కులమతాలకతీతంగా చిన్నాపెద్ద తేడా లేకుండా అందరూ ఆనందంగా జరుపుకొనే పండుగ హోలీ. పండుగ వేడుకలను ఉమ్మడి రంగారెడ్డి జిల్లాలో ఘనంగా నిర్వహించనున్నారు. హోలీ పండుగకు ఒక రోజు ముందుగా కాముడి దహనం చేస్తారు. వ్యాపారస్తులు వివిధ రకాల రంగులను మార్కెట్లో విక్రయించేందుకు సిద్ధంగా ఉంచడంతో పండుగ వాతావరణం నెలకొన్నది.
గులాల్, ఆకుపచ్చ, పసుపుపచ్చ, ఎరుపు, బంగారపు రంగుల పొట్లాలను ఒక్కొక్కటి రూ.5 నుంచి రూ.150 వరకు, చిన్నారులు వినియోగించే రంగుల తుపాకులను రూ.20 నుంచి రూ.1200 వరకు విక్రయిస్తున్నారు. కోడిగుడ్లను అదనంగా అమ్ముతున్నారు. హోలీ రోజున నీటిలో రంగులు కలిపి ఒకరిపై ఒకరు చల్లుకుని సరదాగా గడుపుతారు. హోలీకి ముందురోజు గ్రామంలోని నడిబొడ్డున కట్టెలు, పిడకలు ఒకదగ్గర చేర్చి కాముని కాల్చుతూ… యువకులు సంతోషంగా గడుపుతారు. ఈ పండుగపూట రసాయన రంగులు వాడి చర్మానికి రోగాలు కొనితెచ్చుకోకుండా సహజసిద్ధంగా లభించే రంగులను వాడాలని వైద్య నిపుణులు సూచిస్తున్నారు.
– న్యూస్ నెట్వర్క్
పసుపుతో చేసిన రంగులు వ్యాధి నిరోధక శక్తిని పెంపొందిస్తాయి. తులసి ఆకులతో చేసిన రంగులు మానసికోల్లాసానికి తోడ్పడతాయి. శ్వాసక్రియ శక్తిని పెంచుతాయి. కలబంద, వేపాకులు చర్మ వ్యాధులను తగ్గిస్తాయి. దురదల నివారణకు ఉపయోగపడతాయి. గోరింటాకు శరీర పగుళ్లను నివారిస్తుంది. గంధంపొడి మనసుకు ప్రశాంతత కలిగించడంతో పాటు సువాసన వెదజల్లుతుంది.
రసాయన రంగులతో హోలీ పండుగ ఎంత ఉల్లాసాన్ని నింపుతుందో.. అంతే విషాదాన్ని మిగుల్చుతుంది. రంగుల్లో వాడే రసాయన పదార్థాలతో శరీరానికి హాని కలిగే అవకాశాలు ఎక్కువగా ఉన్నాయి. కళ్ల మంటలు, ఆస్తమా, చర్మ వ్యాధులు సంభవిస్తాయని వైద్య నిపుణులు చెబుతున్నారు. నలుపు రంగులో లెడ్ ఆక్సైడ్ ఉంటుందని, ఇది మూత్రపిండాలను పాడు చేస్తుందని, వెండి రంగులో ఉండే మెర్క్యూరీ సల్ఫేట్తో క్యాన్సర్ సోకే అవకాశముందని హెచ్చరిస్తున్నారు.
ఆకుపచ్చ రంగుల్లో ఉండే కాపర్ సల్ఫేట్ ద్వారా ఎలర్జీతో పాటు శాశ్వత అంధత్వం వచ్చే అవకాశం ఉంది. ఎక్కువ శాతం డ్రై కలర్స్ అంతగా చర్మానికి, జుట్టుకు చేటు చేయవు. అయితే మెటల్స్ కూడా ఈ పొడుల్లో కలిసిపోయే తరహా రంగులను మాత్రం వాడవద్దు. ముఖ్యంగా సిలికా పార్టికల్స్ అధికంగా ఉన్న రంగుల వాడకం వల్ల చర్మం బాగా పాడయ్యే ఆవకాశాలున్నాయి. పొడిగా ఉండే రంగుల్లో జిలెటిన్ పైలట్ కలవడం వల్ల మైకంతో పాటు ఆస్తమా, అంధత్వం వచ్చే అవకాశం ఉందని శాస్త్రవేత్తల పరిశోధనల్లో తేలింది.