అర్జున్‌ కొత్త చరిత్ర.. సెమీస్‌ చేరిన తొలి భారత ప్లేయర్‌గా రికార్డు

భారత యువ గ్రాండ్‌మాస్టర్‌ ఇరిగేసి అర్జున్‌ కొత్త చరిత్ర లిఖించాడు. అమెరికా వేదికగా జరుగుతున్న ప్రతిష్టాత్మక ఫ్రీస్టయిల్‌ చెస్‌ గ్రాండ్‌స్లామ్‌ టూర్‌లో అర్జున్‌ సెమీఫైనల్లోకి దూసుకెళ్లాడు. తద్వారా ఈ టోర్నీలో సెమీస్‌కు అర్హత సాధించిన తొలి భారత ప్లేయర్‌గా అర్జున్‌ అరుదైన ఘనత సొంతం చేసుకున్నాడు.

• ప్రజ్ఞానంద నిష్ర్కమణ ఫ్రీస్టయిల్‌ గ్రాండ్‌స్లామ్‌ టూర్‌

లాస్‌ వేగాస్‌: భారత యువ గ్రాండ్‌మాస్టర్‌ ఇరిగేసి అర్జున్‌ కొత్త చరిత్ర లిఖించాడు. అమెరికా వేదికగా జరుగుతున్న ప్రతిష్టాత్మక ఫ్రీస్టయిల్‌ చెస్‌ గ్రాండ్‌స్లామ్‌ టూర్‌లో అర్జున్‌ సెమీఫైనల్లోకి దూసుకెళ్లాడు. తద్వారా ఈ టోర్నీలో సెమీస్‌కు అర్హత సాధించిన తొలి భారత ప్లేయర్‌గా అర్జున్‌ అరుదైన ఘనత సొంతం చేసుకున్నాడు. శుక్రవారం జరిగిన క్వార్టర్స్‌ పోరులో అర్జున్‌ 1.5-0.5తో నొదిర్బెక్‌ అబుసత్రోవ్‌ (ఉజ్బెకిస్థాన్‌)పై అద్భుత విజయం సాధించాడు. ఆది నుంచే తనదైన దూకుడు కనబరిచిన ఈ ప్రపంచ నంబర్‌ 5 ర్యాంకర్‌.. ఉజ్బెక్‌ ప్లేయర్‌పై పూర్తి ఆధిపత్యం ప్రదర్శించాడు. నొదిర్బెక్‌తో తొలి ర్యాపిడ్‌ గెలిచిన అర్జున్‌.. మలి గేమ్‌ను డ్రా చేసుకున్నాడు.

ప్రత్యర్థి ఎత్తులను చిత్తుచేస్తూ తొలి గేమ్‌ను అలవోకగా కైవసం చేసుకున్న ఈ తెలంగాణ యువ ప్లేయర్‌.. రెండో గేమ్‌ డ్రా చేసుకోవడం ద్వారా నొదిర్బెక్‌కు 0.5 పాయింట్‌ దక్కింది. శనివారం జరిగే సెమీస్‌లో లెవాన్‌ అరోనియన్‌తో అర్జున్‌ అమీతుమీ తేల్చుకోనున్నాడు. మిగతా క్వార్టర్స్‌లో అరోనియన్‌ 2.5-1.5తో హికారు నకామురపై గెలువగా, హన్స్‌ మోక్‌ నీమన్‌ 4-2తో జవోకిర్‌ సిద్రోవ్‌(ఉజ్బెకిస్థాన్‌)పై గెలిచి ముందంజ వేశారు. ఇదిలా ఉంటే ఫ్రీ స్టయిల్‌ గ్రాండ్‌స్లామ్‌ టోర్నీలో అర్జున్‌ సత్తాచాటిన తీరు అందరినీ ఆకట్టుకుంటున్నది. తన కంటే మెరుగైన ర్యాంక్‌ ప్లేయర్లను చిత్తుచేస్తూ ముందుకు సాగుతున్న తీరు అద్భుతం. ఈ టోర్నీలో విజయాల ద్వారా ఫీడే రేటింగ్స్‌లో అర్జున్‌ 2800 మార్క్‌ను అధిగమించే అవకాశముంది.

ప్రజ్ఞానంద నిష్ర్కమణ:

ఓవైపు అర్జున్‌ విజయంతో భారత చెస్‌ అభిమానులు సంబరపడుతుంటే..మరోవైపు యువ గ్రాండ్‌మాస్టర్‌ ఆర్‌ ప్రజ్ఞానంద నిష్ర్కమణ నిరాశ కల్గించింది. ప్రపంచ మాజీ చాంపియన్‌ మాగ్నస్‌ కార్ల్‌సన్‌పై అద్భుత విజయంతో జోరు మీద కనిపించిన ప్రజ్ఞానంద 3-4 తేడాతో అమెరికా జీఎం ఫాబియానో కరువానతో పోరాడి ఓడాడు. ఆఖరి వరకు హోరాహోరీగా సాగిన పోరులో అర్మగెడాన్‌ పద్ధతిలో ప్రజ్ఞానంద ఓటమి వైపు నిలిచాడు. మొత్తం ఏడు గేముల్లో తొలి గేమ్‌ గెలిచిన ఈ చెన్నై చిన్నోడు..వరుసగా నాలుగు గేమ్‌లు చేజార్చుకున్నాడు. ఆ తర్వాత ప్రజ్ఞానంద పుంజుకున్న లాభం లేకపోయింది. ఈ ఓటమితో లోయర్‌ బ్రాకెట్‌లో ఏడుగురు ప్లేయర్లతో కలిసి ప్రజ్ఞానంద నాకౌట్‌ గేముల్లో తలపడనున్నాడు. ఇదిలా ఉంటే లోయర్‌ బ్రాకెట్‌లో మాగ్నస్‌ కార్ల్‌సన్‌ 2-0తో విదిత్‌ గుజరాతిపై గెలిచాడు.