నిలిచిన చైనా అంత‌రిక్ష కేంద్రం స‌ర‌ఫ‌రా మిష‌న్‌

సాంకేతిక సమస్యల కారణంగా అంతరిక్ష కేంద్రానికి పంపాల్సిన టియాన్‌జౌ 2 అంతరిక్ష నౌకను చైనా వాయిదా వేసింది

May 20, 2021 / 05:15 PM IST

నిలిచిన చైనా అంత‌రిక్ష కేంద్రం స‌ర‌ఫ‌రా మిష‌న్‌

బీజింగ్ : సాంకేతిక సమస్యల కారణంగా అంతరిక్ష కేంద్రానికి పంపాల్సిన టియాన్‌జౌ 2 అంతరిక్ష నౌకను చైనా వాయిదా వేసింది. మానవరహిత సరుకు అంతరిక్ష నౌక సరఫరా మిషన్‌లో భాగంగా దీనిని గురువారం ఉదయం ప్రయోగించాల్సి ఉన్న‌ది. ఈ స‌మాచారం చైనా అంతరిక్ష కేంద్రం నుంచి అందింది. అయితే తిరిగి ఎప్పుడు ప్ర‌యోగిస్తార‌నే విషయం తెలియలేదు. చైనా తియాన్హే అంతరిక్ష కేంద్రం నిర్మాణంలో టియాన్‌జౌ 2 ఒక భాగం. ఇంతకు ముందు ప్రారంభించిన టియాన్హె కోర్ మాడ్యూల్ కోసం ఇది మొదటి కార్గో సరఫరా మిషన్.

స‌ర‌ఫ‌రా మిష‌న్ నిలిచిపోవ‌డానికి గ‌ల స్ప‌ష్ట‌మైన కార‌ణాలు చెప్ప‌నప్ప‌టికీ.. కొత్త ప్ర‌యోగ స‌మ‌యం త్వ‌ర‌లోనే నిర్ణ‌యిస్తార‌ని జిన్హువా వార్తాసంస్థ నివేదించింది. ఇప్పుడు ఆలస్యం అయిన మిషన్‌లో ఆహారం, స్పేస్ సూట్లు వంటి నిత్యావసరాలను కోర్ మాడ్యూల్‌కు తీసుకెళ్లాల్సి ఉన్న‌ది. “స్వర్గపు ప్యాలెస్” అని అర్ధం ఉన్న‌ తియాన్హే అనే అంతరిక్ష కేంద్రం – కక్ష్యలో అసెంబ్లీని పూర్తి చేయడానికి మొత్తం 10 మిషన్లు అవసరం. ఈ అంత‌రిక్ష కేంద్రం 15 సంవత్సరాల వరకు తక్కువ భూమి కక్ష్యలో ఉండి సేవ‌లందించేలా చైనా రూపొందించింది.

లాంగ్ మార్చి 5 బీ శిధిలాలు భూమిపై పడినప్పుడు చైనా అంతరిక్ష కార్యక్రమం గురించి ప్రపంచం మొత్తం ఆందోళన చెందింది. ఈ రాకెట్ నియంత్ర‌ణ కోల్పోవ‌డంతో ఎక్క‌డ ప‌డిపోతుందో చెప్ప‌డం కూడా క‌ష్టంగా మారింది. చివ‌ర‌కు హిందూ మహాసముద్రంలో ఎటువంటి నష్టం లేకుండా పడిపోవడంతో ప్రపంచం మొత్తం ఊపిరి పీల్చుకుంది. అంతరిక్ష శిధిలాలకు సంబంధించి ప్రమాణాలను పాటించడంలో చైనా విఫలమైందని నాసా అడ్మినిస్ట్రేటర్ సేన్ బిల్ నెల్సన్ అన్నారు.