Land Problems | భూ సమస్యల పరిష్కారానికి డయల్‌ ఇన్‌ గ్రీవెన్స్

జిల్లా అదనపు కలెక్టర్‌ మోతీలాల్‌

వికారాబాద్‌ : వికారాబాద్‌ జిల్లాలో భూ సమస్యలతో సతమతం అవుతున్న వారికి డయల్‌ ఇన్‌ గ్రీవెన్స్​‍ కార్యక్రమం ఎంతో ఉపయోగపడుతుందని వికారాబాద్‌ జిల్లా అదనపు కలెక్టర్‌ మోతీలాల్‌ తెలిపారు. బుధవారం కలెక్టరేట్‌లో నిర్వహించిన డయల్‌ ఇన్‌ గ్రీవెన్స్​‍ కార్యక్రమానికి భూ సమస్యలపై 22 ఫిర్యాదులు వచ్చాయి. ఈ సందర్భంగా జిల్లా అదనపు కలెక్టర్‌ మోతీలాల్‌ మాట్లాడుతూ ఎన్నో ఏళ్లుగా భూ సమస్యలతో ఇబ్బందులు పడుతున్న వారికి ఈ కార్యక్రమం ద్వారా వెంటనే పరిష్కారం లభిస్తుందన్నారు. ప్రతి బుధవారం వికారాబాద్‌ కలెక్టరేట్‌లో ధరణి భూ సమస్యల పరిష్కారం కోసం ఈ కార్యక్రమం నిర్వహించడం జరిగిందని తెలిపారు. ఉదయం 9 నుంచి 10:30 గంటల వరకు ఫోన్‌ చేసి సమస్యలు విన్నవించాలన్నారు. కార్యక్రమంలో కలెక్టర్‌ కార్యాలయ తాసీల్దార్లు శ్రీధర్‌, సుధా, నిరంజన్‌రావు, ఈడీఎం మహమూద్‌అలీ, ధరణి కో-ఆర్డినేటర్‌ నర్సింహ పాల్గొన్నారు.