంజర్స్‌ బెంగళూరు విజయం సాధించింది. శుక్రవారం జరిగిన సీజన్‌ తొలి మ్యాచ్‌లో బెంగళూరు 2 వికెట్ల తేడాతో ముంబై ఇండియన్స్‌ను ఓడించింది. గతేడాది కింగ్స్‌ ఎలెవన్‌ పంజాబ్‌(పంజాబ్‌ కింగ్స్‌)కు ప్రాతినిధ్యం వహించిన మాక్స్‌వెల్‌ దారుణ ప్రదర్శనతో నిరాశపరిచాడు.

నిరుడు టోర్నీలో కనీసం ఒక్క సిక్స్‌ కూడా బాదలేకపోయాడు. అతన్ని ఫ్రాంఛైజీ వదిలిపెట్టడంతో ఈ ఏడాది వేలంలో బెంగళూరు దక్కించుకొంది. తమ తొలి మ్యాచ్‌లోనే మాక్స్‌వెల్‌(39) దుమ్మురేపాడు. ఈ మ్యాచ్‌లో అతడు రెండు సిక్సర్లు కొట్టాడు. అందులో ఒక సిక్స్‌ 100 మీటర్లు వెళ్లడం విశేషం. మాక్స్‌వెల్ 1079 రోజుల తర్వాత మళ్లీ ఐపీఎల్‌లో సిక్స్ కొట్టాడు.చాలా రోజుల తర్వాత మళ్లీ భారీ సిక్సర్లు బాదడం సంతోషంగా ఉందని మాక్సీ అన్నాడు.