అంతర్నిహితం

అంతర్నిహితం
చీరికల చీకటి పల్లకి మీద మనిషి
నీ అంతరంగం బహిర్గతమయ్యాక
ప్రకృతికి రహస్యాలుండవు యిక
బొండిగెలో ఉగ్గవట్టిన బీభత్సం విషపుగాలి
గుండె తిత్తులను కొరికి ఊపిరి తీగను తెంపుతుంది

కాళ్లు చేతులను ఒక్కదగ్గర గుంజికట్టి
కర్రకు కోలాటం వేసి తన భుజాల మీద మోసుకోని
ఎక్కడికో! దిగంతాలకు ఆవల
జీవునాన్ని విసిరివేస్తున్న దీర్ఘదర్శి మృత్యువు

ఉదాసీనమైన చూపులలో ఉత్సాహము చిట్లి
శూన్యం తొర్రల్లో జీవమార్గాలను అన్వేషిస్తుంటావు
గుడ్లమీద పొదిగిన తొండోలే
ఆశ మిట మిట కొట్టుకుంటుంది

నది ఒడ్డున దుఃఖంతో చాకిరేవుకు తల
బాదుకుంటావో! లేదో !
ఆకాశం అమాంతం బళ్ళున విరిగి మీద పడుతుంది
నీకు ఊపిరాడదు
చిలక్కొయ్యకు వేలాడుతున్న లాకర్‌ తాళంచెవి
వెటకారంగా విరగబడి నవ్వుతుంది

భార్య పిల్లలు బంధువులు
వాళ్ల తొవ్వలు వాళ్లు చూసుకుంటరు
నిర్దయగా కాలం నిన్ను ఈడ్చుకుంటూ
లాక్కెళ్లి అగాథంలో తొక్కేస్తుంది

తనువు తనగాయాలకు లేపనంగా
జ్ఞాపకాల బూడిద రాసుకుంటుంది
అంతర్నిహిత తండ్లాటలో సత్యాన్ని శోధిస్తుంటావు
చితిలో సగంకాలిన కొరకాసు దొరుకుతుంది

మూలుగులు రోదనలు శ్మశానం చావు కచేరి
భయంతో దద్దరిల్లుతోంది విశ్వమంతా

నువ్వు నీ మాయిముంతను ఎంకులాడుకుంటావు
రక్తసిక్తమైన నాజూకు శరీర అంగంగాలకు
ప్రాయశ్చిత్తంగా ప్రకృతిని గుండెలకు అతుక్కుంటావు
ఆశ్చర్యంగా నీ దేహమంతా వేర్లు పుట్టుకొచ్చి
మట్టిలో పచ్చని మొక్కవై మొలకెత్తుతావు..!

డాక్టర్‌ పొన్నాల బాలయ్య
9908906248