లండన్: ఈ మధ్య పోర్చుగల్ స్టార్ ఫుట్బాలర్ క్రిస్టియానో రొనాల్డో చేసిన పని ప్రముఖంగా వార్తల్లో నిలిచిన విషయం తెలుసు కదా. యూరో 2020లో భాగంగా ఓ ప్రెస్ కాన్ఫరెన్స్లో తన ముందు ఉన్న కోకాకోలా బాటిల్స్ను తీసి పక్కనపెట్టాడు. కోలాలు వద్దు, నీళ్లే ముద్దు అన్న సందేశం ఇచ్చాడు. అతడు చేసిన ఈ పని వల్ల కోకాకోలాకు సుమారు రూ.30 వేల కోట్ల నష్టం వాటిల్లింది. తాను సాఫ్ట్ డ్రింక్స్కు పూర్తిగా వ్యతిరేకమని రొనాల్డో చెప్పాడు.
కానీ తాజాగా అతనికి సంబంధించిందే ఓ వీడియో వైరల్ అవుతోంది. అది చూసి నువ్వో కపటం ఉన్న వ్యక్తివంటూ రొనాల్డోపై అభిమానులు మండిపడుతున్నారు. గతంలో ఇదే కోకాకోలాను ప్రమోట్ చేస్తూ రొనాల్డో చేసిన వీడియో ఇది. 2008లో వచ్చిన ఈ వీడియోను ఫ్యాన్స్ సోషల్ మీడియాలో వైరల్ చేస్తూ రొనాల్డోను ఇరకాటంలో పెట్టారు. ఇదొక్కటే కాదు 2013లో అతడు కేఎఫ్సీ చికెన్ను ప్రమోట్ చేసిన విషయాన్ని కూడా ఫ్యాన్స్ ఇప్పుడు బయటపెట్టారు.
ఓ ఫుట్బాల్ ప్లేయర్గా ఇలాంటి డ్రింక్స్, ఫుడ్కు దూరంగా ఉండాలి. రొనాల్డో కూడా తన ఫిట్నెస్, డైట్పై బాగానే దృష్టిసారిస్తాడు. సాఫ్ట్ డ్రింక్స్, జంక్ ఫుడ్కు దూరంగా ఉండాలని తన కొడుకుకు కూడా తాను సూచిస్తాననీ రొనాల్డో చెబుతాడు. కానీ తాజా వీడియోలు మాత్రం రొనాల్డోను ఇరకాటంలో పెట్టాయి.