న్యూఢిల్లీ : విమానంలో అడుగుపెట్టగానే ముందుగా ఎవరైనా వాటర్ అడుగుతుంటారు. దాహంతో అసలు ఆ నీళ్లు ఎలా ఉన్నాయనేదానిపై మనం అసలు ఆలోచించం. అయితే ఫ్లైట్ అటెండెంట్ కేట్ కమలానీ.. విమానాల్లో రహస్యాలను విడమిర్చి చెప్పారని ట్రావెల్ ప్లస్ లీజర్ ఓ వీడియోను రిలీజ్ చేసింది. ఆమె వెల్లడించిన వివరాలతో ఈసారి విమానంలో నీళ్లు తాగాలంటే ఎవరైనా నీళ్లు నమలాల్సిందే. కమర్షియల్ విమానాల్లో డర్టీ సీక్రెట్ లతో కూడిన కేట్ వీడియో టిక్ టాక్ లో వైరల్ గా మారింది.
విమానాల్లో సిబ్బంది అందించే నీటిని తాగవద్దని కేవలం క్యాన్, బాటిల్డ్ డ్రింక్ లనే తీసుకోవాలని సూచించింది. ఇక్కడి వాటర్ ట్యాంక్ లను అసలు ఎన్నడూ క్లీన్ చేయరని, పరిశుభ్రత కనిపించదని ఈ వీడియోలో వివరించింది. తాను తన సహచరులు ప్లేన్ లో ఎప్పుడైనా కాఫీ, హాట్ టీ మినహా వాటర్ జోలికి పోమని, విమానాల్లోని వాటర్ ట్యాంకులను అసలు కడగరని, అపరిశుభ్రత రాజ్యమేలుతుందని ఈ వీడియోలో కేట్ చెప్పుకొచ్చారు. వాష్ రూమ్ లు, టాయ్ లెట్ల పక్కనే వాటర్ ట్యాంకులు ఉంటాయని అన్నారు. విమానాల్లో ప్రయాణీకులు బాటిల్డ్ వాటర్ లేదా కూల్ డ్రింక్స్ తీసుకోవాలని ఆమె సూచించారు.