Eye reveals : గుండె ఆరోగ్యాన్ని కంటితో తెలుసుకోవచ్చు.. అమెరికా పరిశోధన

Eye reveals : కండ్లు మన శరీరానికి ఎంతో ముఖ్యమైనవి. చూపును ప్రసాదించేవే కాకుండా మనలో వచ్చే ఆరోగ్య సమస్యలను కూడా ఇట్టే పట్టేస్తాయి. ఈ విషయాన్ని అమెరికాకు చెందిన పరిశోధకులు...

October 4, 2021 / 07:24 PM IST

Eye reveals : గుండె ఆరోగ్యాన్ని కంటితో తెలుసుకోవచ్చు.. అమెరికా పరిశోధన

(Eye reveals) కండ్లు మన శరీరానికి ఎంతో ముఖ్యమైనవి. చూపును ప్రసాదించేవే కాకుండా మనలో వచ్చే ఆరోగ్య సమస్యలను కూడా ఇట్టే పట్టేస్తాయి. ఈ విషయాన్ని అమెరికాకు చెందిన పరిశోధకులు వెల్లడించారు. కంటిని స్కాన్‌ చేయడం ద్వారా గుండె ఆరోగ్యం గురించి విషయాలను చెప్పొచ్చంటున్నారు. కంటిలోని రక్తప్రసరణ వ్యవస్థ ఆధారంగా పలు వ్యాధులను గుర్తించవచ్చునని సెలవిస్తున్నారు.

సాధారణ కంటి పరీక్ష గుండె జబ్బు ప్రమాదాన్ని తెలియజేస్తుంది. ఈ పరీక్షలో మనిషికి గుండె జబ్బుతో పాటు పక్షవాతం వచ్చే ప్రమాదం ఎంత ఉన్నదో కూడా తెలుసుకోవచ్చు. అమెరికన్ పరిశోధకులు కంటి రెటీనాను పరిశీలించడం ద్వారా కంటిలో రక్త ప్రసరణ ఎంత తక్కువగా ఉన్నదో చెప్పవచ్చంటున్నారు. ఇదే విషయం గుండె జబ్బులను కూడా సూచిస్తుందంట.

యూనివర్శిటీ ఆఫ్ కాలిఫోర్నియా, శాన్ డియాగో పరిశోధకులు తమ ఇటీవలి పరిశోధనలో దీనికి సంబంధించిన నివేదికను సిద్ధం చేశారు. శరీరంలో రక్త ప్రసరణ తగ్గినప్పుడు లేదా తగినంతగా లేనప్పుడు.. అది కంటిలోని రెటీనా కణాలను కూడా ప్రభావితం చేస్తుంది. వీరి పరిశోధన ప్రకారం, రెటీనాను పరీక్షించడం ద్వారా స్కీమియా అనే గుండె జబ్బును గుర్తించవచ్చు. స్కీమియా పరిస్థితిలో ఉన్నప్పుడు శరీరంలో ఆక్సిజన్ స్థాయి పడిపోతుంది. ధమనులు దెబ్బతినే ప్రమాదం పెరుగుతుంది. ఈ పరిశోధన ద్వారా భవిష్యత్‌లో గుండె జబ్బుల ప్రమాదాన్ని తగ్గించవచ్చునని కాలిఫోర్నియా విశ్వవిద్యాలయంలో రెటీనా సర్జన్‌గా పనిచేస్తున్న డాక్టర్ మాథ్యూ బెక్హాం అభిప్రాయపడుతున్నారు. రెటీనా పరీక్షలో స్కీమియా లక్షణాలను చూపించే రోగులను కార్డియాలజిస్టుల వద్దకు పంపాలని ఇక్కడి శాస్త్రవేత్తలు ఆలోచిస్తున్నారు.

పరిశోధన ఇలా సాగింది..

రెటీనా నుంచి కంటి వ్యాధులను అర్థం చేసుకునేందుకు పరిశోధకులు 13,940 మంది రోగులపై పరిశోధన జరిపారు. వీరి కంటి రెటీనాలను 2014 జూలై-2019 జూలై మధ్య పరీక్షించారు. ఈ పరీక్షలో 84 మందిలో గుండె జబ్బు నిర్ధారణ అయింది. ఈ 84 మందిలో నిజంగానే 58 మంది గుండె జబ్బులతో బాధపడుతున్నారు. 26 మంది రోగులకు స్ట్రోక్‌కు గురయ్యారు. ఈ రెండు వ్యాధులు కూడా రక్తప్రసరణకు సంబంధించినవే కావడం విశేషం.