బెట్టివగ్‌ ఆట.. నేరాల బాట

యువత ఆన్‌లైన్‌ బెట్టింగ్‌లకు బానిసలుగా మారి చేతిలో ఉన్న డబ్బంతా ఆ ఆటలకే ఖర్చుచేయడంతోపాటు.. ఇతరుల వద్ద డబ్బులు తీసుకుని అప్పుల పాలవుతున్నారు. వాటిని తీర్చే మార్గం లేక కొందరు బలవన్మరణాలకు పాల్పడుతుండగా.. మరికొందరు చోరీలు, హత్యలు కూడా చేస్తూ తమ బంగారు భవిష్యత్తును నాశనం చేసుకుంటున్నారు.

• యువతకు వ్యసనంలా మారినఆన్‌లైన్‌ బెట్టింగ్‌లు
• చేసిన అప్పులు తీర్చలేక దారిదోపిడీలు, హత్యలు.. ఆత్మహత్యలు
• తమ బంగారు భవితను నాశనం చేసుకుంటున్న యువత
• ఆన్‌లైన్‌ గేములు ఆడుతున్న వారిలో అత్యధికులు టీనేజర్లే

యువత ఆన్‌లైన్‌ బెట్టింగ్‌లకు బానిసలుగా మారి చేతిలో ఉన్న డబ్బంతా ఆ ఆటలకే ఖర్చుచేయడంతోపాటు.. ఇతరుల వద్ద డబ్బులు తీసుకుని అప్పుల పాలవుతున్నారు. వాటిని తీర్చే మార్గం లేక కొందరు బలవన్మరణాలకు పాల్పడుతుండగా.. మరికొందరు చోరీలు, హత్యలు కూడా చేస్తూ తమ బంగారు భవిష్యత్తును నాశనం చేసుకుంటున్నారు.
-రంగారెడ్డి, డిసెంబర్‌ 19 (నమస్తేతెలంగాణ)

• నాగర్‌కర్నూల్‌కు చెందిన ఇద్దరు యువకులు ఆన్‌లైన్‌ బెట్టింగ్‌లకు బానిసయ్యారు. ఈ క్రమంలో పెద్ద ఎత్తున అప్పులు చేశారు. వాటిని తీర్చేందుకు మాడ్గుల ఠాణా పరిధిలోని బ్రాహ్మణపల్లి వద్ద లింగమ్మ అనే మహిళ రోడ్డు పక్క నుంచి నడుచుకుంటూ వెళ్తుండగా, ఆమె మెడలో ఉన్న బంగారు గొలుసును ఎత్తుకెల్లి దొంగలుగా మారారు.
• ఇబ్రహీంపట్నం మండలంలోని తులేకలాన్‌ గ్రామానికి చెందిన శివలింగం సౌమ్యుడు, మంచివాడు. ఆయన తండ్రి ప్రభుత్వ ఉద్యోగిగా ఉద్యోగ విరమణ చేశాడు. ఉన్నత విద్యాభ్యాసం చేసినా ప్రభుత్వ ఉద్యోగం రాక ఇబ్రహీంపట్నంలో ప్రైవేట్‌ ఉద్యోగం చేస్తున్నాడు. త్వరలోనే వివాహం చేయాలని అతడి తల్లిదండ్రులు భావించారు. ఈ లోపు చెడు స్నేహానికి అలవాటుపడి ఆన్‌లైన్‌ బెట్టింగ్‌ల వైపు దృష్టి సారించాడు. ఆన్‌లైన్‌ బెట్టింగ్‌ అతడికి ఒక వ్యసనంగా మారింది. చేతిలో ఉన్న డబ్బంతా ఆ ఆటలకే వెచ్చించాడు. ఇతరుల వద్ద డబ్బులు తీసుకుని అప్పుల పాలై.. వాటిని తీర్చే మార్గంలేక ఒంటిపై కిరోసిన్‌ పోసుకుని ఆత్మహత్యాయత్నం చేశాడు. చివరకు చికిత్స పొందుతూ మృతి చెంది. కన్న వారికి తీరని శోకాన్ని మిగిల్చాడు.
• నగరంలోని బేగంపేటకు చెందిన సురేందర్‌ వృత్తిరీత్యా డ్రైవర్‌, ఉన్న దానితో కుటుంబంతో కలిసి సంతోషంగా జీవించాడు. ఈ క్రమంలో అతడికి ఆన్‌లైన్‌ బెట్టింగ్‌ రాయుళ్లు పరిచయమయ్యారు. వారితో కలిసి పెద్ద ఎత్తున ఆన్‌లైన్‌ గేములాడాడు. తిరిగి వెనక్కి చూసుకునే లోపే అప్పు ల ఊబిలో కూరుకుపోయాడు. చేసిన అప్పులు తీర్చే మార్గంలేక దొంగతనాలు, హత్యలు చేయాలనుకున్నాడు. అందులో భాగంగానే తన యజ మానురాలి తల్లి నాదర్‌గుల్‌కు చెందిన సరోజను హత్య చేసి ఆమె వద్ద ఉన్న బంగారాన్ని తస్కరించాలనుకున్నాడు. అనుకున్నట్లే ఆమెను హత్యచేసి ఆమె వద్ద ఉన్న బంగారాన్ని తీసుకెళ్లి తాకట్టు పెట్టగా పోలీసులు కనిపెట్టి అతడ్ని కటకటాలపాలు చేశారు. అతడిపై ఆధారపడిన కుటుంబం రోడ్డున పడింది.
• అబ్దుల్లాపూర్‌మెట్‌కు చెందిన ఇద్దరు ఇంజినీరింగ్‌ విద్యార్థులు ఆన్‌లైన్‌ బెట్టింగ్‌లకు బానిసలై .. చేసిన అప్పులు తీర్చలేక రాందాస్‌పల్లి వద్ద బైక్‌పై వెళ్తున్న భార్యాభర్తలను అడ్డగించి వారి మెడలో ఉన్న బంగారాన్ని దోచుకుని దొంగలుగా పోలీసుల రికార్డులోకి ఎక్కారు. దీంతో వారి ఉజ్వల భవిష్యత్తును నాశనం చేసుకున్నారు.
• ఇలాంటి ఘటనలు జిల్లాలో ఎక్కడో ఓ చోట నిత్యం జరుగుతూనే ఉన్నాయి. ఎంతో భవిష్యత్తు ఉన్న యువతీయువకులు ఆన్‌లైన్‌ బెట్టింగ్‌ల మోజులో పడి చోరులుగా మారడంతోపాటు మరికొంతమంది ఏకంగా హత్యలకే పాల్పడుతున్నారు. ఈ గేముల్లో సంపాదించిన వారు ఎవరూ లేకపోగా, అప్పులు చేసిన వారే అత్యధికంగా ఉన్నారు.

