Australia Open 2024: ఆస్ట్రేలియా ఓపెన్ రెండో రౌండ్లోనూ స్టార్ ప్లేయర్లకు షాకులు తప్పడం లేదు. గతేడాది మూడు సర్జరీల తర్వాత కొద్దిరోజులకే మళ్లీ టెన్నిస్ రాకెట్ పట్టిన బ్రిటన్ స్టార్ ప్లేయర్ ఎమ్మా రడుకానుతో పాటు గతేడాది ఆస్ట్రేలియా ఓపెన్ రన్నరప్ రిబాకినాల పోరాటం రెండో రౌండ్లోనే ముగిసింది. మెల్బోర్న్లోని షో కోర్ట్ 2 వేదికగా ముగిసిన మహిళల సింగిల్స్ రెండో రౌండ్ పోరులో రడుకాను.. 4-6, 6-4, 4-6 తేడాతో చైనాకు చెందిన యఫన్ వాంగ్ చేతిలో ఓటమి చవిచూసింది. ఆట జరుగుతున్నంతసేపు అలిసిపోయినట్టుగా కనిపించిన రడుకాను.. రెండో రౌండ్లోనే ఇంటిముఖం పట్టింది. ఇక గతేడాది మహిళల సింగిల్స్ రన్నరప్ రిబాకినా (కజకిస్తాన్) పోరాటం కూడా రెండో రౌండ్లోనే ముగిసింది. మరో స్టార్ ప్లేయర్, పోలండ్ సంచలనం టాప్ సీడ్ ఇగా స్వియాటెక్ మాత్రం మూడో రౌండ్కు చేరింది.
రాడ్ లీవర్ ఎరీనాలో జరిగిన మ్యాచ్లో గత సీజన్ రన్నరప్ రిబాకినా.. 4-6, 6-4, 6-7 (20-22)తేడాతో రష్యాకు చెందిన అన్నా బిల్కినోవా చేతిలో ఓడింది. గ్రాండ్స్లామ్ చరిత్రలో అత్యంత సుదీర్ఘ టై బ్రేక్ (42 పాయింట్లు) గా సాగిన ఈ మ్యాచ్లో రిబాకినాకు షాక్ తప్పలేదు. రెండు గంటల 46 నిమిషాల పాటు సాగిన ఈ పోరులో రిబాకినా, బిల్కినోవా ఢీ అంటే ఢీ అన్నట్టుగా పోరాడినా చివరికి కజకిస్తాన్ అమ్మాయికి ఓటమి తప్పలేదు.
The longest tiebreak in a singles match in Grand Slam history ✨#AusOpen • #AO2024 pic.twitter.com/4Il3BH6JCX
— #AusOpen (@AustralianOpen) January 18, 2024
ఇక గురువారం ముగిసిన మరో మ్యాచ్లో స్వియాటెక్.. 6-4, 3-6, 6-4 తేడాతో అమెరికాకు చెందిన కొలిన్స్ను ఓడించింది. కొలిన్స్తో హోరాహోరి పోరాడానని, ఒకదశలో తాను ఈ గేమ్ను కోల్పోయి, విమానాశ్రయానికి వెళ్లినట్టు అనిపించిందని స్వియాటెక్ మ్యాచ్ అనంతరం తెలిపింది. ఆమె మాట్లాడుతూ.. ‘అసలేం జరిగిందో నాకు అర్థం కావడం లేదు. నేనైతే కొలిన్స్ స్పీడ్ చూసి ఆల్రెడీ ఎయిర్పోర్టుకు (ఓడిపోయానని) వెళ్లానని అనుకున్నా. కానీ నేను చివరిదాకా పోరాడాను. నాకు చాలా గర్వంగా ఉంది. కొలిన్స్ అసాధారణంగా ఆడింది..’ అని తెలిపింది.
J A Z D A 🔥@iga_swiatek wins 5️⃣ straight games against Collins for an incredible 6-4 3-6 6-4 comeback!#AusOpen • #AO2024 pic.twitter.com/NE3jnqk6eO
— #AusOpen (@AustralianOpen) January 18, 2024