ఆడే గేములు ఇవే..
ముఖ్యంగా యువత క్రికెట్‌, పేకాట, హార్స్‌రైడింగ్‌, రూ లెట్‌, లూడో, ఆన్‌లైన్‌ జూదంతోపాటు క్యాసినో కేం ద్రాల్లో ఉన్న అనేక రకాల ఆటలపై బెట్టింగ్‌లకు పాల్పడుతున్నారు. బెట్టింగ్‌లు నిర్వహించేవారు. ముందుగా కొంత లాభాన్ని చూపించి యువతను ఆకర్షిస్తున్నారు. ఆ తర్వాత వారి నుంచి సర్వం లాగేస్తున్నారు. అదేవిధంగా యువత ఎక్కువగా లోన్‌ యాప్‌లు, మైక్రో ఫైనా న్స్‌ సంస్థల నుంచి అప్పులు తీసుకుంటున్నారు. రుణాలు చెల్లించాలని వారు వేధించడం, బెదిరిస్తుండడం, చెల్లించలేని స్థితిలో ఉన్న వారు జిల్లాలో ఇప్పటివరకు సుమారు 20 నుంచి 25 మంది వరకు ఆత్మహత్యలు చేసుకోగా.. అనేకమంది చోరీ కేసుల్లో ఇరికి సతమతమవుతున్నారు.

యువత ఆ వ్యసనానికి దూరంగా ఉండాలి
ఎంతో భవిష్యత్తు ఉన్న యువత ఆన్‌లైన్‌ బెట్టింగ్‌ల ఊబిలో పడి తమ జీవితాలను నాశనం చేసుకోవద్దు. ఆ వ్యసనానికి దూరంగా ఉండాలి. ఎంతోమంది అప్పులు చేసి ఆన్‌లైన్‌ గేములాంటి ప్రాణాలు తీసుకోవడం తోపాటు నేరాలకు పాల్పడుతున్నారు. త్వరలోనే యువతలో చైతన్యం తీసుకొచ్చేందుకు కార్యక్రమాలు నిర్వహిస్తాం.
-కేపీవీ రాజు, ఇబ్రహీంపట్నం ఏసీపీ